ފަރަންސޭސިވިލާތުގައި މުޒާހަރާ ކުރަމުންދިޔަ 5،000 އަށްވުރެ ގިނަ ދަރިވަރުން ހައްޔަރުކޮށްފި
4 އޮކްޓޯބަރު 2026 | އާދީއްތަ 05:06ފަރަންސޭސިވިލާތުގެ ސްކޫލްތަކުގެ ކިޔެވުމުގެ މާހައުލު ރަނގަޅުކުރުމަށް ގޮވާލައި ދަރިވަރުން ކުރަމުންދާ މުޒާހަރާތަކުގައި ފުލުހުން ބާރުގެ ބޭނުންކުރުމުގެ ސަބަބުން ބައެއް ކުދިންނަށް ބޮޑެތި އަނިޔާތަކެއް ލިބި، ގިނަ އަދަދެއްގެ ބަޔަކު ވަނީ ހައްޔަރުކޮށްފައި. މި ހަމަނުޖެހުންތަކާ ގުޅިގެން ސަތޭކައަށްވުރެ ގިނަ ތައުލީމީ މުއައްސަސާތަކަށް އަސަރުކޮށްފައިވާއިރު، ފުލުހުންގެ އަނިޔާވެރިކަމާ ދެކޮޅަށް މުޒާހަރާގެ ދެވަނަ ބުރެއް ފެށުމަށް ދަރިވަރުންގެ ޖަމުއިއްޔާތަކުން ދަނީ ތައްޔާރުވަމުން
ފަރަންސޭސިވިލާތުގައި ދަރިވަރުން ކުރަމުންދާ މުޒާހަރާތަކުގެ ތެރެއިން މަގެއް ބަންދުކުރުމުގެ ގޮތުން މުދާތަކެއްގައި ހުޅުޖަހާފައިވާ މަންޒަރު | ގެޓީ އިމޭޖަސް
ފަރަންސޭސިވިލާތުގެ އެކި ކަންކޮޅުތަކުގައި ދަރިވަރުން ކުރަމުންދާ މުޒާހަރާތަކާ ގުޅިގެން ހޯމަ ދުވަހުން ފެށިގެން މިހާތަނަށް 5،000 އަށްވުރެ ގިނަ ދަރިވަރުން ހައްޔަރުކޮށްފައިވާ ކަމަށް، އެ ގައުމުގެ ދާޚިލީ ވަޒީރު ލޮޣޯން ނުންޔޭޒް ވިދާޅުވެއްޖެ އެވެ.
ޓީއެފް1 ޗެނަލަށް ދެއްވި އިންޓަވިއުއެއްގައި ނުންޔޭޒް ވިދާޅުވީ، ގައުމުގެ އެކި ކަންކޮޅުތަކުގައި ކުރިއަށްދާ ހަމަނުޖެހުން ބޮޑު މުޒާހަރާތަކުގެ ތެރެއިން 158 މުއައްސަސާއެއްގެ ކައިރީގައި ހަމަނުޖެހުުން ހިންގާފައިވާ ކަމަށް ރެކޯޑު ކުރެވިފައިވާ ކަމަށެވެ. އަދި، 5،000 އަށްވުރެ ގިނަ މީހުން ހައްޔަރު ކޮށްފައިވާ ކަމަށެވެ.
އޭނާ އިއުލާންކުރެއްވި ގޮތުގައި 735 ސްކޫލަކަށް މި ކަމުގެ އަސަރުކޮށްފައިވާއިރު، 1،747 މީހުން ވަނީ ހައްޔަރުކޮށްފަ އެވެ. އަދި, މި ހަރަކާތުގެ "ފުޅާމިން" އަކީ ވަރަށް "ހައިރާންކުރުވަނިވި" ކަމެއް ކަމަށް ވެސް އޭނާ ވިދާޅުވި އެވެ.
