އީރާނުގެ ރައީސާއި ޤަތަރުގެ އަމީރު މޮސްކޯގައި ބައްދަލުކުރައްވައި އެއްބާރުލުން އިތުރުކުރަން ނިންމަވައިފި
28 އޮކްޓޯބަރު 2026 | ބުދަ 09:23އީރާނާއި ޤަތަރާ ދެމެދު އޮތް ސިޔާސީ އަދި އިގުތިސާދީ ގުޅުންތައް ހަކަތައިގެ ދާއިރާއިން އިތުރަށް ފުޅާކުރުމަށް ދެ ޤައުމުގެ އިސްވެރިން މަޝްވަރާކުރައްވައިފި. މީގެ އިތުރުން މެދުއިރުމަތީގެ ނުތަނަވަސްކަން ކުޑަކުރުމަށް ޑިޕްލޮމެސީގެ ބޭނުންހިފުމަށާއި، ހަނގުރާމަ ހުއްޓުވުމަށް ކުރެވޭ މަސައްކަތްތަކަށް އެއްބާރުލުން ދިނުމަށް ޤަތަރުން ވަނީ އީރާނަށް ގޮވާލާފައި
އީރާނުގެ ރައީސް މަސްޢޫދު ޕީޒިޝްކިޔާން ރަޝިޔާގެ ވެރިރަށް މޮސްކޯގައި ޤަތަރުގެ އަމީރު ޝައިޚް ތަމީމް ބިން ޙަމަދު އާލް ޘާނީއާ ބައްދަލުކުރައްވަނީ | އަނަދޮލު އޭޖެންސީ
ރަޝިޔާގެ ވެރިރަށް މޮސްކޯގައި ބޭއްވި ހަކަތައާ ބެހޭ ފޯރަމެއްގެ ހަވާސާގައި، އީރާނުގެ ރައީސް މަސްޢޫދު ޕީޒިޝްކިޔާން، ޤަތަރުގެ އަމީރު ޝައިޚް ތަމީމް ބިން ޙަމަދު އާލް ޘާނީއާ ބައްދަލުކުރައްވައި، މުހިންމު މަޝްވަރާތަކެއް ކުރައްވައިފި އެވެ.
އަންގާރަ ދުވަހު އީރާނުގެ ދައުލަތުގެ ޓީވީން ރިޕޯޓުކުރި ގޮތުގައި، ދެ ޤައުމުގެ އިސް ލީޑަރުން ވަނީ "ތެހްރާނާއި ދޯހާއާ ދެމެދު އޮތް ގުޅުމުގެ މިހާރުގެ ހާލަތު މުރާޖާކުރައްވައި، ސިޔާސީ އަދި އިގުތިސާދީ ގުޅުންތައް ފުޅާކުރުމަށާއި، ދެ ފަރާތުގެ އެއްބާރުލުން އިތުރު ހަރުފަތަކަށް ގެންދިއުމަށް ޓަކައި މިހާރު ހުރި ގާބިލުކަން ފުރިހަމައަށް ބޭނުންހިފުމުގެ މުހިންމުކަމުގެ މައްޗަށް ބާރުއަޅުއްވާފައ،" އެވެ.
މޮސްކޯގައި ކުރިއަށްދިޔަ ގޭސް އެކްސްޕޯޓްކުރާ ޤައުމުތަކުގެ ފޯރަމްގެ (ޖީއީސީއެފް) ހަވާސާގައި ބޭއްވުނު މި ބައްދަލުވުމުގައި، ހަކަތައިގެ ދާއިރާއިން ދެ ޤައުމުގެ ދެމެދުގައި އޮތް ގުޅުން އިތުރަށް ފުޅާކުރުމާ ގުޅޭގޮތުން ވެސް މަޝްވަރާކުރެވުނު ކަމަށް ރިޕޯޓުތައް ބުނެ އެވެ.
ހަމަމިއާއެކު، އެމެރިކާއާއި އިސްރާއީލުން އީރާނާ ދެކޮޅަށް ކުރަމުންދާ ޣައިރުގާނޫނީ ހަނގުރާމައާ ގުޅޭ އެއްވެސް މަޝްވަރާއެއް މި ބައްދަލުވުމުގައި ހިނގި ކަމަކަށް ރިޕޯޓުތަކުގައި ފާހަގަކޮށްފައެއް ނުވެ އެވެ. މި ހަނގުރާމައިގެ ތެރޭގައި، ޤަތަރު ހިމެނޭހެން މެދުއިރުމަތީގެ އެކި ސަރަހައްދުތަކުގައިވާ އަމާޒުތަކަށް އީރާނުން ވަނީ މިސައިލާއި ޑްރޯން ހަމަލާތައް ފޮނުވާލާފަ އެވެ. އެ ހަމަލާތައް އަމާޒުކޮށްފައި ވަނީ އެމެރިކާގެ އަސްކަރީ މަރުކަޒުތަކަށެވެ.
ގާތްގަނޑަކަށް އަށް މަސް ދުވަސް ވެފައިވާ މި ހަނގުރާމަ ނިމުމަކަށް ގެނައުމަށް ކުރެވެމުންދާ މެދުވެރިއެއްގެ މަސައްކަތްތަކުގައި ދޯހާއިން ދަނީ އިސް ދައުރެއް އަދާކުރަމުންނެވެ. އަންގާރަ ދުވަހު ބޭއްވި ހަފުތާގެ ނޫސްވެރިންގެ ބައްދަލުވުމުގައި، ޤަތަރުގެ ޚާރިޖީ ވުޒާރާގެ ތަރުޖަމާނު ވަނީ މެދުއިރުމަތީގެ މަސްރަހުގައި އުފެދިފައިވާ ނުތަނަވަސްކަން ކުޑަކުރުމަށް ޑިޕްލޮމެސީއަށް ފުރުސަތު ދިނުމުގެ ގޮތުން، ގަލްފުގެ ޤައުމުތަކަށް އިންޒާރު ދިނުން ހުއްޓާލުމަށް އީރާނަށް ގޮވާލައްވާފަ އެވެ.
މީގެ އިތުރުން، ހަނގުރާމަ ހުއްޓުވުމަށް ކުރެވޭ މެދުވެރިއެއްގެ މަސައްކަތްތަކަށް އެއްބާރުލުން ދިނުމަށާއި، އެމެރިކާއާއެކު ސުލްހަވެރި ހައްލެއް ހޯދުމަށް މަގުފަހިކުރުމުގެ ގޮތުން ޤަތަރުގެ ވަފުދެއް ތެހްރާނަށް ޒިޔާރަތްކޮށްފައިވާ ކަމަށް ވެސް ތަރުޖަމާނު ވިދާޅުވި އެވެ.
މަސްދަރު: އަލް ޖަޒީރާ
