އެމެރިކާއިން ހަތިޔާރު ވިއްކުން މަނާ ގައުމުތަކުގެ ލިސްޓުން ސޫރިޔާ އުނިކޮށްފި
1 އޮކްޓޯބަރު 2026 | ބުރާސްފަތި 04:27އެމެރިކާގެ ހަތިޔާރު ވިއްކުން މަނާކުރާ ގައުމުތަކުގެ ލިސްޓުން ސޫރިޔާ އުނިކުރުމަށް އެމެރިކާގެ ޚާރިޖީ ވުޒާރާއިން ވަނީ ނިންމާފައި. މި ބަދަލާއެކު ސޫރިޔާގެ އާ ސަރުކާރަށް އަސްކަރީ ސާމާނާއި ސަލާމަތީ ޚިދުމަތްތައް ފޯރުކޮށްދިނުމުގެ މުއާމަލާތްތައް ވަކިވަކިން މުރާޖައާ ކުރުމުގެ ފުރުސަތު ވޮޝިންގޓަނަށް ލިބިގެންދާނެ. މިއީ އެ ގައުމާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް އުވާލައި، ގުޅުން ބަދަހިކުރުމަށް ޓްރަމްޕްގެ ސަރުކާރުން ކުރަމުންދާ މަސައްކަތުގެ ބައެއް
ސޫރިޔާގެ އަސްކަރިއްޔާގެ ސިފައިން ތަމްރީނުތަކެއް ފުރިހަމަ ކުރަނީ | އަނަދޮލު އޭޖެންސީ
އެމެރިކާއިން ހަތިޔާރު ވިއްކުން މަނާ ގައުމުތަކުގެ ލިސްޓުން ސޫރިޔާ އުނިކޮށްފައިވާ ކަން ވޮޝިންގޓަނުން ހާމަކޮށްފިއެވެ. އެމެރިކާ ސަރުކާރުން ބުނީ، ސޫރިޔާއަށް ހަތިޔާރު އެކްސްޕޯޓް ކުރުމަށް ގިނަ ދުވަސްތަކެއް ވަންދެން އަޅާފައި އޮތް ހުރަސްތައް އުވާލައި، ދިމިޝްގަށް ދިފާއީ ސާމާނު ވިއްކުމާއި ސަލާމަތީ ޚިދުމަތްތައް ފޯރުކޮށްދިނުމުގެ މުއާމަލާތްތައް ވަކިވަކިން މުރާޖައާ ކުރުމުގެ މަގު މިހާރު ފަހިވެގެން ގޮސްފައިވާ ކަމަށެވެ.
"ލައިސަންސްތަކާއި އެހެނިހެން ހުއްދަތައް ދިނުން މަނާކުރާ ސިޔާސަތުގެ ދަށުގައިވާ ގައުމުތަކުގެ ލިސްޓުން ސޫރިޔާ އުނިކުރުމަށް ޓަކައި، ޚާރިޖީ ވުޒާރާއިން އިންޓަނޭޝަނަލް ޓްރެފިކް އިން އާމްސް ރެގިއުލޭޝަންސްއަށް (އައިޓީއޭއާރް) އިސްލާހު ގެންނަމުންދޭ" ކަމަށް ފެޑެރަލް ރެޖިސްޓާގައި ޝާއިއުކުރި އާންމު އިއުލާނެއްގައި އެ އިދާރާއިން ބުންޏެވެ. އަދި، މި އިދާރީ ގަވާއިދަށް ރަސްމީކޮށް އަމަލުކުރަން ފަށާނީ ބުރާސްފަތި ދުވަހު ކަމަށް ވެސް އެ އިއުލާނުގައި ބަޔާންކޮށްފައިވެ އެވެ.
މި ގަވާއިދަށް ގެނައި އިސްލާހަކީ، ސޫރިޔާއަށް ފޮނުވާ ނުވަތަ އެ ގައުމުން ފޮނުވާ އަސްކަރީ ސާމާނާއި ސަލާމަތީ ޚިދުމަތްތަކުގެ މުއާމަލާތްތަކާ ގުޅޭ ވަކިވަކި ހުށަހެޅުންތައް ވަޒަންކުރުމުގެ ހުއްދަ ކަމާބެހޭ އިދާރާތަކަށް ދިނުމަށް ޓަކައި ދިފާއީ ވިޔަފާރީގެ އޮނިގަނޑު މުރާޖައާ ކުރައްވައި، ޚާރިޖީ ވަޒީރު މާކޯ ރޫބިއޯ އޮގަސްޓް މަހުގެ 19 ވަނަ ދުވަހު ނިންމެވި ނިންމެވުން ތަންފީޒުކުރުމުގެ ގޮތުން އެޅި ފިޔަވަޅެއް ކަމަށް ރިޕޯޓްކޮށްފައިވެ އެވެ.
ގަވާއިދަށް މި ބަދަލު ގެނެސްފައި މި ވަނީ، 2024 ވަނަ އަހަރުގެ ފަހުކޮޅު ބައްޝާރު އަލް-އަސަދުގެ ސަރުކާރު ވެއްޓުމާ ގުޅިގެން، ސޫރިޔާއާއެކު އޮންނަ ޑިޕްލޮމެޓިކް އަދި ވިޔަފާރީގެ ގުޅުން އާންމު ހާލަތަކަށް ގެނައުމަށް ރައީސް ޑޮނަލްޑް ޓްރަމްޕްގެ ސަރުކާރުން މަސައްކަތް ކުރަމުންދާ ދަނޑިވަޅެއްގަ އެވެ.
ސޫރިޔާގެ ރައީސް އަޙްމަދު އަލް-ޝަރްޢު އިސްވެ ހުންނެވި އާ އިސްވާރާއެކު ޝަރުތުތަކެއްގެ މަތިން ގުޅުން ބަދަހިކުރުމުގެ އިސްތިރާޖުގެ ބައެއްގެ ގޮތުގައި، ވޮޝިންގޓަނުން މީގެ ކުރިން ވަނީ އެ ގައުމާ ދެކޮޅަށް އަޅާފައިވާ އިގްތިސާދީ ދަތިކުރުމުގެ ފިޔަވަޅުތައް އުވާލައި، ޓެރަރިޒަމަށް ވާގިވެރިވާ ދައުލަތްތަކުގެ ލިސްޓުން ވެސް ދިމިޝްގު އުނިކޮށްފަ އެވެ.
މަސްދަރު: އަނަދޮލު އޭޖެންސީ
