އިޓަލީގެ ސްކޫލްތަކުގައި މޫނު ނިވާކުރުން ދެން މަނާވާނެ، ބޭރު ދަރިވަރުންގެ އަދަދު ވެސް ކޮންޓްރޯލް ކުރަނީ
25 ސެޕްޓެމްބަރު 2026 | ހުކުރު 02:26އިޓަލީގެ ސްކޫލްތަކުގައި މޫނު ނިވާކުރުން މަނާކޮށް، އެ އުސޫލާ ހިލާފުވާ ބެލެނިވެރިން ބޮޑު އަދަދަކުން ޖޫރިމަނާކުރަން އެ ގައުމުގެ ސަރުކާރުން ވަނީ ނިންމާފައި. މުޖުތަމައާ ގުޅުން ބަދަހިކުރުމަށް އަޅާ މި ފިޔަވަޅުތަކުގެ ދަށުން، ބޭރުގެ ދަރިވަރުންގެ ނިސްބަތް ވަކި މިންވަރެއްގައި ހިފެހެއްޓުމަށާއި ބެލެނިވެރިންނަށް އިޓަލީ ބަސް ދަސްކޮށްދިނުމަށް ވެސް ވަނީ މަޖުބޫރުކޮށްފައި
ވިލާތުގެ ގައުމެއްގެ މަގުމަތިން ބުރުގާ އަޅައިގެން ތިބި އަންހެނުންތަކެއް ހިނގަނީ | އަނަދޮލު އޭޖެންސީ
އިޓަލީވިލާތުގެ ސްކޫލްތަކުގައި މޫނު ބުރުގާ (ނިގާބު) ހިމެނޭހެން މޫނު ނިވާކުރުން މަނާކުރުމަށާއި، ފުރަތަމަ އަހަރުގެ ކުލާސްތަކުގައި ވަކި ޝަރުތުތަކެއް ހަމަވާ ބޭރު ގައުމުތަކުގެ ދަރިވަރުންގެ ނިސްބަތް %30 އަށްވުރެ އިތުރުނުކޮށް ހިފެހެއްޓުމަށް އެ ގައުމުގެ ވަޒީރުންގެ މަޖިލީހުން ބުރާސްފަތި ދުވަހު ގަރާރެއް ފާސްކޮށްފި އެވެ. މި ކަން ފުރަތަމަ ރިޕޯޓުކޮށްފައި ވަނީ އެ ގައުމުގެ ގައުމީ ނޫސް އޭޖެންސީ ކަމަށްވާ އޭއެންއެސްއޭއިންނެވެ.
މި ގަރާރުގެ ދަށުން، ސިއްހީ ނުވަތަ ސަލާމަތީ ހާއްސަ ސަބަބަކާ ހުރެ މެނުވީ، ކާކުކަން ދެނެގަންނަން ހުރަސްއެޅޭ ގޮތަށް މޫނު ނިވާކޮށްގެން ސްކޫލުގެ ހަރަކާތްތަކުގައި، އަދި އިތުރު ހަރަކާތްތަކުގެ އިތުރުން ސްކޫލާއި އާއިލާތައް ގުޅިގެން ހިންގާ ހަރަކާތްތަކުގައި ބައިވެރިވުން މަނާވާނެ އެވެ. އަދި، މި އުސޫލާ ހިލާފުވާ ފަރާތްތައް 227 އެމެރިކާ ޑޮލަރާއި 1،137 ޑޮލަރާ ދެމެދުގެ އަދަދަކުން ޖޫރިމަނާ ކުރެވޭނެ އެވެ. މި ގަވާއިދުގެ ދަށުން، މި އުސޫލާ ޚިލާފުވަނީ ކުޑަކުއްޖަކު ކަމުގައިވާ ނަމަ، އަދަބު ލިބޭނީ އެ ކުއްޖެއްގެ ބެލެނިވެރިޔާއަށް ކަމަށް ބަޔާންކޮށްފައިވެ އެވެ.
