ދިރިއުޅުމުގެ ޚަރަދުތައް ބޮޑުވުމާ ގުޅިގެން ކުރާ މުޒާހަރާތައް ހުއްޓުވަން އިޓަލީވިލާތުން ސިފައިން ނެރެނީ

ދިރިއުޅުމުގެ ޚަރަދުތައް އިންތިހާއަށް އުފުލުމާ ގުޅިގެން އިޓަލީވިލާތުގެ އުތުރުގައި ފެށި، އަދި ފާއިތުވި ހަފުތާ ބަންދުގައި ބައެއް ފަހަރު ހަމަނުޖެހުންތަކަކަށް ބަދަލުވި މުޒާހަރާތައް ކޮންޓްރޯލްކުރުމަށް ޓަކައި ސިފައިން ނެރުމަށާއި ހަރުކަށި ފިޔަވަޅުތަކެއް އެޅުމަށް އެ ޤައުމުން ފާސްކޮށްފި އެވެ.

އަންގާރަ ދުވަހު އިޓަލީވިލާތުގެ ކެބިނެޓުން ވަނީ މިލާނަށް 500 ސިފައިން ފޮނުވުމަށާއި، މުޒާހަރާތަކުގައި އަނިޔާވެރި އަމަލުތައް ހިންގުމަކީ އާ ޖިނާއީ ކުށެއްގެ ގޮތުގައި ކަނޑައެޅުމަށް ފާސްކޮށްފަ އެވެ. އަދި، ހަމަނުޖެހުން އުފައްދާ ފަރާތްތަކަށް ދޭ އަދަބުތައް ހަރުކަށިކުރުމުގެ އިތުރުން، ތަންތަނަށް ގެއްލުންދިނުމާއި ލޫޓުވުމުގައި ބައިވެރިވާ ކުޑަކުދިންގެ މައިންބަފައިން މާލީ ގޮތުން ޒިންމާދާރުކުރުވުމަށް ވެސް ވަނީ ނިންމާފަ އެވެ.

Advertisement

އަސްކަރިއްޔާ ނެރެނީ މުހިންމު ތަންތަނުގެ ސަލާމަތީ ކަންކަން ވަރުގަދަކުރުމަށާއި، ނާޒުކު ސަރަހައްދުތައް ބެލެހެއްޓުން އިތުރުކުރުމުގެ އިތުރުން މޮނިޓަރުކުރުން ހަރުދަނާކުރުމަށް އެހީތެރިވުމަށް ކަމަށް އިޓަލީވިލާތުގެ ދިފާޢީ ވުޒާރާއިން ބުންޏެވެ.

މާލީ މައި މަރުކަޒު ކަމަށްވާ މިލާން ހިމެނޭހެން އިޓަލީވިލާތުގެ އުތުރުގެ ސިޓީތަކަށް ފާއިތުވި ހަފުތާ ބަންދުގައި ހަމަނުޖެހުންތައް ވަނީ ފެތުރިގެން ގޮސްފަ އެވެ. މި ހަމަނުޖެހުންތަކުގައި މައިގަނޑު ގޮތެއްގައި ޒުވާނުން ހިމެނޭ ގްރޫޕުތަކުން ފިހާރަތައް ލޫޓުވައި، ބިއްލޫރިގަނޑުތައް ތަޅައި، ފުލުހުންނާ ކުރިމަތިލުންތައް ހިންގި އެވެ. މި މުޒާހަރާތައް އުފެދިގެން ދިޔައީ ތެލާއި ހަކަތައިގެ އަގު އިންތިހާއަށް އުފުލުމާއި، ކުލި ބޮޑުވުމާއި، އުޖޫރަ ކުޑަވުމުގެ އިތުރުން އާންމު ޚިދުމަތްތަކުގެ ފެންވަރު ދަށްވުމާ ގުޅިގެން އުފެދުނު ނުރުހުމުގެ ސަބަބުންނެވެ.

އާންމު ރައްކާތެރިކަން

ވަގުތުން އަމަލުކުރަން ފެށުމަށް ހަމަޖެހިފައިވާ އާ ގަވާއިދުގެ ފިޔަވަޅުތަކުގެ ދަށުން، މުޒާހަރާތަކުގެ ތެރޭގައި މަދުވެގެން ފަސް މީހުން ހިމެނޭ ގްރޫޕެއްގައި ބައިވެރިވެ އާންމު ސަލާމަތަށް ނުރައްކާކުރާ ކޮންމެ މީހަކަށް ފަސް އަހަރާ ހަމައަށް ޖަލު ހުކުމެއް އަދި އެންމެ ބޮޑުވެގެން 20،000 ޔޫރޯއިން (ގާތްގަނޑަށް 22،460 އެމެރިކާ ޑޮލަރު) ޖޫރިމަނާ ކުރެވޭނެ އެވެ.

