މާލޭ އުތުރު ފަރާތު ބަނދަރުގައި ހަދާ ތިން ފިންގަރ ޖެޓީގެ ކޮންކްރީޓް މަސައްކަތް ނިމިފައިވާކަމަށް އެމްޓީސީސީ އިން ބުނެފި
1 ނޮވެމްބަރު 2026 | އާދީއްތަ 12:48މާލޭ އުތުރު ބަނދަރުގައި ތަރައްޤީކުރާ 15 މީޓަރުގެ ތިން ފިންގަރ ޖެޓީގެ ކޮންކްރީޓް މަސައްކަތްތައް ނިމި، މިހާރު ކުރިއަށްދަނީ ފިނިޝިންގ މަރުހަލާގެ މަސައްކަތްތައްކަމަށް އެމްޓީސީސީ އިން މައުލޫމާތުދޭ. މީގެ ތެރޭގައި ޑެކްގައި ފިލާޖެހުމާއި، ބައްތި ހަރުކުރުމުގެ އިތުރުން މޫރިންގ ބޮލާޑް ހަރުކުރުން ހިމެނޭ. މި މަޝްރޫއު ނިމުމުން ބަނދަރުގެ ތޮއްޖެހުން ކުޑަވެ، މުދާ ބަރުކުރުމާއި ބޭލުމުގެ މަސައްކަތްތަކަށް ބޮޑު ލުޔެއް ލިބޭނެކަމަށް އެމްޓީސީސީ އިން ބުނޭ
މާލެ އުތުރު ފަރާތު ބަނދަރުގައި ތަރައްގީކުރަމުންދާ ފިންގަރ ޖެޓީތަކުގެ މަޝްރޫއު | އެމްޓީސީސީ
މާލޭ އުތުރު ފަރާތު ބަނދަރުގެ ޖާގައިގެ ދަތިކަން ހައްލުކުރުމަށްޓަކައި ސަރުކާރުން ކުރިއަށްގެންދާ ފިންގަރ ޖެޓީ ތަރައްޤީކުރުމުގެ މަޝްރޫއުގެ ދަށުން، ތިން ޖެޓީގެ ކޮންކްރީޓް ހުރިހާ މަސައްކަތްތަކެއް ނިންމާލާފައިވާ ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ބުނެފި އެވެ.
މި މަޝްރޫއަކީ މާލޭގެ އުތުރު ފަރާތު ބަނދަރަށް މުދާ ހިފައިގެން އަންނަ އޮޑިދޯނިފަހަރަށް ލަފާފުރުމުގައި ދިމާވާ ދަތިތަކަށް ދާއިމީ ހައްލެއް ހޯދައިދިނުމަށް ފަރުމާކޮށްފައިވާ މަޝްރޫއެކެވެ.
މި މަޝްރޫއުގެ ދަށުން ތަރައްޤީ ކުރަމުންދަނީ 15 މީޓަރުގެ ދިގުމިން ހުންނަ ތިން ފިންގަރ ޖެޓީ އެވެ. މި ޖެޓީތަކުގެ އޮނިގަނޑު ވަރުގަދަކުރުމަށްޓަކައި ކުރަންޖެހޭ ކޮންކްރީޓްގެ ހުރިހާ މަރުހަލާއެއް ނިންމާލާފައިވުމާ އެކު، މި މަޝްރޫއުގެ އެންމެ ބުރަ އަދި އެންމެ މުހިންމު އެއް މަރުހަލާ މިވަނީ ނިމިފައި ކަމަށް އެމްޓީސީސީ އިން ބުނެ އެވެ.
އެމްޓީސީސީ އިން ބުނީ ދެން އެންމެ އަވަހަށް ކުރިއަށްދާނީ ޖެޓީތަކުގެ ފިނިޝިންގ މަސައްކަތްތައް ކަމަށެވެ. މީގެ ތެރޭގައި ޖެޓީތަކުގެ ޑެކްގައި ލަކުޑި ފިލާ ޖެހުމުގެ މަސައްކަތާއި، އޮޑިދޯނިފަހަރު ގާތްކޮށްފައި ބޭއްވުމަށް ބޭނުންވާ މޫރިންގ ބޮލާޑް ނުވަތަ ބިތްގަނޑު ހަރުކުރުމުގެ މަސައްކަތް ހިމެނޭ ކަމަށް އެ ކުންފުނިން ބުނެ އެވެ. މީގެ އިތުރުން ރޭގަނޑު ވަގުތުތަކުގައި ބަނދަރު ބޭނުންކުރާ ފަރާތްތަކަށް ފަސޭހަަކޮށްދިނުމުގެ ގޮތުން ޖެޓީތަކުގައި ބައްތި ހަރުކުރުމުގެ މަސައްކަތް ވެސް ކުރިއަށް އޮތް ދުވަސްތަކުގައި ފެށުމަށް ހަމަޖެހިފައިވާ ކަމަށް އެމްޓީސީސީ އިން މައުލޫމާތުދެ އެވެ.
މާލޭ އުތުރު ފަރާތު ބަނދަރަކީ އަތޮޅުތެރެއިން މާލެއަށް މުދާ އުފުލާ ގިނަ އަދަދެއްގެ އުޅަނދުފަހަރު ކޮންމެ ދުވަހަކު ވެސް ބޭނުންކުރާ ސަރަހައްދެކެވެ. އެ ސަރަހައްދުގައި އަލަށް ތަރައްޤީކުރާ ފިންގަރ ޖެޓީތަކާއެކު، ބަނދަރުގައި އުޅަނދުފަހަރު އެތުރުމަށް އިތުރު ޖާގަ ލިބި، މުދާ ބޭލުމާއި ބަރުކުރުމުގެ މަސައްކަތްތައް މިހާރަށްވުރެ ހަލުވިވެގެންދާނެ ކަމަށް މި މަޝްރޫއާ ގުޅޭ ގޮތުން ސަރުކާރުން ބުނެފައިވެ އެވެ.
އަދި މި މަޝްރޫއު ނިމުމުން މާލޭގެ ވިޔަފާރި ބަނދަރަށް ދިމާވެފައިވާ ތޮއްޖެހުމުގެ މައްސަލައަށް ބޮޑު ލުޔެއް ލިބިގެންދާނެ ކަމަށާއި ސަރުކާރުން އަމާޒު ހިފާފައިވަނީ ވީހާވެސް އަވަހަށް މި މަސައްކަތްތައް އެއްކޮށް ނިންމާލައި، އާންމު ވިޔަފާރިވެރިންނާއި އޮޑިވެރިންނަށް މި ޖެޓީތަކުގެ ބޭނުން ހިފޭނެ އިންތިޒާމު ހަމަޖައްސައިދިނުމަށް ކަމަށް ސަރުކާރުން ވަނީ ބުނެފަ އެވެ.