ކިޔެވުމުގެ މާހައުލު ރަނގަޅުކުރުމަށް ގޮވާލައި ދަރިވަރުން ކުރަމުންދާ މުޒާހަރާތައް ހަފުތާތަކަކަށް ދެމިގެންގޮސްފައިވާއިރު، ހުކުރު ދުވަހު ފަރަންސޭސިވިލާތުގެ އެކި ކަންކޮޅުތަކުގައި ގިނަ ބަޔަކު ހައްޔަރުކޮށް އެތައް ބަޔަކަށް އަނިޔާވެފައިވާ ކަމަށް ރިޕޯޓުތައް ބުނެ އެވެ. މިއާއެކު، އެތައް ސަތޭކަ ސްކޫލެއް ވަނީ ބަންދުކޮށް، ނުވަތަ ކިޔެވުމަށް ބުރޫއަރާފަ އެވެ.
ދާޚިލީ ވަޒީރު ވިދާޅުވީ، މުޒާހަރާގެ ބައިވެރިން ހިންގަމުންދާ ހަމަނުޖެހުންތަކުގެ ތެރެއިން ފުލުހުންނާއި، މުދައްރިސުންގެ އިތުރުން ނޫސްވެރިންނަށް ހަމަލާދީ، އެ މީހުންނާ ދިމާލަށް ގާ ފަދަ ތަކެތި އުކާފައިވާ ކަމަށެވެ. ބުރާސްފަތި ދުވަހު ސްކޫލްތަކުގެ ބޭރުގައި 900 މުޒާހަރާ ރިޕޯޓުކޮށްފައިވާއިރު އެ ދުވަހު ގާތްގަނޑަކަށް 2،000 މީހުން ހައްޔަރުކޮށްފައިވާ ކަމަށް ރިޕޯޓުތައް ބުނެ އެވެ. އަދި, 300 އަށްވުރެ ގިނަ ފުލުހުންނަށް ވެސް ވަނީ އަނިޔާވެފަ އެވެ.
ފަރަންސޭސިވިލާތުގެ ދާޚިލީ ވަޒީރު ލޮޣޯން ނުންޔޭޒް | އަނަދޮލު އޭޖެންސީ
ދަރިވަރުންގެ ހަރަކާތް ތަމްސީލުކުރާ ޖަމުއިއްޔާތަކުގެ އިތުރުން ވާތު ފިޔައިގެ އަދި ހައްދުފަހަނަޅާފައިވާ ވާތު ފިޔައިގެ ސިޔާސީ ގްރޫޕްތަކާ ގުޅިގެން، އޮކްޓޫބަރު 6 ވަނަ ދުވަހު ދެވަނަ ބުރެއްގެ މުޒާހަރާތައް ފެށުމަށް މިހާރު ދަނީ ގޮވާލަމުންނެވެ. މިއީ، ފުލުހުންގެ "އަނިޔާވެރިކަމާ" ދެކޮޅަށް ބާއްވާ މުޒާހަރާތަކެއް ކަމަށް، މުޒާހަރާތައް އިންތިޒާމުކުރާ ޖަމުއިއްޔާތަކުން ބުންޏެވެ.
ދަރިވަރެއްގެ ލޮލުގެ ފެނުން ގެއްލުން
ފަރަންސޭސިވިލާތުގެ މެދުތެރޭގައި އޮންނަ ސިޓީއެއް ކަމަށްވާ ތޫޚްގައި ކުރިއަށްދިޔަ މުޒާހަރާތަކުގެ ތެރެއިން އަނިޔާވި އުމުރުން 16 އަހަރުގެ ދަރިވަރެއްގެ އެއް ލޮލަށް ފެނުމުން މަހުރޫމުވެފައިވާ ކަމަށް އެ ގައުމުގެ ނޫހަކުން ރިޕޯޓުކޮށްފައިވެ އެވެ. އެ ކުއްޖާއަށް އަނިޔާވެފައި ވަނީ، އެލްބީޑީ-40 ގެ ނަންދީފައިވާ ނުރައްކާތެރި ބަޑިއަކުން ފުލުހަކު ހަމަލާދިނުމުން ކަމަށް ރިޕޯޓުތައް ބުނެ އެވެ. މި ކަމާ ގުޅިގެން ފުލުހުންނަށް ބޮޑެތި ފާޑުކިޔުންތަކެއް ވަނީ އަމާޒުވެފަ އެވެ.
