ހަތިޔާރު ދޫކޮށްލަން އެއްބަސްވި އިރާގުގެ ފަސް ޖަމާއަތުގެ ތެރެއިން ތިން ގުރޫޕަކުން ހަތިޔާރު ބަހައްޓައިފި
6 އޮކްޓޯބަރު 2026 | އަންގާރަ 02:48ދައުލަތުގެ ބާރުވެރިކަން ވަރުގަދަކޮށް ރައްޔިތުންގެ ރައްކާތެރިކަން ކަށަވަރުކުރުމަށް ޓަކައި، ދައުލަތުގެ ކޮންޓްރޯލުން ބޭރުގައިވާ ހަތިޔާރުތައް ސަރުކާރުގެ ދަށަށް ގެނައުމުގެ މަސައްކަތް އިރާގުން ދަނީ ކުރަމުން. ބައިނަލްއަގުވާމީ ކޯލިޝަންގެ މިޝަން ނިމުމަކަށް އައުމާ ގުޅިގެން، ސަރަހައްދީ ހަމަނުޖެހުންތަކުން ގައުމު ސަލާމަތްކުރުމަށް ޓަކައި މިނިވަންކަމާއެކު ގޮތް ނިންމުމުގެ މުހިންމުކަން ބޮޑުވަޒީރު ފާހަގަކުރެއްވި
އިރާގުގެ ރައީސް ޢަލީ އަލް-ޒައިދީ ނޫސްވެރިންނާ ވާހަކަފުޅު ދައްކަވަނީ | އަނަދޮލު އޭޖެންސީ
ހަތިޔާރު ދޫކޮށްލުމަށް އެއްބަސްވި ފަސް ޖަމާއަތެއްގެ ތެރެއިން ތިން ގުރޫޕަކުން މިހާރު ހަތިޔާރު ބަހައްޓާފައިވާ ކަމަށާއި، ބާކީ އޮތް ޖަމާއަތްތަކާއެކު މަޝްވަރާތައް ކުރިއަށްދާ ކަމަށް އިރާގުގެ ބޮޑުވަޒީރު ޢަލީ އަލް-ޒައިދީ ހޯމަ ދުވަހު ވިދާޅުވެއްޖެ އެވެ.
"ހަތިޔާރު ހަވާލުކުރުމަށް ފަސް ޖަމާއަތަކުން އެއްބަސްވި، އަދި، އޭގެ ތެރެއިން ތިން ޖަމާއަތަކުން މިހާރު ވަނީ އެ ކަން ކޮށްފައި. އަނެއް ޖަމާއަތްތަކާއެކު މަޝްވަރާތައް ދަނީ ކުރިއަށް،" އިރާގުގެ ތަފާތު ގަބީލާތަކުގެ އިސްވެރިންނާއި އިއްޒަތްތެރިންނާއެކު ބޭއްވި ބައްދަލުވުމެއްގައި އަލް-ޒައިދީ ވިދާޅުވި އެވެ.
ދައުލަތުގެ ބާރުވެރިކަން ވަރުގަދަކޮށް، އެއްވެސް ބަޔަކު ދައުލަތުގެ ބާރު ކަނޑުވާލުމަށް ކުރާ މަސައްކަތްތައް ހުއްޓުވުމަށް ސަރުކާރުން އިތުރު މަސައްކަތްތަކެއް ކުރަމުންދާ ކަމަށް އޭނާ ވިދާޅުވި އެވެ. "އިރާގުގެ ރައްޔިތުންގެ ލޭގެ ޒިންމާ އަކީ އަޅުގަނޑުމެންގެ މަސްއޫލިއްޔަތެއް،" މީހުންގެ ފުރާނަ ސަލާމަތްކުރުމާއި ދައުލަތުގެ މުއައްސަސާތައް ވަރުގަދަކުރުމަކީ ސަރުކާރުން އެންމެ އިސްކަންދޭ ކަންތައްތަކުގެ ގޮތުގައި އޮތްކަން ފާހަގަކުރައްވަމުން އަލް-ޒައިދީ ވިދާޅުވި އެވެ.
އަދި, އިރާގުގެ ނިންމުންތައް ނިންމުމުގެ ބާރު އިރާގުގެ އަތްމަތީގައި ދެމިއޮތުމަށް އޭނާ ގޮވާލެއްވި އެވެ. މިއާއެކު، ހަމަނުޖެހުން ބޮޑު ދުވަސްވަރުތަކުގައި ގައުމުގެ ހަމަޖެހުން ގާއިމުކުރުމުގައި ގަބީލާތަކުގެ އިސްވެރިން އަދާކުރި ދައުރު ފާހަގަކުރައްވައި އެ ފަރާތްތަކަށް އޭނާ ތައުރީފުކުރެއްވި އެވެ.
އިރާގުގެ ހަތިޔާރުއެޅި ޖަމާއަތްތަކުން ހަތިޔާރު ބަހައްޓަމުންދާ ކަން އިއުލާނުކޮށްފައި މި ވަނީ، އެމެރިކާ އިސްވެ އޮވެ އިރާގުގައި ހިންގި ބައިނަލްއަގުވާމީ ކޯލިޝަންގެ އަސްކަރީ މިޝަން ސެޕްޓެމްބަރު މަހުގެ ފަހުކޮޅު ނިމުމަކަށް އައުމާ ގުޅިގެން، ދައުލަތުގެ ކޮންޓްރޯލުން ބޭރުގައިވާ ހަތިޔާރުތައް ސަރުކާރުގެ ބާރުގެ ދަށަށް ގެނައުމަށް ބަޣްދާދުން މަސައްކަތް ކުރަމުންދާ ދަނޑިވަޅެއްގަ އެވެ.
ސަރަހައްދީ ހަމަނުޖެހުންތަކުން އިރާގު ސަލާމަތްކުރުމަށް ސަރުކާރުން މަސައްކަތްކުރަމުންދާ ކަމަށާއި، ގައުމުގެ ހަމަޖެހުމަށް ޓަކައި ގައުމީ އެއްބައިވަންތަކަމާއި މިނިވަންކަމާއެކު ގޮތް ނިންމުމަކީ ވަރަށް މުހިންމު ކަމެއް ކަމަށް އަލް-ޒައިދީ ވިދާޅުވި އެވެ.
މަސްދަރު: އަނަދޮލު އޭޖެންސީ
