އުތުރުތިލަފަޅު އެއްބަސްވުން އާންމު ނުކޮށްގެން ފަޔަށް ހިނިއަރައިގެން އުޅުނު ބަޔަކު އައިސް ބޭރު ބަޔަކަށް މި ގައުމަށް ފައިސާގެ ނުފޫޒާ ބާރު ފޯރުވަން ފުރުސަތު ދީފި: މީކާއިލް
21 އޮކްޓޯބަރު 2026 | ބުދަ 05:04ރަސްމާލެ މަޝްރޫއާ ގުޅިގެން އީގަލް ހިލްސް ކުންފުންޏާއެކު ވެފައިވާ އެއްބަސްވުމުގެ ތަފްސީލު ހާމަކުރުމަށް ގޮވާލައި މަޖިލީހަށް ގަރާރެއް ހުށަހަޅައިފި. މި ގަރާރުގައި ބިން ހިއްކުމުގެ ޚަރަދު ދައުލަތަށް ނުލިބުމާއި، ބޮޑު ސަރަހައްދެއް 99 އަހަރަށް ހިލޭ ދިނުމުގެ ކަންބޮޑުވުންތައް ފާހަގަކޮށްފައިވާއިރު، މިފަދަ ބޮޑު މަޝްރޫއެއް ސިއްރުކުރުމަކީ ކޮރަޕްޝަނަށް މަގުފަހިވާނެ ކަމެއް ކަމަށް ބުނެފައިވޭ
ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް | ރައްޔިތުންގެ މަޖިލިސް
އުތުރު ތިލަފަޅު އެއްބަސްވުން އާންމު ނުކޮށްގެން ކަމަށް ބުނެ މަގުތަކަށް ނުކުމެ، މުޒާހަރާކޮށް، ދެފަޔަށް ހިނިއަރައިގެން އުޅުނު ބަޔަކު ވެރިކަމަށް އައުމަށްފަހު ބޭރުގެ ބަޔަކަށް މި ދިވެހި ދައުލަތަށް ފައިސާގެ ނުފޫޒާ ބާރު ފޯރުވުމުގެ ފުރުސަތު ދީފައިވާ ކަމަށް ވިދާޅުވެ ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް ވިދާޅުވެއްޖެ އެވެ.
ބުދަ ދުވަހުގެ ރައްޔިތުންގެ މަޖިލީހުގެ ޖަލްސާގައި، އީގަލް ހިލްސް ކުންފުންޏާއެކު ދިވެހި ސަރުކާރުން "ރަސްމާލެ" މަޝްރޫއާ ގުޅޭގޮތުން ވެފައިވާ އެއްބަސްވުމުގެ އެންމެހައި ތަފްސީލުތައް ހާމަކުރުމަށް ގޮވާލައި، އެކަމާމެދު ރައްޔިތުންގެ މަޖިލީހުގެ މެންބަރު ދެކެވަޑައިގަންނަވާ ގޮތެއް ދެނެގަތުމަށްޓަކައި ހުށަހަޅާފައިވާ ގަރާރަށް ބަހުސް ކޮށްފަ އެވެ.
އެ ގަރާރު ހުށަހެޅުއްވުމަށްފަހު މީކާއިލް ވިދާޅުވީ އެ ގަރާރު ހުށަހެޅުމާއެކު މަޖިލީހުގެ ގަވާއިދު ބަދަލު ކުރުމަށް އިސްލާހެއް ހުށަހަޅާފައިވާ ކަމަށެވެ. ރައްޔިތުންގެ މަޖިލީހަށް ހުށަހަޅާ ގަރާރަށް ބަހުސްކުރަން ފެށުމުގެ ކުރިން ވޯޓަށް އަހަންޖެހޭ ގޮތަށް ހަދަން ވެރިކަންކުރާ ޕީއެންސީއަށް ތާއީދުކުރައްވާ ތުޅާދޫ ދާއިރާގެ އަމިއްލަ މެންބަރު އަބްދުލްހަންނާން އަބޫބަކުރު ވަނީ ހުށަހަޅުއްވާފަ އެވެ.
އެކަމަށް އިޝާރާތް ކުރައްވާ މީކާއިލް ވަނީ މިއީ ގަރާރުތަކަށް ހުރަސްއެޅުމަށް ކުރާ ކަމެއް ކަމަށެވެ. އީގަލް ހިލްސް މަޝްރޫއާ ގުޅިގެން މީގެ ކުރިން ބިލެއް ގޮތަށް އަމަލު ކުރަމުން އައި އެއްޗެއް ކުއްލިއަކަށް ރައްޔިތުންގެ މަޖިލީހުގެ ގަވާއިދަށް ބަދަލު ގެނަސްގެން އެ ބަހުސް ހުއްޓުވާނަމަ ނަމަ އެއީ މަޖިލީހުގެ މެންބަރުން ކަންބޮޑުވާން ޖެހޭ ކަމެއް ކަމަށް ވެސް މެންބަރު ވިދާޅުވި އެވެ.
