އިޓަލީވިލާތުގެ ފިހާރަތަކުން ކާބޯތަކެތި ހުސްވެ، މަގުތައް ތަޅުއެޅުވި ވަރުގަދަ މުޒާހަރާ ކޮންޓްރޯލުން ނެއްޓެނީ!
22 އޮކްޓޯބަރު 2026 | ބުރާސްފަތި 09:10ތެލުގެ އަގުބޮޑުވުމާ ގުޅިގެން އިޓަލީގެ ލޮރީ ޑްރައިވަރުންނާއި ދަނޑުވެރިން ކުރަމުންދާ މުޒާހަރާތަކުގެ ސަބަބުން ދަތުރުފަތުރަށާއި މުދާ އުފުލުމަށް ބޮޑެތި ހުރަސްތަކެއް ކުރިމަތިވެއްޖެ. މި މައްސަލައަށް ހައްލެއް ހޯދުމަށް ސަރުކާރުން އެހީގެ ޕެކޭޖެއް ތައާރަފުކުރަން ނިންމާފައިވާއިރު، މުޒާހަރާގެ ސަބަބުން ޒަރޫރީ ޚިދުމަތްތަކަށް ބުރޫއަރާތީ ގާނޫނީ ފިޔަވަޅު އަޅާނެ ކަމުގެ އިންޒާރު ވެސް ވަނީ ދީފައި
އިޓަލީވިލާތުގެ ނަޕޯލީގެ ސުޕަރމާކެޓެއްގައި ހުރި މުދާ ހުސްވެފައިވާ ރެކުތަކެއް ކައިރިން ވިޔަފާރިކުރާ މީހަކު ހިނގާފައި ދަނީ | ރޮއިޓަރސް
ތެލުގެ އަގު އުފުލުމާއި ދިރިއުޅުމުގެ ޚަރަދުތައް ބޮޑުވަމުންދާތީ، އިޓަލީވިލާތުގެ ލޮރީ ދުއްވާ ޑްރައިވަރުން ކުރަމުންދާ މުޒާހަރާތަކާ ގުޅިގެން މުދާ އުފުލުމަށް ބުރޫއަރައި، ތާޒާ ކާބޯތަކެތި ހަލާކުވަމުންދާތީ ފިހާރަތަކުން ކާބޯތަކެތި ލިބުމުގައި ދަތިތައް ކުރިމަތިވަމުންދާ ކަމަށް ވިޔަފާރިވެރިން ބުދަ ދުވަހު ބުނެފި އެވެ.
މިދިޔަ ހަފުތާގައި އިޓަލީވިލާތުގެ ދެކުނުގައި ފެށުނު މި މުޒާހަރާތަކުގެ ސަބަބުން، މަތިންދާބޯޓުތަކަށް ބޭނުންވާ ތެޔޮ ނުލިބި، ކަލާބްރިޔާ ސަރަހައްދުގެ ދެ އެއާޕޯޓެއްގެ އޮޕަރޭޝަންތަކަށް ވަނީ ހުރަސްއެޅިފަ އެވެ. ޤައުމުގެ އެކި ހިސާބުތަކުގައި ޓްރެފިކް ތޮއްޖެހިފައިވާއިރު، ޑްރައިވަރުން ދަތުރުފަތުރު ކުރުމަށް ހުރަސްއެޅުމާ ގުޅިގެން ދެކުނުގެ ރަށެއް ކަމަށްވާ ނާޕޮލީ ކައިރީގައި އޮންނަ އޭ1 މޮޓޯވޭގައި ވަނީ ދިގު ކިޔޫތައް ހެދިފަ އެވެ. އަދި، މި މުޒާހަރާތައް ފުޅާވެ، ދަނޑުވެރިން ވެސް މި ހަރަކާތާ ގުޅުމާއެކު، އިރުއުތުރުގެ ރަށެއް ކަމަށްވާ ރަވެންނާގެ މައި މައިޒާނަށް ލޮރީތަކާއި ޓްރެކްޓަރުތައް ވަނީ ވަދެފަ އެވެ.
މޭވާއާއި ތަރުކާރީގެ އިތުރުން ކިރާއި މަސް ފަދަ އަވަހަށް ހަލާކުވާ ބާވަތްތައް ގިނަ އަދަދަކަށް ލޮރީތަކުގައާއި ގުދަންތަކުގައި ތާށިވެފައިވާ ކަމަށް، ކޯނަޑް ސުޕަމާކެޓް ބްރޭންޑްގެ ދަށުން ހިންގާ ވިޔަފާރިވެރިން ތަމްސީލުކުރާ އޭއެންސީޑީ-ކޯނަޑް ގްރޫޕުން ބުންޏެވެ.
