އިޓަލީވިލާތުގެ ނޭޕަލްސްގެ ފުލެޓެއްގައި ފޮރުވާފައިހުރި 3.2 މިލިއަން ޔޫރޯ ފެނިއްޖެ
26 ސެޕްޓެމްބަރު 2026 | ހޮނިހިރު 07:10އިޓަލީގެ ނޭޕަލްސްގައި މާފިއާއާ ދެކޮޅަށް ހިންގި ޚާއްސަ އޮޕަރޭޝަނެއްގައި، ގޭންގަކަށް ނިސްބަތްވާ 34 މީހަކު ހައްޔަރުކޮށް ގިނަ އަދަދެއްގެ ހަތިޔާރާއި މަސްތުވާތަކެތި އަތުލައިގަނެފި. މި ރޭޑުގައި ފެނުނު 3.2 މިލިއަން ޔޫރޯއަކީ ފޯނު ކޯލްތައް އަޑުއަހައިގެން ހޯދި މައުލޫމާތަށް ބިނާކޮށް އަތުލައިގަތް ފައިސާ ކަމަށްވާއިރު، މި ފައިސާ ޖަމާކުރުމަށް ހަމަޖެހިފައިވަނީ ކުށްތަކުގެ ޝިކާރައަކަށްވާ ފަރާތްތަކަށް އެހީވާ ފަންޑަށް
އިޓަލީވިލާތުގެ ފުލެޓެއްގެ ފާރުތަކާއި ފަރުނީޗަރުތަކުގެ ތެރޭގައި ފޮރުވާފައި ހުރި ކަމަށް ބުނާ 3.2 މިލިޔަން ޔޫރޯގެ ނަގުދު ފައިސާ ފުލުހުންގެ ބެލުމުގެ ދަށަށް ގެންދާ މަންޒަރު | އެކްސް
އިޓަލީވިލާތުގެ ނޭޕަލްސްގައި ހުންނަ ފުލެޓެއްގެ ފާރުތަކާއި ތަޅުންގަނޑުގެ އިތުރުން ފަރުނީޗަރުގެ ތެރޭގައި ފޮރުވާފައި ހުރި 3.2 މިލިއަން ޔޫރޯގެ (ގާތްގަނޑަކަށް 3.6 މިލިއަން އެމެރިކާ ޑޮލަރު) ނަގުދު ފައިސާ އެ ގައުމުގެ ކަމާބެހޭ އިދާރާތަކުން ހޯމަ ދުވަހު ހޯދައިފި އެވެ. ފަތިހުގެ ވަގުތެއްގައި ހިންގި މި ހާއްސަ ރޭޑުގައި 34 މީހަކު ވަނީ ހައްޔަރުކޮށްފަ އެވެ.
ކައިވާނޯގައި ހުންނަ އިމާރާތެއްގެ ފުލެޓަކުން މި ފައިސާތައް ފެނިފައި ވަނީ 50 ޔޫރޯގެ ނޫޓު ބޮނޑިތަކެއްގެ ގޮތުގައި ކަމަށް، ނޭޕަލްސްގެ ކަރަބިނިއޭރީ މިލިޓަރީ ފުލުހުން ބުންޏެވެ. މި ފައިސާތައް ހޯދާފައި ވަނީ މާފިއާއާ ދެކޮޅަށް މަސައްކަތްކުރާ ތަންފީޒީ އިދާރާތަކުގެ އޮފިޝަލުން ކަމަށް ވެސް އެ ބަޔާނުގައިވެ އެވެ.
