ފަރަންސޭސިވިލާތުގައި ދަރިވަރުންނަށް އަނިޔާކޮށް، ގިނަ ބަޔަކު ހައްޔަރުކުރުން އދ. އިން ކުށްވެރިކޮށްފި
29 އޮކްޓޯބަރު 2026 | ބުރާސްފަތި 06:36ފަރަންސޭސިވިލާތުގެ ތަޢުލީމީ ނިޒާމު އިސްލާހުކުރުމަށް ގޮވާލައި ދަރިވަރުން ކުރަމުންދާ މުޒާހަރާތަކުގައި، ފުލުހުން ބާރުގެ ބޭނުންކޮށް ކުޑަކުދިންނަށް އަނިޔާކުރާ މައްސަލަ އދ. ގެ މާހިރުން ކުށްވެރިކޮށްފި. މުޒާހަރާގެ ބައިވެރިންގެ ކަންބޮޑުވުންތަކަށް ހައްލު ހޯދުމުގެ ބަދަލުގައި ސަލާމަތީ ފިޔަވަޅުތައް ވަރުގަދަކުރުމަކީ ބަލައިގަނެވޭނެ ކަމެއް ނޫންކަން ފާހަގަކޮށް، ފުލުހުންގެ އުސޫލުތައް މުރާޖާކުރުމަށް އދ. އިން ވަނީ ގޮވާލާފައި
ފަރަންސޭސިވިލާތުގައި ދަރިވަރުން ކުރަމުންދާ މުޒާހަރާތައް ހުއްޓުވުމަށް ހަރަކާތްތެރިވަމުންދާ ރަޔަޓު ފުލުހުން | އަނަދޮލު އޭޖެންސީ
ފަރަންސޭސިވިލާތުގެ އެކި ކަންކޮޅުތަކުގައި މުޒާހަރާ ކުރަމުންދާ ދަރިވަރުންނާ ދެކޮޅަށް ހިންގާ އަނިޔާވެރި އަމަލުތަކާއި، ގިނަ އަދަދެއްގެ ދަރިވަރުން ހައްޔަރުކުރުމުގެ މައްސަލަ އެކުވެރި ދައުލަތްތަކުގެ (އދ) މާހިރުން ބުދަ ދުވަހު ކުށްވެރިކުރައްވައިފި އެވެ. އަދި އުމުރުން ދުވަސްނުފުރޭ ކުދިންނަށް ސީރިއަސް އަނިޔާތަކެއް ލިބުމާއި، އެތައް ހާސް މުޒާހަރާގެ ބައިވެރިން ބަންދުކޮށްފައިވާ މައްސަލައަކީ "ބަލައިގަނެވޭނެ ކަމެއް ނޫން" ކަމަށް އެ ބޭފުޅުން ވިދާޅުވި އެވެ.
އދ. ގެ މާހިރުން ނެރުއްވި ބަޔާނެއްގައި ވިދާޅުވެފައި ވަނީ، ފަރަންސޭސިވިލާތުގައި ދަރިވަރުން ކުރަމުންދާ އިހުތިޖާޖުތަކުގައި އެ ކުދިންނަށް ލިބެމުންދާ އަނިޔާތަކާ މެދު ނުހަނު ކަންބޮޑުވާ ކަމަށެވެ. ދަރިވަރުން އެދެމުންދަނީ ތަޢުލީމީ ނިޒާމު ހަރުދަނާކުރުމާއި، ތަޢުލީމު އުނގެނުމަށް އެކަށީގެންވާ ވަސީލަތްތައް ހަމަޖައްސައިދިނުމާއި، މަދަރުސާތަކާއި ޔުނިވާސިޓީތަކުގެ ތާވަލުތައް އެކަށީގެންވާ ގޮތަކަށް ބަދަލުކުރުމާއި، ޚާއްސަކޮށް ފެންވަރު ރަނގަޅު ތަޢުލީމު ހޯދުމުގައި އިޖުތިމާޢީ އަދި ސަރަހައްދީ ހަމަހަމަކަން ގާއިމުކޮށްދިނުމަށެވެ. މިއީ، މާ ކުރިންސުރެ ވެސް ހައްލު ހޯދައިދޭންޖެހިފައިވާ ކަންކަން ކަމަށް މާހިރުން ފާހަގަކުރެއްވި އެވެ.
މި މުޒާހަރާތައް ސެޕްޓެންބަރު މަހުގެ މެދުތެރޭގައި އެންމެ ފުރަތަމަ ފެށުނީ ސާނަވީ މަދަރުސާތަކުގެ ދަރިވަރުންގެ މެދުގަ އެވެ. އޭގެ ފަހުން މި އިހުތިޖާޖުތައް ވަނީ ޔުނިވާސިޓީތަކަށް ވެސް ފެތުރިގެން ގޮސްފަ އެވެ. މުޒާހަރާގެ ބައިވެރިން ބާރުއަޅަމުން ދަނީ ތަޢުލީމީ ހާލަތު ރަނގަޅުކުރުމަށާއި، އެކަށޭނަ ވަސީލަތްތައް ފޯރުކޮށްދިނުމަށާއި، ފެންވަރު ރަނގަޅު ތަޢުލީމު އުނގެނުމުގެ ފުރުސަތު އެންމެންނަށް ހަމަހަމަކަމާއެކު ހޯދައިދިނުމަށެވެ.
