ޣައްޒާއިން އިސްރާއީލު ސިފައިން ފޭބުމަށާއި އީރާނުގެ ނިއުކްލިއަރ މައްސަލައަށް އަވަސް ހައްލެއް ގެނައުމަށް ޤަތަރާއި ފަރަންސޭސިވިލާތުން ގޮވާލައިފި
22 އޮކްޓޯބަރު 2026 | ބުރާސްފަތި 06:18ޣައްޒާގައި ހަމަލާ ބަދަލުކުރުން ހުއްޓާލައި އިސްރާއީލު ސިފައިން އެ ސަރަހައްދުން ފޭބުމަށާއި، ހުޅަނގު އައްސޭރީގައި ޔަހޫދީން ވަޒަންވެރިކުރުން ހުއްޓާލުމަށް ޤަތަރާއި ފަރަންސޭސިވިލާތުން ގޮވާލައިފި. މީގެއިތުރުން، އީރާނުގެ ނިއުކްލިއަރ މައްސަލައަށް ޑިޕްލޮމެޓިކް ހައްލެއް ހޯދުމަށާއި، ލުބުނާނުގެ އިސްތިގުލާލު ދަމަހައްޓައި ސޫރިޔާގެ ހަމަޖެހުމަށް މަސައްކަތްކުރުމަށް ދެ ޤައުމުން ވަނީ ބާރުއަޅާފައި
ޣައްޒާގެ ރައްޔިތުން ދިރިއުޅޭ ގެދޮރު އިސްރާއީލުގެ ސިފައިންގެ ބެލުމުގެ ދަށުން ހަލާލުކޮށް ސުންނާފަތިކުރަނީ | އަނަދޮލު އޭޖެންސީ
ޤަތުލުއާންމު ހުއްޓާލުމަށް އެއްބަސްވެފައިވާ އިންތިޒާމުތަކުގެ ދަށުން ޣައްޒާއިން އިސްރާއީލު ސިފައިން ފޭބުމަށާއި، އިސްތިއުމާރުކޮށްފައިވާ ހުޅަނގު އައްސޭރީގައި ޔަހޫދީން ވަޒަންވެރިކުރުމުގެ ސިޔާސަތުތައް ނިމުމަކަށް ގެނައުމަށް ޤަތަރާއި ފަރަންސޭސިވިލާތުން ބުދަ ދުވަހު ގޮވާލައިފި އެވެ. ހަމަމިއާއެކު، އީރާނާ ގުޅިފައިވާ ނުތަނަވަސްކަމަށް ޑިޕްލޮމެޓިކް ހައްލެއް ހޯދުމަށް ވެސް ދެ ޤައުމުން ވަނީ ބާރުއަޅާފަ އެވެ. މި ވިސްނުންތައް ހާމަކޮށްފައި ވަނީ، ފަރަންސޭސިވިލާތުގެ ރައީސް އިމެނުއެލް މެކްރޮން ގަލްފުގެ ބައެއް ޤައުމުތަކަށް ކުރައްވަމުން ގެންދަވާ ދަތުރުފުޅުގައި ޤަތަރުގެ އަމީރު ޝައިޚް ތަމީމް ބިން ޙަމަދު އަލްޘާނީއާއެކު ދޯހާގައި ބޭއްވެވި މަޝްވަރާތަކަށް ފަހު ނެރުނު ގުޅިފައިވާ ބަޔާނެއްގަ އެވެ.
އިސްތިއުމާރުކޮށްފައިވާ ހުޅަނގު އައްސޭރީގެ އެއްވެސް ބައެއް ވެރިވެގަތުމާ ދެކޮޅުކަން ދެ ޤައުމުން އަލުން ކަށަވަރުކޮށްދިންއިރު، އިސްރާއީލުން ވަޒަންވެރިކުރުމަށް ގެންގުޅޭ ސިޔާސަތުތަކާއި ޓެރެރިސްޓު ވަޒަންވެރިން ހިންގާ ހަމަނުޖެހުންތައް ނިމުމަކަށް ގެނައުމަށް ވެސް ވަނީ ގޮވާލާފަ އެވެ. މީގެއިތުރުން، އެއްބަސްވެފައިވާ އިންތިޒާމުތަކާ އެއްގޮތަށް އިސްރާއީލުގެ ސިފައިން ޣައްޒާއިން ފޭބުމާއި، ރައްކާތެރިކަމާއެކު އެއްވެސް ހުރަހެއް ނެތި އަވަހަށް އިންސާނީ އެހީ ފޯރުކޮށްދިނުން ހިމެނޭހެން، ޣައްޒާގައި ހަމަލާ ބަދަލުކުރުން ހުއްޓާލުމުގެ އެއްބަސްވުން ފުރިހަމައަށް ތަންފީޒުކުރުމުގެ މުހިންމުކަން ދެ ޤައުމުން ފާހަގަކުރި އެވެ. ހަމަމިއާއެކު، ދެ ދައުލަތުގެ ހައްލަށާއި ފަލަސްތީނުގެ އިންތިޚާބު ބޭއްވުމަށް ފުރިހަމައަށް ތާއީދުކުރާކަން ވެސް ދެ ޤައުމުން ވަނީ ބުނެފަ އެވެ.