މޫނު ނިވާކޮށްގެން ތިބޭނަމަ ނުވަތަ މީހުންނަށް ޒަޚަމު ވާނަމަ އަދަބުތައް އިތުރަށް ބޮޑުވާނެ އެވެ. އަދި، ލިބޭ ކޮންމެ ގެއްލުމަކަށް ވަގުތުން ބަދަލު ދިނުމަށް އެންގުމުގެ ބާރު ކަމާބެހޭ ފަރާތްތަކަށް ލިބިގެންވާއިރު، ކުޑަކުދިންގެ ފަރާތުން ލިބޭ ގެއްލުންތަކަށް އެ ކުދިންގެ މައިންބަފައިން ޒިންމާދާރު ކުރެވޭނެ އެވެ.

ކުރިން ހަމައެކަނި ބޮޑެތި މީހުންނަށް އޮތް ބާރުތައް ފުޅާކޮށް، އުމުރުން 14 އަހަރާއި 17 އަހަރާ ދެމެދުގެ ކުދިން ނުރައްކަލެއް ކުރިމަތިކޮށްފާނެ ކަމުގެ ހެކި ހުރެއްޖެ ނަމަ، އެ ކުދިން ކުށެއް ނުކުރި ނަމަވެސް ބަންދުކުރުމުގެ ހުއްދަ ފުލުހުންނަށް ލިބޭނެ އެވެ.

ނަމަވެސް، ރައީސް ސަރްޖޯ މައްތަރެއްލާ ދެކޮޅު ހެއްދެވުމާ ގުޅިގެން، ކުރިން އުންމީދުކުރެވުނު ފަދައިން ސިފައިންނަށް ފުލުހުންގެ ބާރުތައް ދިނުމަށް ކެބިނެޓުން ފާސްކޮށްފައި ނުވާ ކަމަށް އިޓަލީވިލާތުގެ މީޑިއާތަކުން ރިޕޯޓުކޮށްފައިވެ އެވެ. "ތަކެއްޗަށް ގެއްލުންދިނުމާއި ވައްކަން ކުރުމަކީ އިހުތިޖާޖު ކުރުމެއް ނޫން. އެއީ ކުށެއް. އަދި، ދައުލަތުގެ ރައްދު ވާންޖެހޭނީ ހަރުދަނާ ރައްދަކަށް،" ކެބިނެޓް ބައްދަލުވުމަށްފަހު ބޮޑުވަޒީރު ޖޯޖިޔާ މެލޯނީ ވިދާޅުވި އެވެ.

އެކި ސަރަހައްދުތަކަށް މުޒާހަރާތައް ފެތުރެނީ

އިޓަލީވިލާތުގެ އުތުރުގެ މި ހަމަނުޖެހުންތައް ގުޅިފައި ވަނީ އަވައްޓެރި ފަރަންސޭސިވިލާތުގައި ހިނގަމުންދާ ހަމަނުޖެހުންތަކާ އެވެ. ފަރަންސޭސިވިލާތުގައި ފާއިތުވި އެތައް އަހަރުތަކުގެ ތެރޭގައި ހިނގި އެންމެ ވަރުގަދަ ހަމަނުޖެހުންތަކުގެ ތެރޭގައި ހިމެނޭ ގޮތަށް، ހޮނިހިރު ދުވަހު އެތައް ސަތޭކަ ހާސް ބަޔަކު ވަނީ މަގުތަކަށް ނުކުމެފަ އެވެ.

މިއާއެކު، އިޓަލީވިލާތުގެ ދެކުނުގައި ކުރިއަށްދާ ވަކި މުޒާހަރާތަކެއްގެ ސަބަބުން ވެސް މެލޯނީގެ ސަރުކާރަށް ދަނީ ފިއްތުންތައް ކުރިމަތިވަމުންނެވެ. އެ ސަރަހައްދުގައި ޑީސަލްގެ އަގު އުފުލުމާއި ދިރިއުޅުމުގެ ޚަރަދުތައް ބޮޑުވުމުގެ ސަބަބުން ނުރުހުން ފާޅުކުރަމުންދާ ލޮރީ ޑްރައިވަރުން ވަނީ މަގުތައް ބަންދުކޮށް، މުދާ އުފުލުމުގެ ނިޒާމަށް ބުރޫއަރުވާލައިފަ އެވެ.

ތަކެތީގެ އަގުތައް އުފުލެމުންދިއުމުގެ ސަބަބުން އާއިލާތައް ފަގީރުކަމުގެ ތެރެއަށް ވެއްޓެމުންދާ ކަމަށާއި، މިއީ 2027 ވަނަ އަހަރުގެ ބަރުލަމާނީ އިންތިޚާބާ ކުރިމަތިލާއިރު މެލޯނީއަށް އޮތް ބޮޑު ކަންބޮޑުވުމެއް ކަމަށް އުތުރާއި ދެކުނުގެ މުޒާހަރާގެ ބައިވެރިން ބުނެ އެވެ.