ސެލޯފޭން އޮޅައި، ތަޅުމާއި ފާރުގެ ތެރެއާއި އަލަމާރިތަކުގެ ސިއްރު ވަތްގަނޑުތަކުގައި ތަރުތީބުން އަތުރާފައި ހުރި މި ފައިސާ ނޫޓުތައް އިމާރާތުން ނެރެފައި ވަނީ ބާލިދީތަކެއްގަ އެވެ. އަދި، އެ ފައިސާތައް ވަގުތުން ވަނީ ފުލުހުންގެ ހާއްސަ ވެހިކަލަކަށް އަރުވާފަ އެވެ. މި އޮޕަރޭޝަނުގައި ފައިސާގެ އިތުރުން ރޮލެކްސް މަރުކާގެ އަގުބޮޑު 11 ގަޑިއާއި، ހަތިޔާރު އަދި މަސްތުވާތަކެތި ވިއްކުމަށް ބޭނުންކުރާ ސާމާނު ފެނިފައިވާ ކަމަށް ވެސް ހޯމަ ދުވަހު ބޭއްވި ނޫސްވެރިންގެ ބައްދަލުވުމެއްގައި އޮފިޝަލުން ވިދާޅުވި އެވެ.
ފައިސާ ފެނުނު ގޮތާއި ހިންގި ރޭޑު
މި ރޭޑަކީ ނޭޕަލްސްގެ އެންޓި-މާފިއާ ޕްރޮސެކިއުޓަރު ނިކޮލާ ގްރައްތޭރީ އިސްވެ ހުންނަވައިގެން އެތައް މަހެއް ވަންދެން ހިންގެވި ސްޓިންގ އޮޕަރޭޝަނެއްގެ ބައެއް ކަމަށް އޮފިޝަލުން ވިދާޅުވި އެވެ. ޖަލުގައި ތިބި މާފިއާ ގޭންގުތަކުގެ މެންބަރުންގެ އާއިލާތަކުން ސިއްރިއްޔާތުގައި ޖަލަށް ވައްދައިދީފައިވާ ފޯނުތަކުގެ އަޑުއެހުންތައް ކަމާބެހޭ ފަރާތްތަކުން އަޑުއަހާފައިވާ ކަމަށް ގްރައްތޭރީ ހޯމަ ދުވަހު ވިދާޅުވި އެވެ.
"މި އޮޕަރޭޝަންގެ މުހިންމުކަން ހާމަކޮށްދިނުމުގެ ގޮތުން ދަންނަވާ ނަމަ، ހަމައެކަނި އެންމެ ގެއަކުން ވެސް 3.2 މިލިއަން ޔޫރޯގެ ނަގުދު ފައިސާއާއި އަގުބޮޑު ގަޑިތަކެއް ވަނީ އަތުލައިގަނެވިފައި،“ ހޯމަ ދުވަހު ނޭޕަލްސްގައި ނޫސްވެރިންނާ ވާހަކަފުޅު ދައްކަވަމުން އޭނާ ވިދާޅުވި އެވެ. މި މައުލޫމާތު ކަމާބެހޭ އިދާރާތަކަށް ލިބުނީ ހިމާޔަތް ހޯދުމުގެ ބަދަލުގައި ޕްރޮސެކިއުޓަރުންނަށް ހެކިބަސް ދިން ޖާސޫސުންގެ ފަރާތުން ކަމަށް އޮފިޝަލުން ބުނެފައިވެ އެވެ.
ހައްޔަރުކުރި މީހުންނަކީ ކުށްކުރާ 'އެންޖެލީނޯ ކްލޭން' ގެ ނަންކިޔާ ގޭންގަށް ނިސްބަތްވާ މީހުން ކަމަށް ތުހުމަތުކުރެވޭ ކަމަށާއި، މި ގޭންގުގެ ނުފޫޒު ކައިވާނޯގެ ތެރެއަށް ވަދެފައިވާ މިންވަރުން މިދިޔަ އަހަރު އެ ސަރަހައްދުގެ ލޯކަލް ސަރުކާރު ސަސްޕެންޑުކުރި ހާދިސާއިން ހާމަވެގެން ގޮސްފައިވާ ކަމަށް ގްރައްތޭރީ ވިދާޅުވި އެވެ.