އިޓަލީވިލާތު ސަރުކާރުން ބުނީ، މި ފިޔަވަޅުތަކުގެ ބޭނުމަކީ މުޖުތަމައާ ގުޅުން ބަދަހިކުރުން ކުރިއެރުވުން ކަމަށެވެ. އަދި، ބޮޑުވަޒީރު ޖޯޖިޔާ މެލޯނީ ސިފަކުރައްވާ ގޮތުގައި، މި ނިންމުމުގެ ސަބަބުން ކްލާސްރޫމްތަކުން "ގެޓޯ" ނުވަތަ ފަގީރު ސަރަހައްދުތަކެއްގެ ސިފަތައް ނައްތައިލެވޭނެ އެވެ.
މި ގަރާރުގެ ދަށުން، އިޓަލީވިލާތުގެ ރައްޔިތުކަން ނެތް ދަރިވަރުންގެ ތެރެއިން ވަކި ދަރިވަރުންތަކެއް ފުރަތަމަ އަހަރުގެ ކުލާސްތަކުގައި ހިމެނޭ މިންވަރު ގިނަވެގެން %30 ގައި ހިފެހެއްޓުމަށް ވެސް ވަނީ ހަމަޖައްސާފަ އެވެ. މި ގޮތުން، ޕްރައިމަރީ ސްކޫލްތަކުގައި މި ލިމިޓު ހިނގާނީ އިޓަލީވިލާތަށް އުފަންނުވާ ކުދިންނާއި މަދުވެގެން ދެ އަހަރު ދުވަހު ޕްރީސްކޫލަށް ހާޒިރުވެފައި ނުވާ ދަރިވަރުންގެ މައްޗަށެވެ. އަދި، ލޮވާ އަދި އަޕާ ސެކަންޑަރީ ސްކޫލްތަކުގައި މި އުސޫލު ހިނގާނީ އިޓަލީވިލާތުގެ ގައުމީ ތައުލީމީ ނިޒާމުގައި މަދުވެގެން ތިން އަހަރު ދުވަހު ކިޔަވާފައި ނުވާ ބޭރުގެ ދަރިވަރުންގެ މައްޗަށް ކަމަށް ބަޔާންކޮށްފައިވެ އެވެ.
އެ ގައުމުގެ ތައުލީމާ ބެހޭ ވަޒީރު ޖުސެއްޕެ ވަލްދިތާރާ ވިދާޅުވީ، މިހާރު ވެސް ގާތްގަނޑަކަށް 34،000 ކުލާހެއްގައި ބޭރު ދަރިވަރުންގެ ނިސްބަތް %30 އަށްވުރެ އިތުރުވާ ކަމަށެވެ. މީގެ އިތުރުން، މުޖުތަމައާ ގުޅުން ބަދަހިކުރުމުގެ މުހިންމު ވަސީލަތެއްގެ ގޮތުގައި އިޓަލީ ބަސް ދަސްކޮށްދިނުމަށް އިތުރަށް ބާރުއެޅުމަކީ ސަރުކާރުގެ މައިގަނޑު އަމާޒު ކަމަށް ވެސް ވަޒީރު ފާހަގަކުރެއްވި އެވެ.
މިއާއެކު، އާއިލާއެއްގެ ތެރޭގައި އޮންނަ ބަހުގެ ހުރަސްތައް ބޮޑުވެ، އެ ކަމުގެ ސަބަބުން ކުއްޖާ ސްކޫލުގެ މާހައުލަށް ހޭނުމަށް ދާއިމީ ގޮތެއްގައި ހުރަސްއެޅޭ ހާލަތްތަކުގައި ސަރުކާރުން އެ ކަމުގެ ތެރެއަށް ވަނުމަށް މި ގަރާރުން ފުރުސަތުދެ އެވެ. އަދި، އެ ފަދަ ހާލަތްތައް ސްކޫލްތަކުން ސޯޝަލް ސާވިސަސްއަށް ރިޕޯޓުކުރަން ޖެހޭއިރު، އެ އިދާރާއިން ބެލެނިވެރިންނަށް ހާއްސަކޮށްގެން އިޓަލީ ބަސް ދަސްކޮށްދޭ ކޯސްތައް އިންތިޒާމު ކުރާނެ އެވެ. މި އެންގުމަށް އަމަލުނުކުރާ ފަރާތްތައް 200 ޔޫރޯ އާއި 1،000 ޔޫރޯއާ ދެމެދުގެ އަދަދަކުން ޖޫރިމަނާ ކުރެވޭނެ އެވެ.
މަސްދަރު: އަނަދޮލު އޭޖެންސީ