އީރާނުގެ މައްސަލައިގައި، ސަރަހައްދީ ޤައުމުތަކަށް އީރާނުން ދިން އަސްކަރީ ހަމަލާތައް ޤަތަރާއި ފަރަންސޭސިވިލާތުން ވަނީ ކުށްވެރިކޮށްފަ އެވެ. އަދި، ތެހެރާނުގެ ނިއުކްލިއަރ ޕްރޮގްރާމަކީ ހަމައެކަނި ސުލްހަވެރި ބޭނުންތަކަށް ޚާއްސަ ޕްރޮގްރާމެއް ކަން ކަށަވަރުކުރުމަށް ޓަކައި ޑިޕްލޮމެޓިކް ހައްލެއް ހޯދުމަށް ދެ ޤައުމުން ގޮވާލި އެވެ. ސަރަހައްދުގެ ނުތަނަވަސްކަން ކުޑަކުރުމަށް ޤަތަރުން ކުރަމުންދާ މެދުވެރިއެއްގެ މަސައްކަތްތަކަށް ފަރަންސޭސިވިލާތުން ތައުރީފުކުރި އިރު، އެއްވެސް ފީއެއް ދެއްކުމަކާ ނުލައި ހުރްމުޒް ކަނޑުއޮޅިން ދަތުރުފަތުރުކުރުމުގެ ފުރިހަމަ މިނިވަންކަން އަލުން ޤާއިމުކުރުމަށް ވެސް ދެ ޤައުމުން ވަނީ ބާރުއަޅާފަ އެވެ.
ލުބުނާނާ ގުޅޭ ގޮތުން ދެ ޤައުމުން ތާއީދުކޮށްފައި ވަނީ، އެ ޤައުމުގެ އިސްތިގުލާލު އަލުން ގާއިމުކުރުމަށާއި، ޙިޒްބުﷲ އިން ހަތިޔާރު ބެހެއްޓުމަށާއި، އިސްރާއީލުގެ ސިފައިން އެއްކޮށް ފޭބުން ކަށަވަރުކުރުމަށް އެކުލަވާލާފައިވާ ތިން ފަރާތުގެ އޮނިގަނޑު އެއްބަސްވުން ފުރިހަމައަށް ތަންފީޒުކުރުމަށެވެ. މިއާއެކު، އދ. ގެ ސުލްހަ ބަލަހައްޓާ މިޝަންގެ ދައުރު ހަމަވުމަށް ފަހު ސަލާމަތީ ހުސްކަމެއް އުފެދިދާނެ ކަމުގެ އިންޒާރު ދެ ޤައުމުން ދިން އިރު، ލުބުނާނުގެ ކަމާބެހޭ އިދާރާތަކަށާއި އަސްކަރިއްޔާއަށް ބައިނަލްއަގުވާމީ އެހީތެރިކަން މެދުނުކެނޑި ފޯރުކޮށްދިނުމަށް ވެސް ވަނީ ގޮވާލާފަ އެވެ.
ސޫރިޔާގެ ހާލަތާ ގުޅޭ ގޮތުން، އެ ޤައުމުގެ ކަމާބެހޭ ފަރާތްތަކާ ގުޅިގެން ހަމަޖެހުން ގާއިމުކުރުމަށާއި އިގުތިސާދު އަލުން އާރާސްތުކުރުމުގެ މަޝްރޫއުތަކަށް އެއްބާރުލުން ދިނުމަށް ތައްޔާރަށް ތިބިކަން ދެ ޤައުމުން ހާމަކުރި އެވެ. ސަރަހައްދީ މައްސަލަތަކުގެ އިތުރުން، ދިފާޢީ، ސަލާމަތީ އަދި އިގުތިސާދީ ދާއިރާއިން އެއްބާރުލުން ފުޅާކުރުމަށް ވެސް ޤަތަރާއި ފަރަންސޭސިވިލާތުން ވަނީ އެއްބަސްވެފަ އެވެ. ކުވައިތު، ޔުނައިޓެޑް އަރަބް އެމިރޭޓްސް، ބަޙްރައިން އަދި ސައުދީ އަރަބިއްޔާ ހިމެނޭހެން މެކްރޮން ގަލްފު ސަރަހައްދަށް ކުރެއްވި ދަތުރުފުޅުގެ މައިގަނޑު މަގުސަދަކީ، އިސްތިރާޖީ އަދި އިގުތިސާދީ ގުޅުންތައް ބަދަހިކުރުމާއި، ސަރަހައްދީ ހަމަޖެހުމާއި ހުރްމުޒް ކަނޑުއޮޅިން ދަތުރުފަތުރުކުރުމުގެ މިނިވަންކަން އަލުން ގާއިމުކުރުމަށް ކުރެވޭ މަސައްކަތްތަކަށް އެއްބާރުލުން ދިނުމެވެ.
މަސްދަރު: އަނަދޮލު އޭޖެންސީ