އެ ކުއްޖާއަށް "އަދިވެސް ހޮސްޕިޓަލުގައި ފަރުވާދެމުންދާ" ކަމަށް ރިޕޯޓުތައް ބުނެ އެވެ. މި ހާދިސާއާ ގުޅިގެން ފުލުހުންގެ އިސް އޮފިޝަލަކު ވަނީ އެ ކުއްޖާއާ ސުވާލުކޮށްފަ އެވެ.
ދަރިވަރަކު ގަންބާލަން ފުލުހަކު މަސައްކަތްކުރި ކަމުގެ ތުހުމަތު
ފުލުހުންގެ އޮފިސަރަކު މުޒާހަރާގައި ބައިވެރިވަމުން ދިޔަ ދަރިވަރަކު ހައްޔަރު ކުރުމުގެ ތެރޭގައި ކޯރެއްގެ ތެރެއަށް އެ ކުއްޖާ ވައްޓައިލާ، އެ ކުއްޖާ ގަންބައިލަން މަސައްކަތް ކުރަމުންދާ ކަމަށް ބުނާ މަންޒަރުތައް ފެންނަ ވީޑިއޯއެއް ވެސް ސޯޝަލް މީޑިއާގައި ވަނީ އާންމުވެފަ އެވެ. "އެ ޒުވާނާގެ ބޯ ގިނަ ސިކުންތުތަކެއް ވަންދެން ފެނު އަޑީގައި ހިފަހައްޓައިގެން [ފުލުސް މީހާ] ހުންނަ މަންޒަރު ފެނޭ،" ފަރަންސޭސިވިލާތުގެ ސޯޝަލް މީޑިއާ އެކައުންޓެއްގައި ބުނެފައިވެ އެވެ.
ނަމަވެސް، މި ހާދިސާ ހިނގި ބެލްފޯގެ ޕަބްލިކް ޕްރޮސެކިއުޓާ ޕޯލް-އެދުވާ ލަލުވާ ވަނީ މި ތުހުމަތުތައް ދޮގުކުރައްވާފަ އެވެ. އޭނާ ވިދާޅުވީ، ފުލުހުންގެ އޮފިސަރު ހައްޔަރުކުރަން މަސައްކަތް ކޮށްފައި ވަނީ އިމާރާތްތަކާއި މުދަލުގައި ހުޅުޖަހަން މަސައްކަތްކުރި މީހެއް ކަމަށެވެ. އަދި، އެ ދެ މީހުން އެކީގައި ކޯރަށް ވެއްޓުނީ ކަމަށާއި، އެ މީހާ ކޯރުން ނަގައި، ހައްޔަރު ކޮށްފައިވާ ކަމަށް ވެސް ލަލުވާ ވިދާޅުވި އެވެ.
އެ ވީޑިއޯއަށް ރައްދުދެއްވައި، ގާނޫނުހަދާ މަޖިލީހުގައި ވާތު ފިޔައިގެ ޕާޓީ ލަ ފްރޯންސް އަންސޫމީސް ތަމްސީލު ކުރައްވާ މެންބަރު އަންތުވާން ލޫމް ވަނީ، ދާޚިލީ ވަޒީރަށް ނިސްބަތްކުރައްވައި،"ތި ބޭފުޅާގެ ޒިންމާގެ ދަށުގައި ތިބި މީހުންނަށް ހަމަޖެހުން އިސްކުރުމަށް އަންގަން" ގޮވާލައްވައި، ސޯޝަލް މީޑިއާގައި ޕޯސްޓެއް ކުރައްވާފަ އެވެ. "މި އަމަލަކީ އަމަންއަމާންކަން ބެލެހެއްޓުމުގެ އެއްވެސް ގަވާއިދަކާ ފެތޭ ކަމެއް ނޫން. އެއްވެސް ގަވާއިދަކާ ނުފެތޭ." ލޫމް ލިޔުއްވާފައިވެ އެވެ.
މަސްދަރު: އަނަދޮލު އޭޖެންސީ
