"މި ތަނުގައި ދިރިއުޅުން ވަރަށް ދަތި": ވިލާތުގައި ޒުވާނުންގެ ރުޅިވެރިކަން ފަޅައިގެންގޮސް ގްރީސް ހުއްޓުމަކަށް!
22 އޮކްޓޯބަރު 2026 | ބުރާސްފަތި 08:28ވިލާތުގެ އެކި ގައުމުތަކުގައި ކުރިއަށްދާ މުޒާހަރާތަކާ ގުޅިގެން، ދިރިއުޅުމުގެ ޚަރަދުތައް ބޮޑުވުމާއި ތައުލީމީ ދާއިރާގެ ވަސީލަތްތައް މަދުވުމުގެ ކަންބޮޑުވުމާއެކު ގްރީސްގެ އެތައް ހާސް ދަރިވަރުންނާއި މުދައްރިސުން އިހުތިޖާޖުކޮށްފި. މި ހަރަކާތްތަކުގެ ސަބަބުން ސަރުކާރަށް ފިއްތުންތައް ކުރިމަތިވެފައިވާއިރު، އާންމުންގެ ޝަކުވާތަކަށް ހައްލު ހޯދައިދިނުމަށް ގިނަ އަދަދެއްގެ ފައިސާ ޚަރަދުކުރާނެ ކަމަށް ބޮޑުވަޒީރު ވަނީ ވިދާޅުވެފައި
ދިރިއުޅުމުގެ ޚަރަދުތައް ބޮޑުވުމުމާ ގުޅިގެން ގްރީސްގެ ވެރިރަށް އަތީނާގައި ކުރަމުންދާ މުޒާހަރާގެ ބައިވެރިންތަކެއް | އޭޕީ
ތައުލީމީ ދާއިރާގެ ވަސީލަތްތައް ރަނގަޅުކުރުމާއި ކިލާސްތަކުގައި ކިޔަވާ ކުދިންގެ އަދަދު މަދުކުރުން ހިމެނޭހެން، ތައުލީމަށް ކުރާ ޚަރަދު އިތުރުކުރުމަށް ގޮވާލައި ގްރީސްގެ އެކި ރަށްތަކުގައި އެތައް ހާސް ދަރިވަރުންނާއި މުދައްރިސުން މުޒާހަރާކޮށްފި އެވެ.
މި މުޒާހަރާތަކަކީ ދިރިއުޅުމުގެ ޚަރަދުތައް އުފުލުމާއި ކޮރަޕްޝަނުގެ ތުހުމަތުތަކާ ގުޅިގެން އުފެދުނު ނުރުހުން ފުލުހުންނާ ދެމެދު ހިނގި ކުރިމަތިލުންތަކަކަށް ބަދަލުވެ، މުދަލަށް ބޮޑެތި ގެއްލުންތަކެއް ލިބިގެންދިޔަ ފަރަންސޭސިވިލާތާއި އަލްބޭނިޔާ ހިމެނޭހެން، މި މަހު ވިލާތުގެ އެކި ކަންކޮޅުތަކުގައި ޒުވާނުން އިސްނަގައިގެން ކުރިއަށްގެންދިޔަ މުޒާހަރާތަކާ ގުޅިގެން އުފެދިފައިވާ ހަރަކާތްތަކެކެވެ.
މަދަރުސާތަކާއި ޔުނިވަރސިޓީތަކުގެ ދަރިވަރުން ހިމެނޭހެން ގާތްގަނޑަކަށް 10,000 ބައިވެރިން ބުދަ ދުވަހު ވެރިރަށް އަތީނާ އަދި ވެރިރަށުގެ އަވަށްތަކުގައި ސުލްހަވެރިކަމާއެކު އެއްވި ކަމަށް ގްރީސްގެ ފުލުހުން ބުންޏެވެ. މި އެއްވުމުގެ ކުރިން ދަރިވަރުން ވަނީ ގާނޫހަދާ މަޖިލިސް ކައިރީގައި ރޭގަނޑު އިށީނދެ ތިބުމުގެ އިހުތިޖާޖެއް ކުރިއަށްގެންގޮސްފަ އެވެ. އަދި، އެ މަޖިލިސް ބޭރަށް އެއްވެ، "ގްރީސުން ފެށިގެން ފަރަންސޭސިވިލާތާ ހަމައަށް، އަޅުގަނޑުމެން ބޭނުމީ ހިލޭ ދެވޭ އާންމު ތައުލީމު،" މުޒާހަރާގެ ބައިވެރިން އަޑުއުފުލަމުން ގޮވި އެވެ.
