އަނެއްކާ ވެސް ބޮޑު ހަނގުރާމައެއް ފަށައިގެން އިންތިޚާބު ފަސްކުރަން ނަތަންޔާހޫ ރާވަނީ: އިދިކޮޅު
3 އޮކްޓޯބަރު 2026 | ހޮނިހިރު 04:41އޮކްޓޫބަރު މަހު ބާއްވާ އިންތިޚާބު ފަސްކުރުމަށް ޓަކައި ބޮޑުވަޒީރު ނަތަންޔާހޫ އާ ހަނގުރާމައެއް ފަށަން ރާވަމުންދާ ކަމަށް ކުރީގެ ބޮޑުވަޒީރު އެހޫދް ބަރާކް ތުހުމަތުކުރި. ސަލާމަތީ މައްސަލަތަކުގެ ނާޖާއިޒު ފައިދާ ނަތަންޔާހޫ ނަގަމުންދާ ކަމަށް އިދިކޮޅު ފަރާތްތަކުން ބުނާއިރު، އޭނާ ވަނީ އިންތިޚާބުގެ ކުރިން އިސްރާއީލަށް ހަމަލާތަކެއް ކުރިމަތިވެދާނެ ކަމުގެ އިންޒާރު ދީފައި. ސަރަހައްދީ ނުތަނަވަސްކަން ބޮޑުވެފައިވާ މި ދަނޑިވަޅުގައި، ވޯޓުގެ ޒަރިއްޔާއިން ސަރުކާރު ބަދަލުކުރުމަށް އިދިކޮޅު އިއްތިހާދުން ދަނީ މަސައްކަތް ކުރަމުން
އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ އދގެ އާންމު މަޖިލީހުގައި ތަގުރީރު ކުރަނީ | އޭއެފްޕީ
އޮކްޓޫބަރު މަހުގެ 27 ވަނަ ދުވަހު ބޭއްވުމަށް ހަމަޖެހިފައިވާ އާންމު އިންތިޚާބު ފަސްކުރުމަށް ޓަކައި، އިސްރާއީލްގެ ބޮޑުވަޒީރު ބެންޖަމިން ނަތަންޔާހޫ އަނެއްކާ ވެސް ބޮޑު ހަނގުރާމައެއް ފަށަށް ރާވައި، ތައްޔާރުވަމުންދާ ކަމަށް އެ ގައުމުގެ ކުރީގެ ބޮޑުވަޒީރު އެހޫދް ބަރާކް ހުކުރު ދުވަހު ތުހުމަތުކޮށްފި އެވެ.
"އިންތިޚާބު ފަސްކުރެވޭނެ ފަދަ ގޮތަކަށް ހަނގުރާމައަކަށް ދިއުމަށް ޓަކައި ނަތަންޔާހޫ ދަނީ އޮނިގަނޑު ތައްޔާރުކުރަމުން،" އިސްރާއީލުގެ ޗެނަލް 12 އަށް ދިން އިންޓަވިއުއެއްގައި ބަރާކް ބުންޏެވެ. މީގެ އިތުރުން ނަތަންޔާހޫއަށް ވަރަށް ބޮޑަށް ފާޑުކިޔަމުން، ނަތަންޔާހޫ އަކީ "ނޭވާލާ ފަދައިން، ފްރެންޗް ފްރައިޒް ކާ ފަދައިން، އަދި ފައިސާ ނުދައްކައި ރެސްޓޯރެންޓަކުން ނުކުމެގެންދާ ފަދައިން ދޮގުހަދާ" މީހެއްގެ ގޮތުގައި ސިފަކޮށްފަ އެވެ. "އޮކްޓޫބަރު 27 ގައި އޭނާ އެއްކޮށް ވެރިކަމުން ދުރުކުރުމަށް ޓަކައި އަޅުގަނޑުމެންނަށް ކުރެވެން ހުރި ހުރިހާ މަސައްކަތެއް ކުރަންޖެހޭ،" ބަރާކް ބުންޏެވެ.
އޭނާ މިހެން ބުނެފައި މި ވަނީ، އިންތިޚާބުގެ ކެމްޕޭނުގައި ސަލާމަތީ މައްސަލަތައް ބޭނުންކުރަމުންދާ ކަމާ ގުޅޭގޮތުން އިސްރާއީލްގެ އެތެރޭގައި ބަހުސްތައް ހޫނުވެފައިވާ ދަނޑިވަޅެއްގަ އެވެ. އިންތިޚާބުގެ ކުރިން އިސްރާއީލަށް ހަމަލާތަކެއް ކުރިމަތިވެދާނެ ކަމަށް ނަތަންޔާހޫ ވަނީ މި ހަފްތާގެ ކުރީކޮޅު އިންޒާރުދީފަ އެވެ. އަދި، އެކި ފްރަންޓްތަކުގައި ހިނގަމުންދާ ކަންކަމާ ގުޅޭގޮތުން ސަލާމަތީ އިސް އޮފިޝަލުންނާއެކު އޭނާ ވަނީ މަޝްވަރާތަކެއް ވެސް ކޮށްފަ އެވެ.
