އެއްކަލަ ސައީދު، އަނެއްކާ އަނެއް މޮޅުވާހަކަ

އިކޮނޮމިކް މިނިސްޓަރު ސައީދަށް، ފިނިފެން މަލުގެ ގުލުދަސްތާތަކުން ވެދުން ކުރަމެވެ.

ސައީދޫ އެވެ. މަވެސްމީ ސައީދުއާ އެއް އޮޑިއެއްގައިއުޅެ ސައީދުމެން ދެއްކި މަގުން ހިނގަމުން މިއަދާހަމައަށް އައި ސައީދުމެން ބާގައިގެ މީހަކީމެވެ. އެކަމަކު މަށަކީ ސައީދުއާ ސައީދުމެންހެން މުއިއްޒު ގާތުގައި އެޅިހާ ބަތަކަށް ރިހަ ވެގެން ތިބޭ ޒާތުގެ މީހެއް ނޫންކަން އެންމެ ރަނގަޅަށް އެނގޭނީ ސައީދުއަށެވެ. އެހެން ނޫނަސް ހަކުރު ދޭތީ ބޮޑުބޭބެވެފައި ހުންނާކަށް މަށަކީ މަގޭ މުހުތާދުތައް ފިލުވަން މުއިއްޒުގެ މުއްފަތުން އުޅޭ މީހެއް ނުމެ ނޫންވިއްޔާ އެވެ. މިހާ ސީދާކޮށް އަދި ސާދާކޮށް ސައީދުގާތު މަ ބުނަން މިއުޅޭ ވާހަކަ ބުނެވެނީވެސް އެހެންވީމަ އެވެ. ސީދާ މަމިބުނާ ހޫނުކަން މަތީގައި ސައީދުމެންގެ މުއިއްޒުގެ ހިރިޔާ ފާތުރާދޮށަށް މިވާހަކަ ގެންދާނެ ކަމުގެ ފުރިހަމަ ޔަގީންކަމާވެސްއެކުއެވެ.

ސައީދޫ އެވެ. މަހަމަ ހައިރާންވެ އަންތަރީސް ވެއްޖައީމެވެ. ސައީދުމެން ތިޔަޖަހާ ސަކަރާތަކުން ނޫނެވެ. ކަމެއް ނުކުރެވިގެން ތިޔައުޅޭ އުޅުމެއް ފެނިގެނެއްވެސް ނޫނެވެ. ނާފަހެ އެއީކީ މީހަކު ވިސްނާން ޖެހޭ ވަރުގެ ކަމެއްވެސް ނުމެ ނޫން ވިއްޔާއެވެ. ކުޅުދުއްފުށީ ބަނދަރުން ދެކަޅުހަމަށް ފެން އަޅައިގެން ފެށި ބަންކަރިންނާ، ޑިވެލޮޕްމެންޓު ބޭންކަށް މިލިޔަނުން މިލިޔަނުން ހަރަދުވިއިރުވެސް، އެތަނަށްލީ ވެރިން ދިއުންނޫން ކަމެއް ނުވިކަމާ، ފޭކް ޕްރިންސްގެ އަތްޕުޅުން ހުޅުމާލޭގައި އެޅުއްވި ބޮޑުބިޔަ ބިންގަލުގެ ވާހަކައާއި ފުނަދޫއާ މާލެއާ ހުޅުމާލެ ގުޅާލި މޮނޮރެއިލްގެ ވާހަކަފަދަ ބިޔަ މަޝްރޫއުތަކަށް ވީގޮތުގެ ވާހަކަތައް ފަށްފަށް ކޮށްފައި ދައްކާކަށް ނެތީމެވެ.

