ބޮސްނިއާގައި އީޔޫ މިޝަންގެ ހެލިކޮޕްޓަރެއް ވެއްޓި އިޓަލީވިލާތުގެ ހަތަރު މީހަކު މަރުވެެއްޖެ
30 އޮކްޓޯބަރު 2026 | ހުކުރު 09:27ބޮސްނިއާގައި އީޔޫގެ ސުލްހަ ބަލަހައްޓާ މިޝަންގައި ބޭނުންކުރި އިޓަލީވިލާތުގެ އަސްކަރީ ހެލިކޮޕްޓަރެއް ވެއްޓުނު ހާދިސާގައި ހަތަރު މީހުން މަރުވެ، 11 މީހަކަށް އަނިޔާވެއްޖެ. މި ހާދިސާގައި މަރުވި މީހުންގެ ޢާއިލާތަކަށް އިޓަލީގެ ބޮޑުވަޒީރާއި ދިފާޢީ ވަޒީރު ތަޢުޒިޔާ ފޮނުއްވާފައިވާއިރު، ހެލިކޮޕްޓަރު ވެއްޓެން މެދުވެރިވި ސަބަބު ދެނެގަތުމަށް ޚާއްސަ ތަހުގީގެއް މިހާރު ވަނީ ފަށާފައި
ބޮސްނިއާ އެންޑް ހެރްޒެގޮވީނާއި ހަރަކާތްތެރިވާ އީޔޫ މިޝަންގައި ބޭނުންކުރަމުންދިޔަ އިޓަލީވިލާތުގެ އަސްކަރިއްޔާގެ އައިސީއެޗް-47 ޝިނޫކް މަރުކާގެ ހެލިކޮޕްޓަރު ވެއްޓިފައިވާ ސަރަހައްދު | ރޮއިޓަރސް
ބޮސްނިއާ އެންޑް ހެރްޒެގޮވީނާގައި ހަރަކާތްތެރިވާ ވިލާތުގެ އިއްތިހާދުގެ (އީޔޫ) ސުލްހަ ބަލަހައްޓާ ފައުޖުން އޮޕަރޭޝަނެއްގައި ބޭނުންކުރަމުން ދިޔަ އިޓަލީވިލާތުގެ އަސްކަރީ ހެލިކޮޕްޓަރެއް ބުރާސްފަތި ދުވަހު ވެއްޓި، ހަތަރު މީހުން މަރުވެ އިތުރު 11 މީހަކު ޒަޚަމުވެއްޖެ ކަމަށް އިޓަލީވިލާތުގެ ދިފާޢީ ވުޒާރާއިން ބުނެފި އެވެ. މި ހާދިސާ ހިނގި ވަގުތު އެ ހެލިކޮޕްޓަރުގައި ޖުމުލަ 15 މީހުން ތިބި ކަމަށް ރަސްމީ އިދާރާތަކުން ބުނެ އެވެ.
މި ހާދިސާގައި ފުރާނަ ގެއްލުނު މީހުންގެ ތެރޭގައި ހިމެނެނީ އިޓަލީވިލާތުގެ އަސްކަރިއްޔާގެ ދެ ސިފައިންނާއި، އެ ޤައުމުގެ ރެޑް ކްރޮސްގެ 'ވޮލަންޓިއާ މިލިޓަރީ ކޯ' އަށް ނިސްބަތްވާ ދެ މެންބަރުން ކަމަށް އެ ޤައުމުގެ ދިފާޢީ ވުޒާރާއިން ބުންޏެވެ. މިއާއެކު، އަނިޔާވި 11 މީހުންނަށް ވެސް ހަސްފަތާލުތަކުގައި ފަރުވާ ދެމުންދާ ކަމަށާއި، އޭގެ ތެރެއިން އެއްވެސް މީހެއްގެ ފުރާނައަށް ނުރައްކާވާ ފަދަ ހާލަތެއް ނެތް ކަމަށް އެ ވުޒާރާއިން ބުންޏެވެ.
