ޔަމަނުގެ މައުރިބަށް ހޫޘީންގެ މިސައިލް ހަމަލާތަކެއް، ދެކުނުގެ ކަހްބޫބުގައި ދިން ހަމަލާ ސިފައިން ހުއްޓުވައިފި
20 އޮކްޓޯބަރު 2026 | އަންގާރަ 03:12ޔަމަނުގެ ލަޙްޖު ޕްރޮވިންސަށް ހޫޘީން ދިން ވަރުގަދަ ހަމަލާތަކެއް ސަރުކާރު ސިފައިން ނާކާމިޔާބުކޮށްލާފައިވާއިރު، މި ކުރިމަތިލުންތަކުގައި ހޫޘީންގެ ބައެއް ހަނގުރާމަވެރިން މަރުވެ ގިނަ އަދަދެއްގެ އަސްކަރީ ވަސީލަތްތައް ވަނީ ހަލާކުވެފައި. އދ. މެދުވެރިވެގެން ވެފައިވާ އެއްބަސްވުން އުވި، ހަމަލާތައް އަލުން ވަރުގަދަވެފައި ވަނީ ތެލާއި ގޭސް އުފައްދާ މައުރިބު ސިޓީއަށް އަމާޒުކޮށް ހޫޘީން ފުލުފުލުގައި މިސައިލް ހަމަލާތައް ދެމުންދާ ދަނޑިވަޅެއްގައި
ބައިނަލްއަގުވާމީ މުޖުތަމައުން ގަބޫލުކުރާ ޔަމަނުގެ ސަރުކާރާ ދެކޮޅަށް، ހޫތީން އާ ހަމަލާތަކެއް ދޭން ފަށާފައިވަނީ މިދިޔަ ސެޕްޓެމްބަރު މަހުގެ ތެރޭގައި. | އޭޕީ
ޔަމަނުގެ ސަރުކާރުގެ ކޮންޓްރޯލް އޮންނަ މައުރިބު ސިޓީއަށް ހޯމަ ދުވަހުގެ ރޭ ދަންވަރު ހޫޘީ ޖަމާއަތުން ހަތަރު ބެލިސްޓިކް މިސައިލް ފޮނުވާލާފައިވާ ކަމަށާއި، އެ ޤައުމުގެ ދެކުނުގައި ހޫޘީން ދިން ވަކި ހަމަލާއެއް ސިފައިން ނާކާމިޔާބުކޮށްލާފައިވާ ކަމަށް އެ ސަރަހައްދުގެ ކަމާބެހޭ އިދާރާތަކުންނާއި އަސްކަރީ އޮފިޝަލުން ހާމަކޮށްފި އެވެ. ގެދޮރު ގެއްލިފައިވާ ގިނަ އަދަދެއްގެ މީހުން ދިރިއުޅެމުންދާ، އާބާދީ ބޮޑު އެ ސިޓީއަށް އަމާޒުކޮށް އެ މިސައިލްތައް ފޮނުވާލާފައިވާ ކަމަށް، މައުރިބުގެ ސަރުކާރުން ބުންޏެވެ. ނަމަވެސް، އެ ހަމަލާގައި އެއްވެސް މީހަކު މަރުވި ނުވަތަ ޒަޚަމުވި ކަމެއް އަދި އެއްވެސް ގެއްލުމެއް ލިބުނު ކަމުގެ ތަފުސީލެއް ކަމާބެހޭ އިދާރާތަކުން ހާމަކޮށްފައެއް ނުވެ އެވެ.
