ގަތަރުގެ އަމީރު ވެސް ވިދާޅުވީ ޔަމަނުގެ ސަރުކާރަށް ތާއީދުކުރުގައި ދެމިހުންނަވާނެ ކަމަށް!
6 އޮކްޓޯބަރު 2026 | އަންގާރަ 05:07ޔަމަނުގެ ވެރިރަށް މިނިވަންކުރުމަށް ސަރުކާރުން 'ޑޯން އޮފް ޔެމެން' ގެ ނަމުގައި އަސްކަރީ އޮޕަރޭޝަނެއް ފަށާފައިވާއިރު، ގަތަރުން ވަނީ އެ ގައުމުގެ ސިޔާދަތާއި ސުލްހައަށް ފުރިހަމައަށް ތާއީދުކުރާނެކަމުގެ ޔަގީންކަން ދީފައި. ސަރުކާރުގެ ފައުޖުތަކުން ބާބް އަލް-މަންދަބު ކަނޑުއޮޅި ހިމެނޭ ސަރަހައްދުގައި ކުރިއެރުންތައް ހޯދަމުންދާއިރު، މިއީ 2014 ވަނަ އަހަރުން ފެށިގެން ހޫޘީންނާ ދެކޮޅަށް ކުރަމުންދާ ހަނގުރާމައިގެ އާ މަރުހަލާއެއް
ގަތަރުގެ އަމީރު ޝައިޚް ތަމީމް ބިން ހަމަދު އަލް ޘާނީ ރަސްމިއްޔާތެއްގައި ބައިވެރިވެވަޑައިގަންނަވަނީ | އަނަދޮލު އޭޖެންސީ
ޔަމަނުގެ އެއްބައިވަންތަކަމާއި، ސިޔާދަތާއި އަދި ސަރަހައްދީ ރައްކާތެރިކަމަށް ގަތަރުން ދެމުންގެންދާ އެއްބާރުލުން ކުރިއަށް އޮތް ތަނުގައި ވެސް ދަމަހައްޓަވާނެކަމަށް ގަތަރުގެ އަމީރު ޝައިޚް ތަމީމް ބިން ހަމަދު އަލް ޘާނީ ހޯމަ ދުވަހު ވައުދުވެވަޑައިގަންނަވަފި އެވެ. އަދި, އެ ގައުމަށް ސުލްހައާއި ހަމަޖެހުން ގެނައުމަށް ކުރަމުންދާ މަސައްކަތްތަކަށް ވެސް އެއްބާރުލުން ދެއްވާނެކަމަށް އޭނާ ވިދާޅުވި އެވެ.
ރަސްމީ ސަބާ ނޫސް އޭޖެންސީން ބުނީ، ޝައިޚް ތަމީމްގެ މި މެސެޖު ޔަމަނު ސަރުކާރުގެ ޕްރެޒިޑެންޝަލް ލީޑަރޝިޕް ކައުންސިލްގެ ޗެއާމަން ރަޝާދު އަލް-ޢަލީމީއަށް ފޮނުއްވާފައިވާ ކަމަށެވެ. މިއީ، ދެ ޤައުމުގެ ގުޅުމާއި ޔަމަނުގެ މަސްރަހާ ގުޅޭގޮތުން ކުރިން ފޮނުއްވި ސިޓީއަކަށް ދެއްވި ޖަވާބެއްކަމަށް ވެސް އެ ނޫހުން ބުނެފައިވެ އެވެ.
ސަލާމަތާއި، ސުލްހަމަސަލަސްކަމާއި އަދި ތަރައްގީއަށް ޔަމަނުގެ ރައްޔިތުން ކުރަމުންދާ އުއްމީދުތަކަށް ޝައިޚް ތަމީމް ވަނީ ތާއީދުކުރައްވާފަ އެވެ. ހަމަމިއާއެކު، ދެ ޤައުމުގެ ދެމެދުގައިވާ ގުޅުން އިތުރަށް ބަދަހިކުރުމަށް ދޯހާއިން އަހައްމިއްޔަތުކަން ދޭކަން އޭނާ ފާހަގަކުރެއްވި އެވެ.
އަމީރުގެ މި މެސެޖު ފޮނުއްވާފައި ވަނީ، ޔަމަނުގެ ހަތިޔާރުއެޅި ހޫޘީ ޖަމާއަތާ ދެކޮޅަށް ޔަމަނުގެ ސަރުކާރު ސިފައިން 'ޑޯން އޮފް ޔެމެން' ގެ ނަމުގައި ޚާއްސަ އަސްކަރީ އޮޕަރޭޝަނެއް ފަށާފައިވާ ދަނޑިވަޅެއްގަ އެވެ. ހޯމަ ދުވަހުގެ ކުރީކޮޅު އަލް-ޢަލީމީ ވިދާޅުވީ، މި އޮޕަރޭޝަންގެ އަމާޒަކީ ވެރިރަށް ޞަންޢާ މިނިވަންކޮށް، ހޫޘީންގެ ބާރުގެ ދަށުން ދައުލަތުގެ މުއައްސަސާތައް ސަލާމަތްކުރުން ކަމަށެވެ.
ސަރުކާރުގެ ފައުޖުތަކުން ވަނީ އެކި ސަރަހައްދުތަކުގައި ކުރިއެރުންތައް ހޯދާފަ އެވެ. މި ގޮތުން، އިސްތިރާޖީ ގޮތުން މުހިންމު ބާބް އަލް-މަންދަބު ކަނޑުއޮޅި ހިމެނޭ ސަރަހައްދުގައި ޔަމަނުގެ އަސްކަރިއްޔާއިން ކުރިއެރުންތަކެއް ހޯދާފައިވާ ކަމަށް ރިޕޯޓުތައް ބުނެ އެވެ. ނަމަވެސް، ހޫޘީން ވަނީ އެ ރިޕޯޓުތައް ދޮގުކޮށްފަ އެވެ.
2014 ވަނަ އަހަރު ވެރިރަށް ޞަންޢާއާއި ބައެއް ޕްރޮވިންސްތައް ހޫޘީން ހިފުމާ ގުޅިގެން ޔަމަނު ވަނީ އަހުލީހަނގުރާމައެއްގެ ތެރެއަށް ވެއްޓިފަ އެވެ. މިއާއެކު، ބައިނަލްއަގުވާމީ މުޖުތަމައުން ބަލައިގަނެފައިވާ ސަރުކާރަށް ތާއީދުކޮށް، ސައުދީ އަރަބިއްޔާ އިން އިސްވެ އަސްކަރީ އިއްތިހާދެއް އުފައްދައި، 2015 ވަނަ އަހަރު ހަނގުރާމައިގެ ތެރެއަށް ވަނެވެ.
އދ. މެދުވެރިވެގެން 2022 ވަނަ އަހަރު ސުލްހައިގެ އެއްބަސްވުމެއް އެކުލަވައިލާ، ހަމަލާ ބަދަލުކުރުން މެދުކަނޑާލާފައި އޮތުމަށް ފަހު، ސެޕްޓެންބަރު މަހު އަނެއްކާ ވެސް ވަނީ މަސްރަހު ހޫނުވެފަ އެވެ. އަދި، ދެ ފަރާތުގެ މެދުގައި ވަރުގަދަ ހަމަލާތަކެއް ބަދަލުކުރަން ފަށާފަ އެވެ.
މަސްދަރު: އަނަދޮލު އޭޖެންސީ
