ވަރުގަދަ ހަމަލާތަކަކަށް ތައްޔާރުވަމުންދާތީ، ކީވްއިން ފޭބުމަށް ބޭރުގެ ޑިޕްލޮމެޓުންނަށް ރަޝިޔާއިން ގޮވާލައިފި
4 އޮކްޓޯބަރު 2026 | އާދީއްތަ 02:51ޔޫކްރެއިންގެ އަސްކަރީ މަރުކަޒުތަކަށް އަމާޒުކޮށް ވަރުގަދަ ހަމަލާތަކެއް ދޭނެކަމުގެ އިންޒާރު ދެމުން، އެ ގައުމުގައި ތިބި ބޭރުގެ ޑިޕްލޮމެޓުންނާއި އާންމުން ވަގުތުން ފޭބުމަށް ރަޝިޔާގެ ޚާރިޖީ ވުޒާރާއިން އިލްތިމާސްކޮށްފި. މި އިންޒާރަށް ފަރުވާލެއް ނުބަހައްޓާ ފަރާތްތަކަށް ކުރިމަތިވެދާނެ ނޭދެވޭ ނަތީޖާއެއްގެ ޒިންމާ އަމިއްލައަށް އުފުލަންޖެހޭނެ ކަމަށް ބުނެ، ރަޝިޔާއިން ވަނީ ކީވްގެ އުމްރާނީ ވަސީލަތްތަކަށް ދޭ ހަމަލާތައް އިތުރުކޮށްފައި
ރަޝިޔާއިން ޑްރޯނެއް ބޭނުންކޮށް ޔޫކްރެއިންގެ ވެރިރަށް ކީވްގެ ޕިވްނީޗްނީ ބުރިޖަށް ދިން ހަމަލާއާ ގުޅިގެން ރޯވި އަލިފާންގަނޑު | އެކްސް/ޒެލެންސްކީ
ޔޫކްރެއިންގެ ވެރިރަށް ކީވްއަށް ދެމުންގެންދާ ހަމަލާތައް މެދުކެނޑުމެއްނެތި ކުރިއަށްގެންދާނެކަމަށް ބުނެ، އެ ސަހަރުގައި ތިބި ބޭރު ޤައުމުތަކުގެ ޑިޕްލޮމެޓުން ފޭބުމަށް ރަޝިޔާއިން ހޮނިހިރު ދުވަހު އަނެއްކާ ވެސް ގޮވާލައިފި އެވެ.
މިދިޔަ މެއި މަހު ވެސް މި ފަދަ އިންޒާރުތަކެއް ދީފައިވާ ރަޝިޔާގެ ޚާރިޖީ ވުޒާރާއިން ނެރުނު ބަޔާނެއްގައި ބުނީ، "ރަޝިޔާގެ އާންމު ރައްޔިތުންނާއި އާންމު އުމްރާނީ ވަސީލަތްތަކާ ދެކޮޅަށް ޔޫކްރެއިންގެ އަސްކަރިއްޔާއިން ހިންގަމުންދާ 'ޓެރަރިސްޓް' އަމަލުތަކަށް ރައްދުދިނުމުގެ ގޮތުން، ރަޝިޔާގެ އަސްކަރިއްޔާއިން ކީވްއާއި ޔޫކްރެއިންގެ އެހެނިހެން ސަހަރުތަކުގައިވާ އަސްކަރީ މަރުކަޒުތަކަށް އަމާޒުކޮށް ސިލްސިލާ ގޮތެއްގައި ހަމަލާތައް ދެމުން ގެންދާނެ" ކަމަށެވެ.
މި އިންޒާރުތަކަށް އެކަށީގެންވާ ސަމާލުކަން ދީފައިނުވާތީއާއި، ބޭރުގެ ގިނަ އެމްބަސީތަކަކުން ކީވްގައި އަދިވެސް ހަރަކާތްތެރިވަމުން ދާތީއާއި، ބޭރު ޤައުމުތަކުގެ އޮފިޝަލުން ޔޫކްރެއިނަށް ޒިޔާރަތްކުރަމުން ދާތީ، އެ ވުޒާރާއިން ވަނީ ކަންބޮޑުވުން ފާޅުކޮށްފަ އެވެ. "ރަޝިޔާގެ އަސްކަރިއްޔާއިން ވަރުގަދަ ރައްދުގެ ހަމަލާތައް ދިނުން ކުރިއަށް ގެންދާނެ،" އެ ވުޒާރާގެ ބަޔާނުގައި ބުނެފައިވެ އެވެ.
"ޑިޕްލޮމެޓިކް މިޝަންތަކުގެ މުވައްޒަފުން ހިމެނޭހެން، ބޭރު ގައުމުތަކުގެ ރައްޔިތުން ޔޫކްރެއިންގައި މަޑުނުކުރުމަށާއި އެ ގައުމަށް ދަތުރުނުކުރުމަށް ރަޝިޔާގެ ޚާރިޖީ ވުޒާރާއިން އަނެއްކާ ވެސް އިލްތިމާސްކުރަން. އަދި, މި އިންޒާރަށް ފަރުވާލެއް ނުބަހައްޓާ ފަރާތްތަކަށް ކުރިމަތިވެދާނެ ނޭދެވޭ ކޮންމެ ނަތީޖާއެއްގެ ޒިންމާ ނަގަންޖެހޭނީ އެ ފަރާތަކުން އަމިއްލައަށް،" ރަޝިޔާގެ ޚާރިޖީ ވުޒާރާއިން ބަޔާންކުރި އެވެ.
ފާއިތުވި މަސްތަކުގައި މޮސްކޯއާއި ކީވްއިން ވަނީ ހަމަލާބަދަލުކުރުންތައް އިތުރުކޮށްފަ އެވެ. މި ގޮތުން، ދެ ފަރާތުން ވެސް ހަމަލާތައް އަމާޒުކުރަމުންދަނީ ލޮޖިސްޓިކްސް މަރުކަޒުތަކާއި، ބަނދަރުތަކާއި، ހަކަތައިގެ އުމްރާނީ ވަސީލަތްތަކަށެވެ. ނަމަވެސް، އާންމު އުމްރާނީ ވަސީލަތްތަކަށް ގަސްދުގައި ހަމަލާދޭކަމަށް ދެ ޤައުމުން ވެސް އިންކާރުކުރެ އެވެ. ދެ ފަރާތުން ވެސް ބުނީ، ހަމަލާތައް އަމާޒުކުރަނީ އަސްކަރީ އަމާޒުތަކަށް ނުވަތަ އަސްކަރީ ހަރަކާތްތަކާ ގުޅުންހުރި ތަންތަނަށް ކަމަށެވެ.
ފަހަކަށް އައިސް ކީވްއަށް ދެމުންދާ ހަމަލާތައް ވަނީ ވަރަށް ބޮޑަށް އިތުރުވެފަ އެވެ. މީގެ ތެރޭގައި ދްނީޕްރޯ ކޯރު ހުރަސްކޮށް އަޅާފައިވާ ބްރިޖުތަކަށް ހަމަލާދީފައިވުން ފާހަގަކޮށްލެވޭއިރު، ހޮނިހިރު ދުވަހުގެ ކުރީކޮޅު ޕިވްނީޗްނީ ބްރިޖަށް ވެސް ވަނީ ހަމަލާދީފަ އެވެ.
މަސްދަރު: އަނަދޮލު އޭޖެންސީ