'ކައިވާނޯ މޮޑެލް' އާއި ސިޔާސީ ޚިޔާލުތަފާތުވުންތައް
ބޮޑުވަޒީރު ޖޯޖިއާ މެލޯނީގެ ސަރުކާރުން ވަނީ ސިޓީތައް އާރާސްތުކުރުމާއި ކުށް މަދުކުރުމަށް އަމާޒުކޮށް 'ކައިވާނޯ މޮޑެލް' ގެ ނަމުގައި ހާއްސަ މަޝްރޫއެއް 2023 ވަނަ އަހަރު ތައާރަފުކޮށްފަ އެވެ. "ކައިވާނޯ ގަރާރުގެ ބޭނުމަކީ ކައިވާނޯއަށް ވަގުތުން ތަންފީޒުކުރެވޭނެ އަދި ހާލަތު ތަންދޭ މިންވަރަކުން ގައުމުގެ އެހެން ނިކަމެތި ސަރަހައްދުތަކަށް ވެސް ފުޅާކުރެވޭނެ ފަދަ ފިޔަވަޅު އެޅުމުގެ މޮޑެލެއް ކަނޑައެޅުން،“ 2023 ސެޕްޓެންބަރުގައި ބޭއްވި ނޫސްވެރިންގެ ބައްދަލުވުމެއްގައި ކެބިނެޓް ސެކްރެޓަރީ އަލްފްރެޑޯ މަންތޮވާނޯ ވިދާޅުވި އެވެ.
"މިއީ ހަމައެކަނި ޒުވާނުންގެ ކުށްތަކުގެ ނުރައްކަލަށް ވިސްނައިގެން އެކުލަވާލާފައިވާ މޮޑިއުލެއް ނޫން. މިއީ، މަގުމަތީގެ ނުރައްކާތަކާއި މަސްތުވާތަކެތީގެ ވިޔަފާރިއަށް ދާން އޮތް ފުރުސަތުގެ ބަދަލުގައި، އެދެވޭ އަދި އީޖާބީ ގޮތްތަކެއް ހުށަހަޅައިދޭ ކަމެއް،“ މަންތޮވާނޯ ވިދާޅުވި އެވެ.
ހޯމަ ދުވަހުގެ އޮޮޕަރޭޝަނާ ގުޅިގެން، އިދިކޮޅު ޕާޓީތަކުގެ ބައެއް މެންބަރުން ވަނީ މި ރޭޑަކީ ސަރުކާރުގެ އެ އިސްނެގުން ފޭލުވެފައިވާ ކަމުގެ ހެއްކެއް ކަމަށް ފާހަގަކުރައްވާފަ އެވެ. ގްރީންސް އެންޑް ލެފްޓް އެލަޔަންސްގެ އިދިކޮޅު މެންބަރު ފްރެންޗެސްކޯ ބޮރެއްލީ ވިދާޅުވީ، "އަޅުގަނޑުމެންނަށް މަސްތަކެއް ވަންދެން ފެނިގެންދިޔައީ ބޮޑުވަޒީރާއި އެކަމަނާގެ ވަޒީރުން ދެއްކުންތެރިކަމާއެކު ވަޑައިގެން، 'ސާފުކުރުން' ކުރިއަށް ގެންދާ ކަމަށް ވިދާޅުވަމުން ގެންދެވި މަންޒަރު. އަޅުގަނޑުމެން ދެކޭގޮތުގައި އެ ކަން ސިފަކޮށްފައި ވަނީ ރާވާފައިވާ ކުށްތަކުގެ މައްޗަށް ހޯދުނު ފުރިހަމަ ކާމިޔާބީއެއްގެ ގޮތުގައި. ނަމަވެސް، މި ތަހުގީގުން ފެންމަތިވި ހަގީގަތް މާ ތަފާތު.“
ކުށުގެ ވިއުގައާއި އަތުލައިގަތް ފައިސާ ބޭނުންކުރާނެ ގޮތް
ހައްޔަރުކުރި 34 މީހުންގެ މައްޗަށް ކުރަނީ މާފިއާ އުސޫލުން ކުށްކުރާ ޖަމާއަތެއް ހެދުމާއި، މަސްތުވާތަކެތީގެ ވިޔަފާރިކުރުމާއި، ބިރުދައްކައިގެން ފައިސާ ހޯދުމުގެ އިތުރުން ވިޔަފާރިކުރުމުގެ ބޭނުމުގައި މަސްތުވާތަކެތި ގެންގުޅުމުގެ ތުހުމަތު ކަމަށް ކަރަބިނިއޭރީގެ ބަޔާނުގައި ބުނެފައިވެ އެވެ.