ތައުލީމީ ވަސީލަތްތަކަށް އެދި ކުރި މުޒާހަރާތައް ދިރިއުޅުމުގެ ޚަރަދުތައް އިންތިހާއަށް އުފުލުމާ ދެކޮޅަށް ހިންގާ ވަރުގަދަ އިހުތިޖާޖުތަކަކަށް ބަދަލުވެފައިވާ ފަރަންސޭސިވިލާތާއި ވިލާތުގެ އެހެން ސަރަހައްދުތަކުގައި ކުރިއަށްދާ މުޒާހަރާތަކާ އެއްބައިވަންތަކަން ހާމަކުރުމުގެ ގޮތުން، ތެސަލޮނީކީ، ޕާތުރާ، ލާރިސާ އަދި ގްރީސްގެ އެހެނިހެން ރަށްތަކުގައި ވެސް އެތައް ބަޔަކު ވަނީ މި ހަރަކާތްތަކާ ގުޅިފަ އެވެ.
ދިރިއުޅުމުގެ ޚަރަދުތަކުގެ ކާރިސާ
އިގުތިސާދު ދަށަށްދާ ދަނޑިވަޅެއްގައި 2027 ގެ މެދުތެރޭގައި އިންތިޚާބު ބޭއްވުމަށް އެ ޤައުމު ތައްޔާރުވަމުން އަންނައިރު، މި މުޒާހަރާތަކުގެ ސަބަބުން ބޮޑުވަޒީރު ކިރިޔާކޮސް މިތުސޯތައިކިސް އަދި އޭނާގެ ކަނާތުފިޔައިގެ މެދުމިނުގެ ސަރުކާރަށް ވަނީ އިތުރު ފިއްތުންތަކާ ކުރިމަތިލާން ޖެހިފަ އެވެ.
2009 އިން ފެށިގެން 2018 އާ ދެމެދު ގްރީސްއަށް ކުރިމަތިވި ދަރަނީގެ ބޮޑު ކާރިސާގައި، ވިލާތުގެ އިއްތިހާދާއި (އީޔޫ) އިންޓަނޭޝަނަލް މަނިޓަރީ ފަންޑުން (އައިއެމްއެފް) ދިން ގާތްގަނޑަކަށް 326 ބިލިޔަން ޑޮލަރުގެ މާލީ އެހީގެ ތިން ޕެކޭޖުގެ ބަދަލެއްގެ ގޮތުން، ޚަރަދުތައް ކުޑަކުރުމަށް ސަރުކާރުން އެއްބަސްވި އެވެ. ނަމަވެސް، މި ފިޔަވަޅުތަކުގެ އަސަރު ކޮށްފައި ވަނީ ވިލާތުގެ އެންމެ ފަގީރުންގެ ތެރޭގައި ހިމެނޭ އަދި އުޖޫރަ އިތުރުނުވުމާއި، ކުލި ބޮޑުވުމާއި ހަކަތައިގެ ޚަރަދުތައް އުފުލުމުގެ ދަތިތައް ތަހައްމަލުކުރަމުންދާ ގްރީސްގެ މަސައްކަތްތެރިންނަށެވެ.