އެކަމަކު މަށަށްވެސް އެއްޗެއް ނުބުނެ ހަނުހިމޭނުން އިންނާން އުނދަގޫވެގެން މިއުޅެނީ އަނެއްކާވެސް ސައީދު ތިޔަތަޅާ އަނގަޔަކުންނެވެ. އެކަންކަމާ އެހެންމީހުންނާ ގުޅުވާތީ އެވެ. ސައީދުމެން ކުރާން އުޅޭ ކަންކަން ނުވަނީ އެހެން މީހުން ހުރަސްއަޅާތީއޭ ބުނެ ތިޔަ ދައްކާ ވާހަކަ ތަކުންނެވެ. ދޮގާ މަކަރާއި ފޭކު ވާހަކަތައް އަނބުރައިގެން ސައީދުމެން ގެންނަ ބޮޑެތި އިންވެސްޓްމަންޓްތައް ހުއްޓުވަނީއޭ ބުނެ ތިޔަ ވަރަކަށް ހޭރޭތީ އެވެ. ޚާއްޞަކޮށް ބޭރުގެ އިންވެސްޓަރުން އަޔަނުދޭން ދޮގު ވާހަކަތައް ދައްކަނީއޭ ބުނެ ސައީދު ތިޔަ ގޮވާ ގޮވެލި ފައްޗަކުންނެވެ.

ސައީދޫ އެވެ. ނިކަން ހަރުތާކު އިށީނދެ ކުޑައިކޮށް ވިސްނާލަބަލާށެވެ. އަހަރެމެން މިއުޅޭ އެމްޑީޕީގެ ސަރުކާރު އޮތްއިރު ތިޔަބުނާ ގަނޑުތައް ގަންވަރާ ގާތައްވެސް އެވެރިންނަށް އެކަމެއް އެބަ ވޭހެއްޔެވެ. އަހަރެމެން ގޮވިހާ ވަރަށް އެވެރިންނަށް އެއެއްޗެހި އެބަ ގޮވޭހެއްޔެވެ.

ސައީދޫ އެވެ. އެވެރިންގެ ބޮލުގައި ނާޅުވަނީ ކޮން އިލްޒާމެއް ހެއްޔެވެ. ބޭރުގެ ކާފަރުން ގެނެސްގެން މުޅި ރާއްޖެ ލާދީނީ ކުރަން އުޅެނީއޭ ގޮވީ އަހަރެމެންނެއް ނޫން ހެއްޔެވެ. ދިވެހިންގެ ދީނާ ދިވެހިންގެ ސަގާފަތާ ދިވެހިންގެ އެއްބައިވަންތަކަން ގެއްލުވާލަނީއޭ އަހަރެމެން ނުގޮވަން ހެއްޔެވެ. ރީނދޫ ކުލައިން ތާކިހަލެއް އަޅައިގެން މިސްކިތައް އެރިއަސް އަހަރެމެން ކަނޑައެޅީ އެއީ ލާދީނީ މީހަކަށެވެ. މިސްކިތެއްގެ ހަރިންމަ ފާރުގައި ލާ ކުލަވެސް އަހަރެމެން އެކަމާ ގުޅުވާލީމެވެ. ބަންގި ނުގޮވަނެ ވާހަކައާއި ފަށްޅިއާ، ޖުވާ ކުޅޭ ތަންތަން ހަދައިގެން ބޭރު މީހުން ގެންނަނީއޭ ފުރަތަމައިނުންވެސް ގޮވީ އަހަރެމެންނެވެ.

ސައީދޫއެވެ. އެއަރޕޯޓްވެސް އަހަރެމެން މިތާ ބާއްވާފައި އެއޮތީ ގާދޫކޮލުން ނެރެނެރެ އޮއްވައި ވާޖަހައިގެން ދަމާ ގެނެސް ހަތަރު ފަރާތަށް ވާ އަޅާ ލަމްރާން ޖަހައިގެންނެވެ. ބާނަބާނާ އޮތް ކަނޑު ވިއްކާލީމާ އެވާހަކަ ގޮވާ ނެގީ ވަލިއްޔުލް އަމުރު ބޭރު ބައެއްގެ އުނގަށްވެއްޓި ބޮޑުތަނުން ފައިސާ ނެގިކަމަށް ބުނެ އެވެ. ގައުމު އެވެރިންނަށް ވިއްކާލި ކަމަށް ބުނެ އެވެ