"މުޒާހަރާ ކުރުމުގެ މިނިވަންކަމަކީ، ރައްޔިތުންނަށް ތާޒާ ކާބޯތަކެތި ލިބުމުގެ ހައްގަށް ހުރަސްއެޅުން ނުވަތަ އިޓަލީވިލާތުގެ ދަނޑުވެރިކަމާއި ކާބޯތަކެތީގެ ސަޕްލައި ޗޭނުން އުފައްދާ އަގު ނައްތާލުމަކަށް ބަދަލުވެގެން ނުވާނެ،" އެ ގްރޫޕްގެ ރައީސް މައުރިޓްސިޔޯ ޕެއްލިކޯނީ ވިދާޅުވި އެވެ.
ބުރާސްފަތި ދުވަހު ސަރުކާރުގެ ބައްދަލުވުމެއް ބާއްވަނީ
ލޮރީ ޑްރައިވަރުންނާއި ދަނޑުވެރިންނަށް އެހީތެރިކަން ފޯރުކޮށްދިނުމުގެ ޕެކޭޖެއް ފާސްކުރުމަށް ޓަކައި، ބޮޑުވަޒީރު ޖޯޖިޔާ މެލޯނީގެ ކެބިނެޓުން ބުރާސްފަތި ދުވަހު ބައްދަލުވުމެއް ބޭއްވުމަށް ހަމަޖެހިފައިވާ ކަމަށް، އޭނާގެ އޮފީހުން ނެރުނު ބަޔާނެއްގައި ބުންޏެވެ. ސަރުކާރުން ވަނީ ތެލުގެ އަގު އިންތިހާއަށް އުފުލުމާ ގުޅިގެން ކުރިމަތިވާ ދަތިތަކުން އަރައިގަތުމަށާއި، ބާ އުޅަނދުތަކުގެ ބަދަލުގައި ތިމާވެއްޓާ ރައްޓެހި މޮޑެލްތަކުގެ އުޅަނދު ހޯދުމަށް ލޮރީ ޑްރައިވަރުންނަށް އެހީތެރިވުމުގެ ގޮތުން މި އަހަރު ގާތްގަނޑަކަށް 1.1 ބިލިޔަން އެމެރިކާ ޑޮލަރު ކަނޑައަޅާފަ އެވެ.
މި މުޒާހަރާތަކުގެ ސަބަބުން ހަސްފަތާލުތަކަށް ބޭނުންވާ ސާމާނު ފޯރުކޮށްދިނުމަށް ވެސް ބުރޫއަރަމުންދާ ކަމަށް ވިދާޅުވެ، މުޒާހަރާތައް ވަގުތުން ހުއްޓާލުމަށް ބިނާރާ ބެހޭ ވަޒީރުގެ ނައިބު އެދުއަރްދޯ ރީޜީ ވަނީ ގޮވާލައްވާފަ އެވެ. އަދި، މުދާ އުފުލާ ފަރާތްތަކާ ދެކޮޅަށް ސަރުކާރުން ހަރުކަށި ފިޔަވަޅުތަކެއް އަޅަން ތައްޔާރަށް އޮތް ކަމުގެ އިންޒާރު ވެސް އޭނާ ދެއްވި އެވެ. "ކަނޑައެޅިގެން އެއްވެސް ފަރާތަކުން ގާނޫނާ ޚިލާފުވާނަމަ، ވަކި ހިސާބަކުން ގާނޫނު ތަންފީޒުކުރަން ޖެހޭނެ،" ނޫސްވެރިންނާ ވާހަކަފުޅު ދައްކަވަމުން އޭނާ ވިދާޅުވި އެވެ.
އިގުތިސާދީ ދަތިތަކާ ގުޅިގެން އިޓަލީވިލާތުގައި މަސްރަހު ގޯސްވަމުންދާއިރު، މިދިޔަ ހަފުތާ ބަންދުގައި މިލާނާއި އުތުރުގެ އެހެން ރަށްތަކުގައި ޒުވާނުން ހިމެނޭ ގޭންގުތަކަކުން ވަނީ ހަމަނުޖެހުން ހިންގައި ހަމަލާތައް ދީފަ އެވެ. މި ކަމާ ގުޅިގެން، ކުޑަކުދިންނާއި ހަގު އުމުރުތަކުގެ ކުށްވެރިންނަށް އަމާޒުކޮށްގެން ސަލާމަތީ އައު ގަރާރެއް ނެރެ، ސަރުކާރުން ވަނީ އަންގާރަ ދުވަހު ފިޔަވަޅު އަޅާފަ އެވެ.
މަސްދަރު: ރޮއިޓަރސް