މަހަކު އެވުރެޖުކޮށް ލިބޭ 1,685 ޑޮލަރުގެ އާމްދަނީ އަދިވެސް ހުރީ 2009 ވަނަ އަހަރުގެ މިންވަރުގައި ކަމަށްވާއިރު، ކުލި އިންތިހާއަށް އުފުލުމުގެ ސަބަބުން ގްރީސްގެ ގިނަ އަދަދެއްގެ ޒުވާނުންނަށް ވަނީ ރަށްތަކުން ބޯހިޔާވަހިކަން ހޯދުމަށް ނުކުޅެދިފަ އެވެ.
"މި ތަނުގައި ދިރިއުޅުން ވަރަށް ދަތި؛ ކުލި އިންތިހާއަށް ބޮޑު، ގެތައް ވަރަށް ކުޑަ. އަޅުގަނޑުމެންގެ ކުއްޔާއި، ކަރަންޓާއި، މި ތަނުގައި ދިރިއުޅުމުގެ ޚަރަދުތައް ހަމަޖައްސައިދޭން އަޅުގަނޑުމެންގެ މައިންބަފައިންނަށް ދެކޮޅެއް ނުޖެއްސޭ،" އަތީނާގައި ކުރިއަށްދިޔަ މުޒާހަރާގައި ބައިވެރިވި އުމުރުން 21 އަހަރުގެ ޔުނިވަރސިޓީ ދަރިވަރު ޔޮރްޔިއާ ފުކީދޫ މީޑިއާއަށް ބުންޏެވެ.
ބުދަ ދުވަހުގެ މުޒާހަރާތަކުގެ ތެރޭގައި، ކުޑަ އުޖޫރައާއި މުވައްޒަފުންގެ ދަތިކަމާ ދެކޮޅަށް ޕްރައިމަރީ އަދި ސާނަވީ މަދަރުސާތަކުގެ މުދައްރިސުން ކުރި ހަޅުތާލުތައް ހިމެނެ އެވެ. އަދި، ވަގުތީ މުދައްރިސުން ވަނީ ދާއިމީ ވަޒީފާތަކާއި ކިލާސްތަކުގެ ސައިޒު ކުޑަކުރުމަށް އެދިފަ އެވެ. މީގެ އިތުރުން، އާންމު ޚިދުމަތުގެ ދާއިރާގެ މުވައްޒަފުންނާއި އެހެނިހެން ޔޫނިއަންތަކުން ވެސް ވަނީ މި މުޒާހަރާތަކުގައި ބައިވެރިވެފަ އެވެ.
ދަރިވަރުންގެ އާ އެކޮމޮޑޭޝަންތައް ބިނާކުރުމަށާއި ވަސީލަތްތައް ތަރައްގީކުރުމަށް ސަރުކާރުން 823 މިލިޔަން ޑޮލަރަށް ވުރެ ގިނަ ފައިސާ ޚަރަދުކުރަމުންދާ ކަން ފާހަގަކުރައްވައި، ދަރިވަރުންގެ ޑިމާންޑުތައް އަޑުއައްސަވަމުން ގެންދަވާ ކަމަށް މުޒާހަރާތަކުގެ ކުރިން ތައުލީމީ ވަޒީރު ސޯފިއާ ޒަޚަރައިކީ ވިދާޅުވި އެވެ.
އީރާނުގެ ހަނގުރާމައާއި އިންފްލޭޝަނާ ގުޅިގެން އާއިލާތަކަށާއި ވިޔަފާރިތަކަށް އުފުލިފައިވާ ހަކަތައިގެ ޚަރަދުތައް ހަމަޖެއްސުމަށް ޓަކައި، ދައުލަތުގެ ސަބްސިޑީއާއި އެހެނިހެން އިނާޔަތްތަކުގެ ގޮތުގައި ގާތްގަނޑަކަށް 1.12 ބިލިޔަން ޑޮލަރު ދިނުމަށް ވެސް މިތުސޯތައިކިސްގެ ސަރުކާރުން ވަނީ ވައުދުވެފަ އެވެ.
މަސްދަރު: އަލް ޖަޒީރާ
