ޕީއެންސީ އަކީ އިދިކޮޅުގައި އޮތްއިރު ވެސް އަވަށްޓެރި ގައުމުތަކާ މެދު ފިތުނަ އުފެއްދި ބައެއް، ސަރުކާރުގަ އޮވެގެން ވެސް ކުރަނީ އެކަންތައް: ޝާހިދު
2 ނޮވެމްބަރު 2026 | ހޯމަ 07:13ރަސްމާލެ މަޝްރޫއުގެ ދަށުން ހިއްކާ ބިމުން 500 ހެކްޓަރު ބޭރުގެ ކުންފުންޏަކަށް ހިލޭ ދޭން ނިންމާފައިވާތީ، އެކަމުގައި ރައްޔިތުންގެ ފެންނަ ނުފެންނަ ވޯޓެއް ނެގުމަށް ގޮވާލައި އެމްޑީޕީން ގަރާރެއް ފާސްކޮށްފި. މި މަޝްރޫއަކީ ދައުލަތުގެ ބަޖެޓުން ބޮޑު ހޭދައެއް ކޮށްގެން ހިންގާ އޮޅުވާލުންތަކެއް އެކުލެވޭ ކަމެއް ކަމަށް ކުރީގެ ފޮރިން މިނިސްޓަރު އަބްދުﷲ ޝާހިދު ވަނީ ތުހުމަތު ކުރައްވާފައި
އެމްޑީޕީގެ ކުރީގެ ރައީސް އަދި ކުރީގެ ފޮރިން މިނިސްޓަރު އަބްދުﷲ ޝާހިދު | އެމްޑީޕީ
މިހާރު ސަރުކާރުގަ އޮތް ޕީއެންސީ އަކީ އިދިކޮޅުގަ އޮތް އިރު ވެސް އަވަށްޓެރި ގައުމުތަކާ މެދު ފިތުނަ އުފެއްދި ބައެއް ކަމަށާއި މިހާރު ސަރުކާރުގައި ތިބެގެން ވެސް ކުރަމުންދާ ކަމަކީ ގާތް ގައުމުތަކާ މެދު ފިތުނަ އުފައްދަން މަގުފަހި ކުރަމުން ކަމަށް އެމްޑީޕީގެ ކުރީގެ ރައީސް އަދި ކުރީގެ ފޮރިން މިނިސްޓަރު އަބްދުﷲ ޝާހިދު ވިދާޅުވެއްޖެ އެވެ.
އާދިއްތަ ދުވަހުގެރޭ ބޭއްވި އެމްޑީޕީގެ ގައުމީ މަޖިލީހުގެ 4 ވަނަ ދައުރުގެ 38 ވަނަ ބައްދަލުވުމުގައި ވާހަކަދައްކަވަމުން ޝާހިދު ވިދާޅުވީ ފުށިދިއްގަރު ފަޅުގެ މުޅި މަޝްރޫއަކީ އޮޅުވާލުމެއް ކަމަށެވެ. އެގޮތުން އެތަނުގެ ނަމުން ފެށިގެން ގޮސް އެ މަޝްރޫއާ ގުޅުންހުރި ހުރިހާ ކަމެއްގައި ވެސް މި ސަރުކާރުން ދަނީ އޮޅުވާލަމުން ކަމަށް ޝާހިދު ވިދާޅުވި އެވެ.
އެތަނަށް ފައިސާ ޚަރަދުކުރަމުން ދިޔަ ގޮތް ވެސް އޮޅުވާލާފަ އޮތީ. ބަޖެޓު ފާސްކުރިއިރު ބަޖެޓުގައި ނެތް ޚަރަދުތަކެއް އޮޅުވާލުމުގެ ތެރެއިން ޚަރަދު ކުރަމުން ގޮސް، 800 މިލިއަން ޑޮލަރާ ހަމައަށް ރައްޔިތުންގެ ފައިސާ އެހެރީ އެތަނަށް އަޅާފަ. އެތަނަށް އެ ފައިސާ އަޅުއްވަމުން ވިދާޅުވީ މިކަން މި ކުރައްވަނީ ދިވެހި ރައްޔިތުންގެ ބޯހިޔާވަހިކަމަށް މަގުފަހި ކުރުމަށް ކަމަށް. އެހެން ވިދާޅުވެ އެކަން ކުރެއްވީ. ދެން ވިދާޅުވީ މާލެއާ އެތަނާ ގުޅުވާލާނީ ބިއްލޫރި ޓަނަލަކުންނޭ. އެ ޓަނަލް ގެ ވާހަކަދެއްކެވީމަ ދެބުރަށް އެތަނުގެ ތިއްބެވި ބޭފުޅުން ތެދުވެވަޑައިގެން އަތްޖަހަމުން ދިޔައީ ކޮނޑުހުޅު ނެއްޓޭ ވަރަށްއަބްދުﷲ ޝާހިދު
މިހާރު މިއުޅެނީ ބިއްލޫރި ޓަނަލުގެ ވާހަކަ އެއް ނޫން ކަމަށާއި އަދި މިހާރު މި އުޅެނީ ދިވެހި ރައްޔިތުންނަށް ދިމާވެފައިވާ އެންމެ ބޮޑު މައްސަލަ ކަމުގައިވާ ބޯހިޔާވަހިކަމުގެ މައްސަލަ އެއް ނޫން ކަމަށް ޝާހިދު ވިދާޅުވި އެވެ.
