މިއަންނަ އަހަރު ގްރޭޑް އެކެއްގެ ފޮތްތަކަށް ބޮޑު ބަދަލެއް އަންނާނެ: މިނިސްޓަރު ޝަފީއު
12 ސެޕްޓެމްބަރު 2026 | ހޮނިހިރު 07:11ދަރިވަރުންގެ ފެންވަރު މަތިކުރުމަށްޓަކައި އަންނަ އަހަރު ގްރޭޑް އެކެއްގެ ފޮތްތަކަށް ބޮޑު ބަދަލެއް ގެންނަން ނިންމާފައިވާކަން އެޑިއުކޭޝަން މިނިސްޓަރު ޑރ. އިސްމާއީލް ޝަފީއު ހާމަކުރައްވައިފި. މީގެ އިތުރުން ސެކަންޑްރީ އާއި ހަޔަރ ސެކަންޑްރީ ތައުލީމުގެ ދެމެދުގައި އޮތް ފަރަގު ކުޑަކުރުމަށް މަސައްކަތް ކުރަމުންދާ ކަމަށާއި، ތައުލީމީ ނިޒާމަށް ހަގީގީ ބަދަލެއް އަންނާނީ މުދައްރިސުންގެ މަސައްކަތުންކަން މިނިސްޓަރު ފާހަގަކުރެއްވި
8 ވަނަ އިންޓަނޭޝަނަލް ޓީޗަރސް ކޮންފަރެެންސްގައި މިނިސްޓަރު ޝަފީއު ވާހަކަދައްކަވަނީ | ރާއްޖެ އެމްވީ
މިއަންނަ އަހަރު ގްރޭޑް އެކެއްގެ ފޮތްތަކަށް ބޮޑު ބަދަލެއް އަންނާނެކަަމަށް އެޑިއުކޭޝަން މިނިސްޓަރު ޑރ. އިސްމާއީލް ޝަފީއު އިއުލާނު ކުރައްވައިފި އެވެ.
8 ވަނަ އިންޓަނޭޝަނަލް ޓީޗަރސް ކޮންފަރެެންސްގައި ވާހަކަދައްކަވަމުން މިނިސްޓަރު ޝަފީއު ވިދާޅުވީ އެޑިއުކޭޝަން ނިޒާމު ހަރުދަނާ ކުރުމަށްޓަކައި ރައީސް ޑރ. މުހައްމަދު މުއިއްޒުގެ ވިސްނުންފުޅާއި، މެނިފިސްޓޯގައި ބަޔާންކޮށްފައިވާ ގޮތަށް ގެންނަން ޖެހޭ ބަދަލުތަކެއް ދަނީ ގެންނަމުން ކަމަށެވެ. އަދި ކުރިއެރުން މިހާރު ވެސް ހާސިލު ކުރެވެމުން ދާ ކަމަށް މިނިސްޓަރު ޝަފީއު ވިދާޅުވި އެވެ.
މިނިސްޓަރު ޝަފީއު ވިދާޅުވީ ދަރިވަރުންގެ ފެންވަރު ރަނގަޅުކުރުމަށްޓަކައި ގެންނަން ޖެހޭ ބަދަލުތައް ގެންނަމުންދާ ކަމަށެވެ. އެގޮތުން މިއަންނަ އަހަރު ކީސްޓޭޖް 1 ގެ ގްރޭޑް 1 ގެ ދަރިވަރުންގެ ފޮތްތަކަށް ބޮޑު ބަދަލެއް އަންނާނެ ކަމަށް މިނިސްޓަރު ވިދާޅުވި އެވެ.
އަޅުގަނޑު ހަމަ ވަރަށް ގިނައިން އެކިއެކި ބައްދަލުވުންތަކުގައި ޓީޗާރސް ކޮންފަރެންސް ކުރީގެ ޓީޗާރސް ކޮންފަރެންސްގައި ވެސް ހައި އެޗީވަރސްގެ އެކިއެކި ސެރުމަނީތަކުގައި ވެސް އަދި އަޅުގަނޑުމެންނަށް ބޭއްވޭ އެކި ބައްދަލުވުންތަކުގައި އެކި ފޯރަމްތަކުގައި އެންމެ ބޮޑަށް ދައްކަމުން އައި އެއް ވާހަކައަކީ ކުދިންގެ އެޓެއިންމަންޓްގެ ވާހަކަ ތެދެއްމެ ކުދިންގެ އެޓެއިންމަންޓް މިހާރަށް ވުރެ ރަނގަޅުވާން އެބަ ޖެހޭޑރ. އިސްމާއީލް ޝަފީއު
ފޮތްތަކަށް ބަދަލު ގެނައި ނަމަވެސް ހަގީގީ ބަދަލެއް އަންނާނީ ޓީޗަރުން ކުރާ މަސައްކަތުންކަން މިނިސްޓަރު ޝަފީއު ފާހަގަކުރެއްވި އެވެ. އަދި މުހިއްމީ ފޮތެއް ނޫން ކަމަށާއި، ހަގީގަތުގައި މުހިއްމީ ދަރިވަރުންގެ އެޑިއުކޭޝަން ބައްޓަން ކުރަން ވިސްނާ ގޮތް ކަމަށް މިނިސްޓަރު ޝަފީއު ވިދާޅުވި އެވެ.
މީގެ އިތުރުން، ސެކަންޑްރީ އެޑިއުކޭޝަނުން ހަޔަރ ސެކަންޑްރީ އެޑިއުކޭޝަނަށް އޮތް ގެޕް ކުޑަ ކުރުމަށް ކުރަން ޖެހޭ މަސައްކަތްތައް ވެސް ކުރަމުންދާ ކަމަށް މިނިސްޓަރު ޝަފީއު ވިދާޅުވި އެވެ.