އޮކްޓޫބަރު މަހުގެ ތެރޭގައި ސަރުކާރުން ދަރިވަރުންނާ މަޝްވަރާކުރުމަށް މަސައްކަތްތަކެއް ކުރި ނަމަވެސް، ކަމާބެހޭ އިދާރާތަކުން އިސްކަންދިނީ މުޒާހަރާގެ ބައިވެރިންގެ ކަންބޮޑުވުންތަކަށް ހައްލު ހޯދައިދިނުމުގެ ބަދަލުގައި ސަލާމަތީ ފިޔަވަޅުތައް ވަރުގަދަކުރުމަށް ކަމަށް މާހިރުން ވިދާޅުވި އެވެ.
"ގާނޫނު ތަންފީޒުކުރުމުގެ އޮޕަރޭޝަންތަކުގެ ތެރޭގައި، އުމުރުން ދުވަސްނުފުރޭ މުޒާހަރާގެ ބައިވެރިންނަށް ލިބިފައިވާ ސީރިއަސް، އަދި ބައެއް ހާލަތްތަކުގައި ދާއިމީ އަނިޔާތަކަކީ އެއްގޮތަކަށް ވެސް ބަލައިގަނެވޭނެ އަދި ދިފާއުކުރެވޭނެ ކަންކަމެއް ނޫން،" މާހިރުން ވިދާޅުވި އެވެ.
މީގެ އިތުރުން، އެތައް ހާސް ބަޔަކު، ޚާއްސަކޮށް ގިނަ އަދަދެއްގެ ކުޑަކުދިން ހައްޔަރުކޮށް ބަންދުކޮށްފައިވާ މައްސަލައިގައި ވެސް މާހިރުން ވަނީ ކަންބޮޑުވުން ފާޅުކުރައްވާފަ އެވެ. އެ ބޭފުޅުން ސިފަކުރެއްވި ގޮތުގައި މި މިންވަރަށް މީހުން ހައްޔަރުކުރުމަކީ ހާލަތާ ނުބައްދަލު ކަމެއް ކަމަށާއި، މީގެ ސަބަބުން ސުލްހަވެރި މުޒާހަރާތަކަށް ހުރަސްއެޅިދާނެ އެވެ.
ހަމަމިއާއެކު، ފުލުހުންނަށް އަނިޔާވެ، އިމާރާތްތަކަށާއި ވިޔަފާރިތަކަށް ގެއްލުން ލިބުނު އަނިޔާވެރި އަމަލުތައް ވެސް މާހިރުން ވަނީ ކުށްވެރިކުރައްވާފަ އެވެ. އަދި، އެ މައްސަލަތައް ތަހުގީގުކޮށް ފިޔަވަޅު އެޅުމަށް ގޮވާލެއްވި އެވެ.
"ފުލުހުންނަށް އަނިޔާވެ، ގިނަ އަދަދެއްގެ އިމާރާތްތަކަށް ގެއްލުންދީ، ފިހާރަތައް ލޫޓުވައި ގެއްލުން ދީފައިވާތީ ހިތާމަކުރަން. އަޅުގަނޑުމެން މި ފަދަ އަނިޔާވެރި އަމަލުތައް ކުށްވެރިކުރަން. މި ކަންކަން ތަހުގީގުކޮށް، ކުށްކުރި ފަރާތްތައް އިންސާފުގެ ކުރިމައްޗަށް ގެނައުމަށް ފިޔަވަޅުތައް އަޅަންޖެހޭ،" މާހިރުންގެ ބަޔާނުގައިވެ އެވެ.
މުޒާހަރާގެ ބައިވެރިންނަށް އެ މީހުންގެ ކަންބޮޑުވުންތައް ފާޅުކުރުމުގެ ފުރުސަތު ދިނުމަށާއި، އިޖުތިމާޢީ ހަމަނުޖެހުންތަކަށް ސުލްހަވެރި ހައްލެއް ހޯދުމަށް މަގުފަހިކުރުމަށް ޓަކައި، ފުލުހުން އަމަލުކުރަމުންދާ އުސޫލުތައް މުރާޖާ ކުރުމަށް ފަރަންސޭސިވިލާތުގެ ކަމާބެހޭ ފަރާތްތަކަށް މާހިރުން ވަނީ އިލްތިމާސްކުރައްވާފަ އެވެ. އަދި، މި ހާލަތާ ގުޅިގެން ފަރަންސޭސިވިލާތުގެ ކަމާބެހޭ ފަރާތްތަކާ މުއާމަލާތު ކުރަމުންދާ ކަމަށް ވެސް އެ ބޭފުޅުން ވިދާޅުވި އެވެ.
މަސްދަރު: އަނަދޮލު އޭޖެންސީ
