"ހަނގުރާމައެއް ފެށިއްޖެނަމަ މޮޅުވާނެ ބަޔަކު ނުތިބޭނެ": ވިލާތަށް ޕުޓިންގެ ސީދާ އިންޒާރެއް!
30 އޮކްޓޯބަރު 2026 | ހުކުރު 08:52ވިލާތުގެ ޤައުމުތަކާއެކު ގުޅުން ބަދަހިކުރުމަށް އެޅޭ ކޮންމެ ފިޔަވަޅަކަށް މަރުހަބާ ކިޔާނެ ކަމަށާއި، ނަމަވެސް ކުރިމަތިވެދާނެ ކޮންމެ ހާލަތަކަށް ރަޝިއާ އޮތީ ތައްޔާރަށް ކަމަށް ރައީސް ވްލަޑިމިއަރ ޕުޓިން ވިދާޅުވެއްޖެ. ހަނގުރާމައެއް ފެށިއްޖެނަމަ އެއްވެސް ބަޔަކަށް ކާމިޔާބެއް ނުލިބޭނެކަމުގެ އިންޒާރު ދެއްވަމުން، ބޯލްޓިކް ކަނޑުގެ ދަތުރުފަތުރަށް ހުރަސްއެޅޭ ފަދަ ކަންކަން ނުކުރުމަށް ވެސް ޕުޓިން ވަނީ ގޮވާލައްވާފައި
ރަޝިއާގެ ރައީސް ވްލަޑިމިއަރ ޕުޓިން ބައްދަލުވުމެއްގައި ވާހަކަފުޅު ދައްކަވަނީ | ރޮއިޓަރސް
ވިލާތުގެ ޤައުމުތަކާއެކު ގުޅުން އަލުން ބަދަހިކުރުމަށް އެޅޭ ކޮންމެ ފިޔަވަޅަކަށް ރަޝިއާއިން ފުރިހަމައަށް މަރުހަބާ ކިޔާނެ ކަމަށާއި، ނަމަވެސް އެ ސަރަހައްދުގައި އެއްވެސް ކަހަލަ ހަނގުރާމައެއް ފެށިއްޖެނަމަ އެއީ އެއްވެސް ބަޔަކު މޮޅުވާނެ ހާލަތެއް ނޫން ކަމަށް ރަޝިއާގެ ރައީސް ވްލަޑިމިއަރ ޕުޓިން ބުރާސްފަތި ދުވަހުގެ ރޭ ވިދާޅުވެއްޖެ އެވެ.
އެފްރިކާގެ ޤައުމުތަކުގެ ލީޑަރުންނާއެކު ބޭއްވެވި ސަމިޓަކަށްފަހު ނޫސްވެރިންނާ ވާހަކަފުޅު ދައްކަވަމުން ޕުޓިން ވިދާޅުވީ، ވިލާތާއެކު ހަނގުރާމައަކަށް ދާން ރަޝިއާ ބޭނުން ނުވި ނަމަވެސް، ކުރިމަތިވެދާނެ ކޮންމެ ހާލަތަކަށް ވެސް އެ ޤައުމު އޮތީ ފުރިހަމައަށް ތައްޔާރަށް ކަމަށެވެ.
މި ހަފުތާގެ ކުރީކޮޅު ނޯވޭގެ ބޮޑުވަޒީރު ޔޫނަސް ގާރ ސްޓޯރަ އަދި ފިންލެންޑުގެ ރައީސް އަލެކްސަންޑާ ސްޓުބް، ޕުޓިންއަށް ފޯނުން ގުޅުއްވައި މަޝްވަރާ ކުރެއްވި މައްސަލައަށް އަލިއަޅުއްވާލައްވަމުން އެ ދެ ލީޑަރުން ނިންމެވި ނިންމެވުމަކީ ރަނގަޅު ނިންމެވުމެއްގެ ގޮތުގައި ޕުޓިން ސިފަކުރެއްވި އެވެ. މޮސްކޯއާ ގުޅުން އުފެއްދުމަކީ ވިލާތުގެ އެއްބައިވަންތަކަން ގެއްލޭ ކަމެއް ކަމަށް ބުނެ ވިލާތުގެ ބައެއް ޤައުމުތަކުން އެ ދެ ބޭފުޅުންނަށް ފާޑުކިޔުން އަމާޒުކުރި ނަމަވެސް، ޕުޓިން ފާހަގަކުރެއްވީ އެއީ ރަނގަޅު އިސްނެންގެވުމެއް ކަމަށެވެ.