މި ފަހަރުގެ ހަމަލާ ދީފައި މި ވަނީ، ލިބިދާނެ ގެއްލުންތަކުގެ މަޢުލޫމާތު ހާމަކުރުމެއް ނެތި، މައުރިބަށް ހޫޘީން އަށް ބެލިސްޓިކް މިސައިލް ފޮނުވާލި ކަމަށް އެ ސަރަހައްދުގެ އިދާރާތަކުން ރިޕޯޓުކުރިތާ އެއް ދުވަސް ފަހުންނެވެ. އަދި، އާންމުން ދިރިއުޅޭ އަވަށްތަކަށް އަމާޒުކޮށް ނުވަ ބެލިސްޓިކް މިސައިލާއި އިތުރު ހަތް ޕްރޮޖެކްޓައިލް ނުވަތަ މިސައިލް ބޭނުންކޮށްގެން ހޫޘީން ހަމަލާއެއް ދީފައިވާ ކަމަށް އޮކްޓޫބަރު 15 ވަނަ ދުވަހު ވެސް އެ ޕްރޮވިންސުން ވަނީ ރިޕޯޓުކޮށްފަ އެވެ. ސަރުކާރުގެ ބާރު އޮންނަ އަދި ތެލާއި ގޭސް އުފައްދާ މައި މަރުކަޒެއް ކަމަށްވާ މައުރިބަކީ ގެދޮރު ގެއްލިފައިވާ 2.2 މިލިޔަނަށް ވުރެ ގިނަ މީހުން ދިރިއުޅޭ ސަރަހައްދެއް ކަމަށް ސަރުކާރުގެ ތަފާސްހިސާބުތަކުން ދައްކަ އެވެ.
މީގެ އިތުރުން، ޔަމަނުގެ ދެކުނުގައިވާ ލަޙްޖު ޕްރޮވިންސުގެ ހުޅަނގު ފަރާތުގައި އޮންނަ ކަހްބޫބު ސަރަހައްދަށް ހޫޘީން ދިން ހަމަލާއެއް ސަރުކާރުގެ ސިފައިން ހޯމަ ދުވަހު ނާކާމިޔާބުކޮށްލާފައިވާ ކަމަށް ޔަމަނުގެ އަސްކަރިއްޔާއިން ބުންޏެވެ. ހޫޘީ ހަނގުރާމަވެރިން ފުލުފުލުގައި ވަރުގަދަ ހަމަލާތަކެއް ދީފައިވާ ކަމަށާއި، އެކި ބާވަތުގެ ހަތިޔާރު ބޭނުންކޮށްގެން އެތައް ގަޑިއިރެއް ވަންދެން ކުރިމަތިލުންތައް ހިނގި ކަމަށް ސިފައިންނާ ގުޅިފައިވާ ސަދަން ޖަޔަންޓްސް ބްރިގޭޑްސްއިން ނެރުނު ބަޔާނެއްގައި ބުންޏެވެ.
ސައުދީ އަރަބިއްޔާ އިސްވެ އޮންނަ އަސްކަރީ އިއްތިހާދުގެ އެހީތެރިކަމާއެކު، ސަރުކާރުގެ ސިފައިން ވަނީ ހަމަލާދިން ހޫޘީ ހަނގުރާމަވެރިން ފަހަތަށް ޖައްސައި، އެ ޖަމާއަތުގެ ހަނގުރާމަވެރިންތަކެއް މަރާލައި ޒަޚަމުކޮށް، އަސްކަރީ ވަސީލަތްތައް ހަލާކުކޮށްލާފައި ކަމަށް އެ ބަޔާނުގައި ބުނެފައިވެ އެވެ. ނަމަވެސް، އެ ބްރިގޭޑުން ގެއްލުންވި މީހުންގެ އަދަދުތަކެއް ހާމަކޮށްފައެއް ނުވެ އެވެ.
ހޫޘީން 2014 ވަނަ އަހަރު ވެރިރަށް ޞަންޢާ އަދި ގިނަ ޕްރޮވިންސެއް ހިފި ފަހުން ޔަމަން ވަނީ ހަނގުރާމައިގެ ތެރެއަށް ވެއްޓިފަ އެވެ. އަދި، ބައިނަލްއަގުވާމީ ގޮތުން ބަލައިގަންނަ ސަރުކާރަށް ތާއީދުކޮށް، ޖެހިގެން އައި އަހަރު ސައުދީ އަރަބިއްޔާ އިސްވެ އޮންނަ އަސްކަރީ އިއްތިހާދުން ވަނީ އެ ހަނގުރާމައިގެ ތެރެއަށް ވަދެފަ އެވެ. އެންމެ ފަހުގެ މި ކުރިމަތިލުންތައް ފެށިފައި ވަނީ، އދ. މެދުވެރިވެގެން 2022 ވަނަ އަހަރު ވެވުނު ހަނގުރާމަ ހުއްޓާލުމުގެ އެއްބަސްވުން ޖުލައި މަހު އުވިގެން ދިއުމާ ގުޅިގެންނެވެ.
މަސްދަރު: އަނަދޮލު އޭޖެންސީ