މި އަސްކަރީ ހެލިކޮޕްޓަރު ވެއްޓިފައި ވަނީ ބޮސްނިއާގެ ބްރަޗްކޯ ޑިސްޓްރިކްޓަށް ނިސްބަތްވާ ގޮރިތުސޭ ކިޔާ އަވަށަކަށް އިޓަލިވިލާތުގެ މީޑިއާތަކުން ބުންޏެވެ. އެ ސަރަހައްދުގެ މީޑިއާތަކުން އާންމުކުރި ފޮޓޯތަކުން ފެންނަ ގޮތުގައި، އަސްކަރީ މުދާ އުފުލާ މި އުޅަނދު އޮތީ ބޯކޮޅުވަތަށް ބިމަށް ވެއްޓި، އެތައް ބަޔަކަށް ކުދިކުދިވެފަ އެވެ.
މި ހާދިސާއާ ގުޅިގެން އިޓަލީވިލާތުގެ ދިފާޢީ ވަޒީރު ގުއީދޯ ކްރޮޒެއްތޯ ވަނީ މަރުވި މީހުންގެ ޢާއިލާތަކަށް ތަޢުޒިޔާ ވިދާޅުވެފަ އެވެ. "މި ފަދަ ފުން ހިތާމައިގެ ދަނޑިވަޅެއްގައި، އަޅުގަނޑުގެ ހެޔޮދުޢާތައް އެންމެ ފުރަތަމަ ވެސް ގުޅިފައި ވަނީ މަރުވި އަޅުގަނޑުމެންގެ ސިފައިންގެ ޢާއިލާތަކާ. އެ ފަރާތްތަކަށް އަޅުގަނޑުގެ އަމިއްލަ ނަމުގައާއި ދިފާޢީ މުޅި މުއައްސަސާގެ ނަމުގައި އިޚުލާސްތެރި ތަޢުޒިޔާ އަރިސްކުރަން،" އޭނާ ވިދާޅުވި އެވެ. "މި ފަދަ ބޮޑު ބީވުމަކަށް ތަސައްލީއެއް ގެނެސްދެވޭނެ އެއްވެސް ބަހެއް ނެތް."
ވެއްޓުނު ހެލިކޮޕްޓަރަކީ 1995 ވަނަ އަހަރު ސޮއިކުރެވުނު 'ޑޭޓަން ސުލްހައިގެ އެއްބަސްވުން' ތަންފީޒުކުރުމުގެ ކަންކަން ބަލަހައްޓަމުން އަންނަ ވިލާތުގެ އިއްތިހާދުގެ ފައުޖުން ހިންގާ 'އޮޕަރޭޝަން އަލްތިއާ' ގެ ދަށުން ހަރަކާތްތެރިވަމުން ދިޔަ އުޅަނދެކެވެ. އިޓަލީވިލާތުގެ ދިފާޢީ ވުޒާރާއިން ބުނީ ހެލިކޮޕްޓަރު ވެއްޓެން މެދުވެރިވި ސަބަބު ދެނެގަތުމަށް ޓަކައި ޚާއްސަ ތަހުގީގެއް މިހާރު ފަށާފައިވާ ކަމަށާއި، މި ހާދިސާ ހިނގި ސީދާ ހާލަތު ދެނެގަތުމުގެ މަސައްކަތް ހުއްޓުމެއް ނެތި ކުރިއަށްދާ ކަމަށެވެ.
އިޓަލީވިލާތުގެ ބޮޑުވަޒީރު ޖޯރޖާ މެލޯނީ ވެސް ވަނީ މީސްމީޑިއާގައި ތަޢުޒިޔާގެ މެސެޖެއް ހިއްސާކުރައްވާފަ އެވެ. "އަޅުގަނޑުގެ ހެޔޮދުޢާތައް ވަނީ މި ހާދިސާގެ ޝިކާރައަކަށް ވި ފަރާތްތަކަށާއި، އެ ފަރާތްތަކުގެ ޢާއިލާތަކަށް. އަދި، މި ސަރަހައްދުގައި ސުލްހައާއި ހަމަޖެހުން ޤާއިމުކުރުމުގެ މިޝަންގައި ބައިވެރިވެ، މި ހިތްދަތި ވަގުތުތައް ތަހައްމަލުކުރަމުންދާ އެންމެހައި ފަރާތްތަކާ އެކުގައި،" މެލޯނީ ވިދާޅުވި އެވެ.
މަސްދަރު: ރޮއިޓަރސް
