އީރާނުން އެމެރިކާގެ 54 ވަނަ އެމްކިޔު-9 ޑްރޯން ވައްޓާލައިފި، ހުރްމުޒް ކަނޑުއޮޅީގެ ސަލާމަތީ ކަންބޮޑުވުންތައް އިތުރުވަނީ
20 އޮކްޓޯބަރު 2026 | އަންގާރަ 08:02ހުރްމުޒް ކަނޑުއޮޅީގެ ސަލާމަތީ ކަންކަމާ ގުޅޭގޮތުން އެމެރިކާއާއި އީރާނާ ދެމެދު ވެފައިވާ އެއްބަސްވުމަށް އަމަލުކުރުން ހުއްޓިފައިވަނީ ދެގައުމުގެ މެދުގައި އުފެދުނު ޚިޔާލުތަފާތުވުންތަކާ ގުޅިގެން. މީގެ އިތުރުން، އީރާނުގެ ބަނދަރުތައް ހިސާރުކޮށް އެކްސްޕޯޓަށް ހުރަސްއެޅުމުގެ ސަބަބުން ދެފަރާތުގެ ދެމެދުގައި އޮތް އަސްކަރީ ނުތަނަވަސްކަން ވަނީ އިތުރަށް ބޮޑުވެފައި
އެމެރިކާގެ އަސްކަރިއްޔާއިން ބޭނުންކުރާ އެމްކިޔު-9 މަރުކާގެ އަސްކަރީ ޑްރޯނެއް ކެލިފޯނިޔާގައި ހުރި އަސްކަރީ އެއާޕޯޓެއްގައި | އެމެރިކާގެ ކަނޑުގެ ސިފައިންގެ ނޭޝަނަލް ގާޑު
ހުރްމުޒް ކަނޑުއޮޅި މަތިން ދަތުރުކުރި އެމެރިކާގެ އެމްކިޔު-9 މަރުކާގެ އަސްކަރީ ޑްރޯނެއް ހުއްޓުވައި، ވައްޓާލާފައިވާ ކަމަށް އީރާނުގެ އިސްލާމިކް ރިވޮލޫޝަނަރީ ގާޑް ކޯއިން (އައިއާރްޖީސީ) އަންގާރަ ދުވަހު ބުނެފި އެވެ. މި ކަން ފުރަތަމަ ރިޕޯޓުކޮށްފައި ވަނީ އީރާނުގެ ފާރސް ނޫސް އޭޖެންސީންނެވެ.
އިސްތިރާޖީ ގޮތުން މުހިންމު މި ކަނޑުއޮޅި މަތިން އުދުހެމުންދަނިކޮށް އެ ޑްރޯން ވައްޓާލީ އަންގާރަ ދުވަހުގެ ހެނދުނުގެ ވަގުތެއްގައި ކަމަށް އައިއާރްޖީސީން ބުނި ކަމަށް އެ ނޫސް އޭޖެންސީން ވަނީ ބަޔާންކޮށްފަ އެވެ. އަދި، މިއީ، އައިއާރްޖީސީން ހަލާކުކޮށްލި އެމެރިކާގެ އެމްކިޔު-9 މަރުކާގެ 54 ވަނަ ޑްރޯން ކަމަށް އެ ލަޝްކަރުން ދައުވާކުރާ ކަމަށް ވެސް ފާރސް ނޫސް އޭޖެންސީން ބުންޏެވެ.
އެމެރިކާއާއި އިސްރާއީލުން އީރާނާ ދެކޮޅަށް ޣައިރުގާނޫނީ ހަނގުރާމައެއް ފެށީ 28 ފެބުރުވަރީ ގަ އެވެ. ހަމަލާތަކަށް ރައްދުދީ ތެހެރާނުން ގަލްފު ސަރަހައްދުގައި ހުރި އެމެރިކާގެ އަސްކަރީ މަގާމުތަކަށް ވަރުގަދަ ހަމަލާތަކެއްދީ، ހުރްމުޒް ކަނޑުއޮޅި އަމަލީ ގޮތުން ބަންދުކޮށްފަ އެވެ. އޭގެ ރައްދުގައި ވޮޝިންގޓަނުން ވަނީ އީރާނުގެ ބަނދަރުތައް ހިސާރުކޮށް، އެކްސްޕޯޓު ކުރުމަށް ހުރަސްއަޅާފަ އެވެ.
ހުރްމުޒް ކަނޑުއޮޅީގައި ދަތުރުފަތުރުގެ މިނިވަންކަން ކަށަވަރުކުރުމާ ގުޅޭ ގޮތުން އެމެރިކާއާއި އީރާނާ ދެމެދު ޖޫން މަހު ފަހުމުނާމާއެއްގައި ސޮއިކުރި އެވެ. ނަމަވެސް، އިސްތިރާޖީ މި ކަނޑުއޮޅީގެ ސަލާމަތީ ކަންކަމާމެދު އުފެދުނު ޚިޔާލުތަފާތުވުންތަކާ ހުރެ އެ އެއްބަސްވުމަށް އަމަލުކުރުން ވަނީ ހުއްޓުމަކަށް އައިސްފަ އެވެ.
މަސްދަރު: އަނަދޮލު އޭޖެންސީ