"ވިލާތުގެ ޤައުމުތަކާއެކު ފުރިހަމަ އަދި ވަށާޖެހޭ ގުޅުމެއް އަލުން ގާއިމުކުރުމަށް އަމާޒުކޮށް އެޅޭ ކޮންމެ ފިޔަވަޅަކަށް، ކޮންމެ ހަރަކާތަކަށް އަޅުގަނޑުމެން ތާއީދުކުރަން،" ޕުޓިން ވިދާޅުވި އެވެ.
ހަމަމިއާއެކު، ހަނގުރާމައެއްގެ ނުރައްކަލާ ގުޅޭގޮތުން ވާހަކަފުޅު ދައްކަވަމުން ޕުޓިން ވަނީ ހުޅަނގަށް ހަރުކަށި އިންޒާރެއް ދެއްވާފަ އެވެ. "އެންމެ ފުރަތަމަ ކަމަކަށް އަޅުގަނޑުމެން މި ތިބީ ތައްޔާރަށް. އެކަމަކު އަޅުގަނޑުމެން ވިލާތާއެކު ހަނގުރާމައެއް ބޭނުމެއް ނޫން. އަދި، އެއްވެސް ބަޔަކު އެ ކަން ބޭނުންވާނަމަ، އެ ބަޔަކު ތައްޔާރުވާންވީ. އެކަމަކު މިހާތަނަށް ވެސް ރަޝިއާގެ މައްޗަށް އިސްތިރާޖީ ބަލިކަށިކަމެއް ގެނައުމުގެ ލަނޑުދަނޑި އެ މީހުންނަކަށް ހާސިލެއް ނުކުރެވުނު. އަދި، ކަންކަން މާ މައްޗަށް ގޯސްވެއްޖެ ނަމަ، އެއްވެސް ބަޔަކު މޮޅެއް ނުވާނެ. އެ ކަން އެއްވެސް ބަޔަކު ހަނދާން ނައްތާލައިގެން ނުވާނެ،" ޕުޓިން ވިދާޅުވި އެވެ.
މި ވާހަކަފުޅުގައި ބޯލްޓިކް ކަނޑުގެ ސަރަހައްދުގައި ދަތުރުފަތުރު ކުރުމަށް އެއްވެސް ހުރަހެއް އެޅެން ރަޝިއާ ބޭނުން ނުވާކަން ފާހަގަކުރައްވައި ޕުޓިން ވިދާޅުވީ، މުއާސަލާތީ މަގުތައް ހަނިކުރުމަކީ، ފެބުރުވަރީ މަހު އެމެރިކާއާއި އީރާނާ ދެމެދު ފެށުނު ހަމަނުޖެހުންތަކާ ގުޅިގެން ހުރްމުޒް ކަނޑުއޮޅީގައި އުފެދިފައިވާ ނުރައްކާތެރި ހާލަތާ އެއްފަދަ ހާލަތެއް ބޯލްޓިކް ކަނޑުގައި ވެސް އުފެދިދާނެ ކަމެއް ކަމަށެވެ.
"ގަލްފުގެ ސަރަހައްދުގައި ނުވަތަ ހުރްމުޒް ކަނޑުއޮޅީގައި އޮތްފަދަ ހާލަތެއް ބޯލްޓިކް ކަނޑުގައި އުފެދެން އެދެނީ ކާކު؟ އަޅުގަނޑަކަށް ނޭނގޭ. އަޅުގަނޑުމެން އެ ފަދަ ކަމެއް ބޭނުމެއް ނޫން. އެކަމަކު ކުރިމަތިވާ ކޮންމެ ގޮންޖެހުމަކަށް އަޅުގަނޑުމެން ރައްދު ދޭނަން،" ޕުޓިން ވިދާޅުވި އެވެ.
މަސްދަރު: ރޮއިޓަރސް