އިސްރާއީލުގެ ކުރީގެ ބޮޑުވަޒީރު އެހޫދް ބަރާކް ކެންޕޭން ޖަލްސާއެއްގައި ވާހަކަ ދައްކަނީ | އަނަދޮލު އޭޖެންސީ
ސެޕްޓެންބަރު މަހުގެ 30 ވަނަ ދުވަހު ދުބާއީއިން ތެލް އަވީވްއަށް ދަތުރުކުރި ފްލައިދުބާއީގެ ފްލައިޓް އެފްޒެޑް1073 އާ ގުޅުންހުރި ހާދިސާގެ ފަހަތުގައިވާ ކޮންމެ ބަޔަކާ ދެކޮޅަށް ބަދަލުހިފާނެ ކަމުގެ އިންޒާރު ވެސް އޭނާ ވަނީ ދީފަ އެވެ. މި ހާދިސާ ހިންގި ފަރާތުން އެ ކަން ކޮށްފައިވަނީ އެހެން ބަޔެއްގެ އިރުޝާދުގެ ދަށުންތޯ ބެލުމަށް ތަހުގީގު ކުރަމުންދާ ކަމަށާއި، "އޭނާ ފޮނުވި ކޮންމެ ބަޔަކު [ފްލައިޓްގައި ހަމަނުޖެހުން ހިނގި ފަސްޓް އޮފިސަރު] އޭގެ ވަރަށް ބޮޑު އަގެއް ދައްކަންޖެހޭނެ" ކަމަށް ނަތަންޔާހޫ ބުންޏެވެ.
ފްލައިދުބާއީގެ ހާދިސާ ނަތަންޔާހޫ މިހާރު ވަނީ އިންތިޚާބީ ކެމްޕޭނުގެ މައްސަލައަކަށް ހަދާފަ އެވެ. އަދި، އެ ހާދިސާ ބޭނުންކޮށް، ކެމްޕޭނުގައި ތާއީދު ހޯދަން އޭނާދަނީ މަސައްކަތް ކުރަމުންނެވެ. މިއީ، އިންތިޚާބުގައި އޭނާގެ މަގާމު ވަރުގަދަކުރުމަށް ޓަކައި ސަލާމަތީ މައްސަލަތަކުގެ ނާޖާއިޒު ފައިދާ ނަގަމުންދިޔުން ކަމަށް އިދިކޮޅުން ދަނީ ތުހުމަތު ކުރަމުންނެވެ.
ބަރާކްގެ މި ފާޑުކިޔުންތައް އަމާޒުވެފައި މި ވަނީ، ޣައްޒާއާއި ލުބުނާން އަދި ސޫރިޔާ ހިމެނޭހެން އެކި ބިންތަކުގައި އިސްރާއީލުން އަސްކަރީ އޮޕަރޭޝަންތަކުގެ ނަމުގައި ލާއިންސާނީ ޖަރީމާތަކާއި ގަތުލުއާންމުތައް ހިންގަމުންދާ ދަނޑިވަޅެއްގަ އެވެ. ސަލާމަތީ ގޮތުން ނުތަނަވަސްކަން ބޮޑުވެ، އާންމުންގެ މެދުގައި ބިރުވެރިކަން އުފެދިފައިވާ ހާލަތެއްގައި އިންތިޚާބު ބޭއްވުމަށް ނަތަންޔާހޫ މަސައްކަތްކުރައްވަމުންދާ ކަމަށް އޮގަސްޓް މަހު ވެސް ބަރާކް ވަނީ ތުހުމަތުކޮށްފަ އެވެ. މި ގޮތުން، ބައެއް ސަރަހައްދީ ފްރަންޓްތަކުގައި ހަމަނުޖެހުންތައް އިތުރުކުރަމުން ދަނީ އިންތިޚާބީ މަގުސަދުތަކެއް ހާސިލުކުރުމަށް ކަމަށް އޭނާ ބުންޏެވެ.
ކުރިއަށް އޮތް އިންތިޚާބަކީ 2023 އޮކްޓޯބަރު 7 ގެ ހާދިސާތަކަށްފަހު އިސްރާއީލްގައި ބާއްވާ ފުރަތަމަ އާންމު އިންތިޚާބެވެ. ވޯޓު ފޮށީގެ ޒަރިއްޔާއިން ނަތަންޔާހޫގެ ސަރުކާރު ބަދަލުކުރުމަށް ޓަކައި އިދިކޮޅު ޕާޓީތަކުން ދަނީ ގުޅިގެން ކުރަމުންދާ މަސައްކަތްތައް އިތުރަށް ވަރުގަދަކުރަމުންނެވެ.
މަސްދަރު: އަނަދޮލު އޭޖެންސީ