މިހާރު އިވެމުން ދަނީ ދިވެހި ރައްޔިތުންގެ ޓެކްސް ފައިސާ އިން 800 މިލިއަން ޑޮލަރު ޚަރަދުކޮށްގެން ހިއްކި ބިމެއް، ބޭރުގެ ކުންފުންޏަކަށް ގަނޑުކޮށް، ހިލޭ، ދޭ ވާހަކަ ކަން ފާހަގަކުރައްވާ ޝާހިދު ވިދާޅުވީ ސަރުކާރުން މިގޮތަށް މިކަން ކުރަމުންގެންދާއިރު ހުރިހާ ނިކަމެތި ކަމެއް ލިބެމުން ދަނީ ދިވެހި ރައްޔިތުންނާ މި ގައުމަށް ކަމަށެވެ.
ސަރުކާރުން މި ކަންކުރަމުން ގޮތުން އަޅުގަނޑުމެންނަށް މި ދިމާވާ އެންމެ ބޮޑު މައްސަލައަކީ އަޅުގަނޑުމެންގެ ތެރޭގަ ފިތުނަ އަށް ޖާގަ ލިބިގެން ދިޔުން. މިހާރު ސަރުކާރުގަ އެ އޮތް ޕާޓީ އަކީ އެބޭފުޅުން އިދިކޮޅުގައި ތިއްބަވައިގެން ވެސް އަޅުގަނޑުމެންގެ އަވަށްޓެރި ގައުމުތަކާ މެދު ފިތުނަ އުފެއްދެވި ބޭފުޅުން. އަދި މިހާރު ސަރުކާރުގަ ތިއްބަވައިގެން ވެސް އެ ކުރައްވަނީ އަޅުގަނޑުމެންގެ ގާތް ގައުމުތަކާ ދޭތެރޭ ފިތުނަ އަށް މަގުފަހިވާނެ ކަންކަންއަބްދުﷲ ޝާހިދު
އެ ބައްދަލުވުމުގައި އެ ޕާޓީ އިން ވަނީ ކ. ފުށިދިއްގަރުފަޅު ހިއްކައިގެން ތަރައްގީކުރަމުންދާ ރަސްމާލެއިން 500 ހެކްޓަރުގެ ބިން ޔޫއޭއީގެ އީގަލް ހިލްސް ކުންފުންޏަށް ދިނުމުގެ މުއާމަލާތާ ގުޅިގެން، އެ މަޝްރޫއާމެދު ރައްޔިތުން ދެކޭ ގޮތެއް ބެލުމަށް ފެންނަ ނުފެންނަ ވޯޓެއް ނަގައި ރައްޔިތުން ނިންމާ ގޮތަކަށް އަމަލުކުރުމަށް ސަރުކާރަށް ގޮވާލައި ގަރާރެއް ވެސް ފާސްކޮށްފަ އެވެ.
މި ގަރާރުގައި ބަޔާންކޮށްފައިވަނީ، ރަސްމާލޭގައި "މޯލްޑިވްސް ވޯޓަރ ފްރަންޓް އެންޑް މެރީނާ" މަޝްރޫއު ހިންގުމަށް، ދިވެހި ސަރުކާރާއި ޔޫއޭއީގެ އީގަލް ހިލްސް ކުންފުންޏާ ދެމެދު 21 ސެޕްޓެމްބަރު 2026 ގައި ކޮމާޝަލް ޓާމްސް އެއްބަސްވުމެއް އެކުލަވާލާފައިވާ ކަމަށެވެ. އަދި މި މަޝްރޫއަށް ރަސްމާލެއިން 500 ހެކްޓަރުގެ ބިން 99 އަހަރުގެ މުއްދަތަށް ދޭން ނިންމާފައިވަނީ އެއްވެސް އިކުއިޒިޝަން ކޮސްޓަކާ ނުލައި އަދި ބިން ދޫކޮށްފައި އޮންނަ މުއްދަތުގައި އެއްވެސް ކުއްޔެއް ނުހިނގާ ގޮތަށް ކަމަށް ވެސް ގަރާރުގައިވެ އެވެ.
މީގެ އިތުރުން، މި މަޝްރޫއު ހިންގުމަށް އީގަލް ހިލްސް ކުންފުނި ހޮވާފައިވަނީ ގާނޫނީ އުސޫލުތަކުގެ ބޭރުން ކަމަށް ބެލެވޭ ސަބަބުތައް ގަރާރުގައި ތަފުސީލުކޮށްދީފައިވެ އެވެ.