ސައީދޫ އެވެ. މިތަނުގައި އިންޑިޔާ ސިފައިން ތިބެގެންވެސް އަހަރެމެން ކިހާވަރެއް އަރުވާލިން ހެއްޔެވެ. މުޅި އަސްކަރިއްޔާގެ ކޮންޓްރޯލް އޮތީ އެވެރިންގެ އަތުގައިކަމާ އަމުރު މައުރޫފް ހިންގަނީވެސް އެމީހުންނޭ ނުގޮވަން ހެއްޔެވެ. އުތުރު ތިލަފަޅުގައި ހަދައިގެން އުޅުނު އިންޑިޔާގެ އަސްކަރީ މަރުކަޒަށްވެސް އަހަރެމެން "ރޯހިތު" ނުފޮނުވަން ހެއްޔެވެ.

ސައީދޫ އެވެ. ނިކަން ވިސްނާލަބަލާށެވެ. އަހަރެމެން ހަޑިވެގެންވެސް ނުކިޔަނީ ކޯންޗެއް ހެއްޔެވެ. އިންޑިޔާގެ މޯދީއާއެކު އެއްދާން ކުރާ ވާހަކައަށް ދަންދެން އަހަރެމެން ގޮވީމެވެ. އެމީހުންގެ ކާޓޫނާ މާއްޔަށް ދަންދެން ނެރުނީމެވެ.

ސައީދޫ އެވެ. ސައީދުއާއެކު އުޅުނު އަހަރެންވެސް އިތުރަށް ފަޟީހަތްވާކަށް އިތުރަކަށް ނުކިޔާނަމެވެ. އެކަމަކުވެސް އިހުބަހަކާ ފަހު ބަހަކަށް ބުނެލަމެވެ. ޔަހޫދީންގެ އެކުވެރި އަލައްބާރު ބޭބެ ލައްވާ ރަސްމާލޭގައި ޔަހޫދީން ވަޒަންވެރިކުރުވަން ތިޔައުޅޭ އުޅުމަށް މަވެސް ދެކޮޅެވެ. ސައީދުމެން ކިތަންމެ ނުރުހުނަސް ފަރުވާލެއް ނެތެވެ. އެވެރިންނަށްވެސް އަދި ސައީދު މެންނަކަށް އެތަނުން ލިބެން އޮތް މޮޅު ނަފާވެރިކަމުގެ ސާފު ވާހަކައެއް ކުޑަ މިންވަރަކަށްވެސް ބުނެއެއް ނުދެވުނެވެ. އަދިވެސް ތިޔަ ބަލަނީ ސިއްރުސިއްރުން އެއޮށްބޮޑު ކަންތައްގަނޑު ނިންމާލެވޭތޯ އެވެ.

ސައީދޫއެވެ. މީހެއްގެ ގޮތެއް މަށަކަށް ނޭނގެއެވެ. މީ މަގޭ ބަހެވެ. މަހިތުން މަށާ، ސައީދު ބައިގާ މިއުޅޭ ހަމަބުއްދިއަކުން ވިސްނާ ކޮންމެ މީހަކުވެސް މިކަމާ ދެކޮޅެއް ނުހަދާނެ އެވެ.

ސައީދޫ އެވެ. އަހަރެމެން މާ މާތްވެފައި މޮޅު ވާހަކަ ދެއްކުމުގެ ބޭނުމެއް ނެތެވެ. އަހަރެމެން ކުރިން ނުކިޔާ އެކައްޗެއްވެސް އަދި މިވެރިން ނުކިޔަ އެވެ. އެފަދަ ވައްތަރެއްވެސް އަދި ނުޖެއްސެ އެވެ. ސައީދުމެން އުޑުގައި ޖެހިފައި ބިމުގައި ޖެހުނަސް ތިޔަތަނަށް ޔަހޫދީ ޒައިނިސްޓުން ގެންނާކަށް ދިވެހިންނެއް ނޭދޭނެ އެވެ. ހަމަ ގައިމުވެސް މަވާ ސަލާމެވެ. އައްޑަނައަކަށް މޭ އެކަންޏެއް ނޫނެވެ. ބުރކަށިވެސް ދިއްކުރާނަމެވެ.