ވަރަށް އަޑަށް ބާރުލައްވާ އެބަ ވިދާޅުވޭ ރާއްޖޭގެ ގާނޫނާ ގަވާއިދުތައް އޮތް ގޮތުން އީގަލް ހިލްސް އަކަށް އެތަނުގެ ބާރެއް ނުހިންގޭނެ އޭ. މިހާރު މި މަޖިލީހުގައި ކުރިއަށް ދާ ކަންކަމުން ވެސް އަޅުގަނޑުމެންނަށް ވަޒަން ކޮށްލަން އެނގޭ އެމީހުން މިތާ ވަޒަންވެރިވެ މިތަނުގައި އެ މީހުން މިތަނުގެ ޕްރޮޕަރޓީތައް ވިއްކާ 99 އަހަރަށް އާބާދުވުމަށްފަހު ދެން މި މަޖިލީހަށް ދެން މި ދިވެހި ދައުލަތަށް ފޯރުވާނެ ނުފޫޒު ރައްޔިތުންގެ މަޖިލީހުގެ ގަވާއިދަށް ގެންނަ ބަދަލުން އެކަނި ވެސް ސާފު. އަޅުގަނޑުމެންގެ ކަންބޮޑުވުމަކީ އަޅުގަނޑުމެންގެ ބާރު ނުފޯރާ ގޮތަކަށް، ފައިސާ ގެ ބާރު ފައިސާގެ ނުފޫޒު ދިވެހި ދައުލަތުގެ މައްޗަށް އުފެދިގެންދާނެ ގޮތަކަށް ސިއްރުވެރިކޮށް ވަންހަނާވެ ތިބެ މިފަދަ ކަންކަން ކުރާތީ. އެންމެ ކަންބޮޑުވަނީ ސިއްރުވެރިކަމާ ދެކޮޅަށް ކުރި ކެމްޕެއިނެއްގައި ޔޫޓީއެފް އެގްރީމަންޓް އާންމު ނުކޮށްގެން ދެފަޔަށް ހިނި އަރައިގެން އުޅުނު ބަޔަކު ވެރިކަމަށް އައިސް މިފަދަ އަމަލެއް ކުރާތީމީކާއިލް އަހުމަދު ނަސީމް
މީކާއިލް ހުށަހަޅުއްވާފައިވާ ގަރާރުގައި ބުނެފައިވަނީ، ރަސްމާލޭގައި "މޯލްޑިވްސް ވޯޓަރ ފްރަންޓް އެންޑް މެރީނާ" ގެ ނަމުގައި މަޝްރޫއެއް ހިންގުމަށް ދިވެހިރާއްޖޭގެ ސަރުކާރާއި، ޔޫއޭއީގެ އީގަލް ހިލްސް ކުންފުންޏާ ދެމެދު އެކުލަވާލާފައިވާ ކޮމާޝަލް ޓާމްސް އެގްރީމަންޓްގެ ތަފްސީލުތައް މިހާތަނަށް ވެސް ސަރުކާރުން ހާމަކޮށްފައި ނުވާތީ، އެ އެއްބަސްވުމުގެ އެންމެހައި ތަފްސީލުތައް ހާމަކުރުމަށް ގޮވާލާ ކަމަށެވެ.
ރަސްމާލެ އަކީ ރާއްޖޭގެ މުސްތަގުބަލުގެ ތަރައްގީއާ ގުޅިފައިވާ ގައުމުގެ އެންމެ އަގުބޮޑު ރައުސްމާލުކަން ފާހަގަކޮށް އެ ގަރާރުގައި ބުނެފައިވަނީ، ސަރުކާރުން މި މަޝްރޫއާ ގުޅޭ ގޮތުން މިހާތަނަށް އިއުލާނުކޮށްފައިވާ ތަފްސީލުތަކަށް ބަލާއިރު ކަންބޮޑުވާ ކަންތައްތަކެއް ހުރި ކަމަށެވެ.
އެގޮތުން ސަރުކާރާއި އީގަލް ހިސްލް ކުންފުންޏާ ދެމެދު ސެޕްޓެމްބަރު 21 ވަނަ ދުވަހު ސޮއިކޮށްފައިވާ އެއްބަސްވުމުގެ ހުރިހާ ތަފްސީލުތައް ހާމަކޮށްފައި ނުވާއިރު ރައްޔިތުންގެ ޓެކްސް ފައިސާ އިން ބިން ހިއްކުމަށް ފަހު އެ ބިން ހިއްކުމަށް ދިޔަ ޚަރަދު ދައުލަތަށް އަނބުރާ ނުލިބޭ ގޮތަށް އެއްބަސްވުން އެކުލަވާލާފައިވުމަކީ ވެސް ކަންބޮޑުވުމެއްކަން ފާހަގަކޮށްފައިވެ އެވެ.
އޭގެ އިތުރުން ރަސްމާލެ އިން ހިއްކާފައިވާ 500 ހެކްޓަރަށް ވުރެ ބޮޑު ސަރަހައްދެއް 99 އަހަރުގެ މުއްދަތަށް އީގަލް ހިލްސް އަށް ދީފައި ވުމާއި، އެކުއިޒިޝަން ކޮސްޓެއް ނުވަތަ ކުއްޔެއް ދައްކަން ނުޖެހޭ ގޮތަށް އެއްބަސްވުން އެކުލަވާލާފައިވާކަން ވެސް ގަރާރުގައި ފާހަގަކޮށްފައިވެ އެވެ.
ގަރާރުގައިވާ ގޮތުން، އެ ބިމުގައި ތަރައްގީކުރާ ތަންތަން 3 ވަނަ ފަރާތްތަކަށް ކުއްޔަށް ދޫކުރުމުގެ ހައްގު އީގަލް ހިލްސް އަސް ލިބިގެންދާ ގޮތަށް އެއްބަސްވުން އެކުލަވާލާފައިވުމާއެކު އެފަދަ ބޮޑު މަޝްރޫއެއްގެ އެއްބަސްވުން ސިއްރުކޮށްފައި ބޭއްވުމަކީ ދައުލަތުގެ މުދަލާއި، މާލިއްޔަތަށް ނުހަނު ބޮޑެތި ގެއްލުންތަކެއް ލިބި، ކޮރަޕްޝަނަށް މަގުފަހިވެދާނެ ކަމެކެވެ.