ފައިސާއާއި ބަޑިއާއި ގަޑިތަކުގެ އިތުރުން، މި ކުށުގެ ވިއުގަ މަސައްކަތްކުރަމުން ދިޔަ ގޮތް ހޯދިފައިވާ ކަމަށް ކަމާބެހޭ އިދާރާތަކުން ބުނެފައިވެ އެވެ. މި ގޮތުން، މަސްތުވާތަކެތި ވިއްކުމާއި ބިރުދައްކައިގެން ފައިސާ ހޯދުން ފަދަ ޣައިރުގާނޫނީ ހަރަކާތްތައް ހިންގުމަށް ވަކިވަކި ޝިފްޓުތަކަކަށް މީހުން ބަހައިގެން އެ ގުރޫޕުން މަސައްކަތްކޮށްފައިވާ ކަމަށް ގްރައްތޭރީ ވިދާޅުވި އެވެ. އޭނާ ސިފަކުރެއްވި ގޮތުގައި އެ ގުރޫޕުގެ އޮޕަރޭޝަންތައް ކުރިއަށް ގެންގޮސްފައި ވަނީ "ވިޔަފާރި އުސޫލުން" ނެވެ.
އަތުލައިގަތް ފައިސާ ޖަމާކުރާނީ ރޭވިގެން ހިންގާ ކުށްތަކުގެ ޝިކާރައަކަށްވާ ފަރާތްތަކަށް އެހީތެރިކަން ފޯރުކޮށްދޭ އިޓަލީގެ 'ޖަސްޓިސް ފަންޑު' އަށް ކަމަށް ކަމާބެހޭ ފަރާތްތަކުން ބުނެ އެވެ. ނަމަވެސް، ފާއިތުވި މަސްތަކުގައި ސަރުކާރުން ބަޖެޓު އުނިކުރުމާ ކުރިމަތިލާންޖެހިފައިވާ ޑިޕާޓްމަންޓުގެ ވެރިޔާ ގްރައްތޭރީ ވަނީ ސަމާސާ ކުރައްވަމުން، އޭގެ ތެރެއިން ބައެއް ފައިސާ ކުރިއަށް އޮތް ތަނުގައި ފޯނު އަޑުއެހުމުގެ އޮޕަރޭޝަންތަކަށް ހަރަދުކުރަން ދޭންޖެހޭ ކަމަށް ވިދާޅުވެފަ އެވެ.
"ޚަރަދު ކުޑަކުރުމަށް ޓަކައި ފޯނު އަޑުއެހުންތައް މަދުކުރަން ވަޒީރު ބޭނުންފުޅުވާ ހާލަތާމެދު އަޅުގަނޑު ވިސްނަން. އެކަމަކު ހަމައެކަނި މިއަދު ފެނުނު، ސީދާ ޖަސްޓިސް ފަންޑަށް ޖަމާވާނެ 3.2 މިލިއަން ޔޫރޯއިން ވެސް ނޭޕަލްސްގައި އެއް އަހަރު ދުވަހު ފޯނު އަޑުއެހުމަށް ހިނގާނެ ހަރަދު އެ ވަނީ ހަމަޖެހިފައި. އަދި، މި ފަދަ އެތައް އޮޕަރޭޝަނެއް އަޅުގަނޑުމެން ހިންގަން އެބަޖެހޭ،“ އޭނާ ވިދާޅުވި އެވެ.
މަސްދަރު: ސީއެންއެން
