އެމްޓީސީސީއާ ހަވާލުކޮށްފައިވާ މަޝްރޫއުތައް ކުރިއަށްގެންދަން ފައިސާ ނެތްއިރު ބޮޑު ޑްރެޖަރެއް ގެންނަން ޑޮލަރު ހޯދީ ކޮން ގޮތަކުންތޯ ވަހީދު ސުވާލު އުފައްދަވައިފި
27 ސެޕްޓެމްބަރު 2026 | އާދީއްތަ 12:11އެމްޓީސީސީގެ މަޝްރޫއުތައް ހުއްޓި، ޑޮލަރުގެ ދަތިކަން އިންތިހާއަށް ބޮޑު ދަނޑިވަޅެއްގައި، ބޮޑު ޑްރެޖަރެއް ގަންނަން ފައިސާ ހޯދި ގޮތާމެދު ކުރީގެ މެންބަރު އަބްދުﷲ ވަހީދު ސުވާލު އުފައްދަވައިފި. ސަރުކާރުން ދައްކާ ވާހަކަތަކަށް ރައްޔިތުން އިތުބާރު ނުކުރާކަން ފާހަގަކުރައްވަމުން، އޭނާ ވިދާޅުވީ ކުންފުނީގެ މާލީ ހާލަތު ހުރި ގޮތުން މިފަދަ ބޮޑު އިންވެސްޓްމަންޓެއް ކުރުމުގެ ގާބިލުކަމާމެދު ޝައްކު އުފެދޭ ކަމަށް
ރާއްޖެޓީވީގެ "ފަލަސުރުހީ" ޕްރޮގްރާމްގައި ދިއްދޫ ދާއިރާގެ ކުރީގެ މެންބަރު އަބްދުﷲ ވަހީދު (ވައްޑެ) ވާހަކަދައްކަވަނީ | ރާއްޖެ އެމްވީ
މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އާއި ހަވާލުކޮށްފައިވާ މަޝްރޫއުތައް ކުރިއަށްގެންދަން ފައިސާ ނެތްއިރު، ބޮޑު ޑްރެޖަރެއް ގެންނަން ޑޮލަރު ހޯދީ ކޮން ގޮތަކުންތޯ ދިއްދޫ ދާއިރާގެ ކުރީގެ މެންބަރު އަބްދުﷲ ވަހީދު (ވައްޑެ) ސުވާލު އުފައްދަވައިފި އެވެ.
ރާއްޖެޓީވީގެ "ފަލަސުރުހީ" ޕްރޮގްރާމްގައި ވާހަކަދައްކަވަމުން ވަހީދު ވިދާޅުވީ، ޑޮލަރު ލިބުމުގައި ދަތިތަކާއި ކުރިމަތިލާން ޖެހިފައިވާ އަދި ވިޔަފާރިވެރިންނަށް ވެސް މުދާ ގެނައުމުގައި ދަތިތަކާއި ކުރިމަތިލާން ޖެހިފައިވާ ދަނޑިވަޅެއްގައި ސަރުކާރު ކުންފުންޏަކުން ބޮޑު ޑްރެޖަރެއް ގެންނަކަމަށް ވިދާޅުވިއިރު އެއީ ކިހާ އަގެއްގެ އެއްޗެއް ކަމެއް ވެސް އެނގެން ނެތް ކަމަށެވެ.
ރައީސް ޑރ. މުހައްމަދު މުއިއްޒުގެ ސަރުކާރުން އަންނަނީ އަބަދުވެސް ވަރަށް އަޖައިބު ކުރަނިވި ގޮތަކަށް ވާހަކަތައް ފެންމަތި ކުރަމުންކަން ފާހަގަކުރައްވާ ވަހީދު ވިދާޅުވީ، ކުރިން ދެއްކެވި ވާހަކަތައް ހަގީގަތަކަށް ނުވީމަ މިހާރު ދައްކަމުންދަނީ އައު ވާހަކަތަކެއް ކަމަށެވެ. އަދި ކުރިން ވިދާޅުވެފައިވާ ކަންކަން ހަގީގަތަކަށް ވެފައި ނުވާއިރު މިއަދު މިދައްކަވަމުންދާ ވާހަކަ ދިވެހި ރައްޔިތުން ގަބޫލު ނުކުރާނެ ކަމަށް ވަހީދު ވިދާޅުވި އެވެ.
ވަހީދު ވަނީ އެމްޓީސީސީއަށް މިހާ ބޮޑު ޑްރެޖަރެއް ގެންނަން ޑޮލަރު ހޯދީ ކޮންތަނަކުންތޯ ސުވާލު އުފައްދަވާފަ އެވެ.
މިއުޅެނީ އެމްޓީސީސީއާ ހަވާލުކުރި އެއްވެސް މަސައްކަތެއް 3 އަހަރު ވެގެން ދިޔައިރު ވެސް އޭގައި ދާންވާ ސްޕީޑްގައި ނުގޮސްގެން. އެބޭފުޅުންނަށް ފައިސާގެ ދަތިކަން އިންތިހާއަށް އޮވޭ، އެބޭފުޅުންނަށް އެ ގެންނަން ވާ މުދާ ގެނައުމުގައި އިންތިހާއަށް ދަތިކަން އޮވޭ. އެ ހުރިހާ ކަމެއް ހުއްޓާ ކުއްލިއަކަށް ޑްރެޖަރެއް ގެންނަނީ ކޮން ގޮތަކަށްތޯއަބްދުﷲ ވަހީދު (ވައްޑެ)
ސަރުކާރުން މިހާރު މަސައްކަތްކުރަނީ އިތުރު ޑްރެޖަރެއް ހޯދައިދީ އެމްޓީސީސީގެ ބިން ހިއްކުމުގެ ގާބިލިއްޔަތުކަން އިތުރުކުރުމަށް ކަން ފާހަގަކުރައްވާ ރައީސް މުއިއްޒު ވަނީ މިއަހަރު ނިމުމުގެ ކުރިން މަހާ ޖައްރާފާއަށްވުރެ ތިން ގުނަ ބޮޑު ޑްރެޖަރެއް ގެނެވޭނެ ކަމަށް އުއްމާދު ކުރައްވާ ކަމަށް ވިދާޅުވެފަ އެވެ.
މިފަހަރު ގެންނަނީ އައު ޑްރެޖަރެއް ކަމަށާއި އެ ޑްރެޖަރު ގެނެވުމާއެކު މިހާރު ނުފެށި ހުރި ބިން ހިއްކުމުގެ މަޝްރޫއުތައް ހަލުވިވެ، އެމްޓީސީސީގެ ބިން ހިއްކުމުގެ މަޝްރޫއުތައް ބާރަށް ކުރިއަށް ހިނގާނެ ކަމަށް ރައީސް މުއިއްޒު ވިދާޅުވި އެވެ.
