ދެކުނު ސޫރިޔާގެ އަވަށަކަށް ރޭގަނޑުގެ ވަގުތެއްގައި އިސްރާއީލް ސިފައިން ވަދެގަނެ ގެއެއް ބަލައިފާސްކޮށްފި
20 އޮކްޓޯބަރު 2026 | އަންގާރަ 07:42ދެކުނު ސޫރިޔާގެ ސަރަހައްދުތަކަށް އިސްރާއީލު ސިފައިން ވަދެގަނެ ހިންގަމުންދާ އަމަލުތައް ސޫރިޔާގެ ޚާރިޖީ ވުޒާރާއިން ހަރުކަށި އިބާރާތުން ކުށްވެރިކޮށްފި. މި އަމަލުތަކަކީ ސޫރިޔާގެ އިސްތިގުލާލަށް އަރައިގަތުން ކަމަށް ބުނެ، ބައިނަލްއަގުވާމީ ގާނޫނުތަކަށް ބޯލެނބުމަށް ބާރުއެޅުމަށް އެ ގައުމުން ވަނީ ދުނިޔޭގެ މުޖުތަމައަށް ގޮވާލާފައި. ބައްޝާރު އަލް-އަސަދުގެ ވެރިކަން ވެއްޓުނު ފަހުން އިސްރާއީލުން ދަނީ ބަފަރ ޒޯން ހިފައި، އެ ސަރަހައްދުގެ ރައްޔިތުންނަށް ތަކުރާރުކޮށް ގޯނާކުރަމުން
އިސްރާއީލުގެ އަސްކަރިއްޔާއިން ފަހަކަށް އައިސް ހަރަކާތްތެރިވަމުންދާ ސޫރިޔާގެ ދެކުނު ސަރަހައްދުގެ މަންޒަރެއް. | އަނަދޮލު އޭޖެންސީ
ހޯމަ ދުވަހުގެ ރޭގަނޑުގެ ވަގުތެއްގައި ދެކުނު ސޫރިޔާގެ އަވަށަކަށް ޔަހޫދީ އިސްރާއީލުގެ ސިފައިން ވަދެގަނެ، އެ ސަރަހައްދުގައި ފްލެޔަރ ފަދަ ހަތިޔާރު ބޭނުންކޮށް، ގެއެއް ބަލައިފާސްކޮށްފައިވާ ކަމަށް ސޫރިޔާގެ ދައުލަތުގެ މީޑިއާއިން ރިޕޯޓުކޮށްފި އެވެ. އަލް-ޤުނައިޠިރާ ޕްރޮވިންސުގެ އުތުރުގެ ރަށްފުށުގެ ސަރަހައްދެއް ކަމަށްވާ ޠަރަންޖާ އަވަށަށް އިސްރާއީލު ސިފައިން ވަދެގަނެ، ގެއެއް ބަލައިފާސްކޮށްފައިވާ ކަމަށް ސޫރިޔާގެ އަލް-އިޚްބާރިއްޔާ ޓީވީން ބުންޏެވެ. މި ޖަރީމާ ހިންގާފައި މި ވަނީ، އެ ސަރަހައްދުގައި އިސްރާއީލުން ތަކުރާރުކޮށް އަސްކަރީ އޮޕަރޭޝަންތައް ހިންގަމުންދާ ދަނޑިވަޅެއްގަ އެވެ.
ޒައިތޫނި ދަނޑުތަކެއްގައި މަސައްކަތް ކުރަން ތިއްބައި، ހޮނިހިރު ދުވަހު ޠަރަންޖާ ކައިރިން ސޫރިޔާގެ ދެ މީހަކު އިސްރާއީލު ސިފައިން ހިފެހެއްޓުމަށްފަހު އާދީއްތަ ދުވަހު ދޫކޮށްލާފައިވާ ކަމަށް ސޫރިޔާގެ ދައުލަތުގެ ނޫސް އޭޖެންސީ، ސާނާއިން ހާމަކުރި އެވެ. އަލް-ޤުނައިޠިރާ އަދި އަވައްޓެރި ދަރްޢާ ޕްރޮވިންސަށް އިސްރާއީލު ސިފައިން ވަދެގަންނަ ވަދެގަތުންތައް އިތުރުވަމުން ދިއުމާއި، ދެކުނު ސޫރިޔާގެ މަތިން ހެލިކޮޕްޓަރާއި، ޖާސޫސީ އަދި އަސްކަރީ މަތިންދާބޯޓުތަކުގެ ހަރަކާތްތައް އިތުރުވަމުންދާ މައްސަލަ އާދީއްތަ ދުވަހު ކުށްވެރިކޮށްފައިވާ ކަމަށް ސޫރިޔާގެ ޚާރިޖީ ވުޒާރާއިން ބުންޏެވެ.
އެ އޮޕަރޭޝަންތަކަކީ ސޫރިޔާގެ އިސްތިޤުލާލަށާއި ސަރަހައްދީ ނަޒާހަތްތެރިކަމަށް ވެވޭ "ސަރީހަ ޚިލާފުވުމެއް" ކަމަށް އެ ވުޒާރާއިން ސިފަކުރި އެވެ. އަދި, އިސްރާއީލުން މެދުކެނޑުމެއްނެތި ހިންގާ މި ފަދަ ޖަރީމާތަކުގެ ސަބަބުން ސަލާމަތާއި ހަމަޖެހުމަށް ނުރައްކާވެ، ޤައުމު އަލުން އާރާސްތުކުރުމަށާއި އިޔާދަކުރުމަށް ކުރަމުންދާ މަސައްކަތްތަކަށް ހުރަސްއެޅޭ ކަމުގެ އިންޒާރު ވެސް އެ ވުޒާރާއިން ވަނީ ދީފަ އެވެ. މި ޚިލާފުވުންތައް ހުއްޓުވުމަށް ފިޔަވަޅު އެޅުމަށާއި، ބައިނަލްއަގުވާމީ ގާނޫނުތަކަށާއި އދ. ގެ ކަމާގުޅޭ ގަރާރުތަކަށް އިސްރާއީލުން ބޯލެނބުމަށް ބާރުއެޅުމަށް ބައިނަލްއަގުވާމީ މުޖުތަމައަށް ގޮވާލާފައިވާ ކަމަށް ވެސް އެ ވުޒާރާއިން ބުންޏެވެ.
1974 ގެ އެއްބަސްވުން އިސްރާއީލުން ބާތިލުކޮށް، ސޫރިޔާގެ ބަފަރ ޒޯން ހިފައި، 2024 ޑިސެންބަރު މަހު ބައްޝާރު އަލް-އަސަދުގެ ވެރިކަން ވެއްޓުނު ފަހުން، އިސްރާއީލްގެ ސިފައިން ދަނީ ދެކުނު ސޫރިޔާއަށް ތަކުރާރުކޮށް ވަދެގަންނަމުންނެވެ. އަދި، އެ ސަރަހައްދުތަކުގައި ދިރިއުޅޭ ސޫރިޔާގެ ރައްޔިތުންނާ ދެކޮޅަށް ލާއިންސާނީ ޖަރީމާތައް ހިންގަމުންނެވެ.
މަސްދަރު: އަނަދޮލު އޭޖެންސީ
