ޢަދަން އެއާޕޯޓުގައި ފުރަން ތައްޔާރުވެފައި އޮތް ބޯޓެއް ކައިރިއަށް ހޫޘީންގެ މިސައިލް ހަމަލާތަކެއް

ޔަމަނުގެ ޢަދަން އިންޓަނޭޝަނަލް އެއާޕޯޓުން ފުރައިގެން މިޞްރުގެ ޤާހިރާއަށް ދަތުރުކުރުމަށް ތައްޔާރުވަމުންދިޔަ ފަސިންޖަރުން އުފުލާ ބޯޓެއް ކައިރިއަށް، ހޫޘީ ޖަމާއަތުން ފޮނުވާލި ދެ މިސައިލް ވެއްޓިފައިވާ ކަމަށް ޔަމަނުގެ މައުލޫމާތާ ބެހޭ ވަޒީރު ހާމަކުރައްވައިފި އެވެ.

ވަޒީރު މުޢައްމަރު އަލް-އިރްޔާނީ ވިދާޅުވީ، 612 ނަންބަރު ފްލައިޓު ނައްޓާލަން ތައްޔާރުވަމުން ދަނިކޮށް، ހޫޘީން އެއާޕޯޓަށް އަމާޒުކޮށް ދެ މިސައިލް ފޮނުވާލި ކަމަށެވެ. މި މިސައިލްތައް ވެއްޓުނީ މަތިންދާބޯޓާ ގާތްގަނޑަކަށް 500 މީޓަރު ދުރަށް، އަދި ރަންވޭގެ މެދާ 100 މީޓަރު ދުރަށް ކަން އޭނާ ހާމަކުރެއްވި އެވެ. ނަމަވެސް، މި ހާދިސާގައި އެއްވެސް މީހަކަށް ގެއްލުމެއް ލިބިފައިނުވާ ކަން އޭނާ ކަށަވަރުކޮށްދެއްވި އެވެ.

Advertisement

"[މި ހަމަލާއަކީ] ހަމައެކަނި މަދަނީ އެއާޕޯޓަކަށް ދިން ހަމަލާއެއް ނޫން. މިއީ، ފަސިންޖަރުންނާއި ފަޅުވެރިންގެ ފުރާނައަށާއި ވައިގެ ދަތުރުފަތުރުގެ ރައްކާތެރިކަމަށް އޮތް ސީދާ ނުރައްކަލެއް. އަދި، ބައިނަލްއަގުވާމީ ގާނޫނުތަކާ ކަނޑައެޅިގެން ޚިލާފު ކަމެއް،" އޭނާ ވިދާޅުވި އެވެ.

މީގެ ކުރިން ޔަމަނުގެ މައުލޫމާތާ ބެހޭ ވުޒާރާއިން ބުނެފައި ވަނީ، ޢަދަން އިންޓަނޭޝަނަލް އެއާޕޯޓް ކައިރީގައިވާ ބަދްރު ކޭމްޕްގެ ވަށައިގެންވާ ސަރަހައްދަށް ހޫޘީން އަނެއްކާ ވެސް ހަމަލާ އަމާޒުކޮށްފައިވާ ކަމަށެވެ. މަސްދަރުތަކުން ބުނީ، ޢަދަނުން ތިން ގޮވުމެއްގެ އަޑު އިވުނު ކަމަށާއި، އަލް-ބުރައިޤާ ޑިސްޓްރިކްޓުގައި ހުންނަ ސައުދީ އަރަބިއްޔާ އިސްވެ އޮންނަ އަސްކަރީ އިއްތިހާދުގެ މައި މަރުކަޒަށް ވެސް ހަމަލާދީފައިވާ ކަމަށެވެ.

އެ މަސްދަރުތަކުން ބުނި ގޮތުގައި، ދެ މިސައިލް އަމާޒުވީ ޢަދަން އިންޓަނޭޝަނަލް އެއާޕޯޓާ އިންވެގެން އޮންނަ ބަދްރު ކޭމްޕްގެ އަސްކަރީ ވައިގެ ބަނދަރުގެ ރަންވޭއަށެވެ. އަދި، ތިންވަނަ މިސައިލް އަމާޒުވީ އަލް-ބުރައިޤާގައި ހުންނަ އިއްތިހާދުގެ ކޭމްޕަށް ކަމަށް އެ ފަރާތްތަކުން ހާމަކުރި އެވެ. މި ހަމަލާތަކާ ގުޅިގެން މުދަލަށް ލިބުނު ގެއްލުމުގެ ތަފުސީލު އަދި ސާފުވާ ގޮތެއް ނުވެ އެވެ.

މި ހަމަލާތަކާ ގުޅިގެން ވަކިން ނެރުނު ރިޕޯޓެއްގައި، ހޫޘީންގެ ބާރުގެ ދަށުގައިވާ ސަބާ ނޫސް އޭޖެންސީން މަސްދަރަކާ ހަވާލާދީ ބުނީ، ބަދްރު ކޭމްޕްގެ އެތެރޭގައި ހުރި އަސްކަރީ މައި މަރުކަޒަކަށާއި ހަތިޔާރު ގުދަންތަކަކަށް އަމާޒުކޮށް އެ ޖަމާއަތުން ހަމަލާތަކެއް ދީފައިވާ ކަމަށެވެ.

މި ހަމަލާތައް ދީފައި މި ވަނީ، ބުރާސްފަތި ދުވަހު ޢަދަނުގައި ހުންނަ ރިޔާސީ ގަނޑުވަރު އަލް-މަޢާޝީޤު ގަނޑުވަރަށް ބެލިސްޓިކް މިސައިލް ހަމަލާތަކެއް އަމާޒުވިތާ އެއް ދުވަސް ފަހުންނެވެ. އެ ހަމަލާގައި ފަސް މީހުން މަރުވެ، އިތުރު 16 މީހުން ޒަޚަމުވި ކަމަށް ޔަމަނުގެ ސިއްހަތާ ބެހޭ ވަަޒީރު ޤާސިމް މުޙައިބަޙު ވިދާޅުވި އެވެ.

ވެރިރަށް ޞަންޢާ ހިމެނޭހެން، ހޫޘީން އަތްގަދަކޮށްފައިވާ ސަރަހައްދުތައް އަނބުރާ ހޯދުމަށް ޓަކައި ޔަމަނުގެ ސަރުކާރުގެ ފައުޖުތަކުން 'ޑޯން އޮފް ޔެމެން' ގެ ނަމުގައި ވަރުގަދަ އަސްކަރީ ހަރަކާތެއް ފަށާފައި ވަނީ މި މަހުގެ ކުރީކޮޅު އެވެ.

ޔަމަނުގައި ދާޚިލީ ހަނގުރާމަ ފެށުނީ 2014 ވަނަ އަހަރު ހޫޘީން ޞަންޢާއާއި އިތުރު ޕްރޮވިންސްތައް ހިފުމާ ގުޅިގެންނެވެ. އެއާއެކު، ބައިނަލްއަގުވާމީ ގޮތުން ބަލައިގަންނަ ސަރުކާރަށް އެހީތެރިވުމަށް ސައުދީ އަރަބިއްޔާ އިސްވެ އޮންނަ އިއްތިހާދުން ޖެހިގެން އައި އަހަރު އެ ޤައުމުގެ ހަނގުރާމައިގެ ތެރެއަށް ވަދެގަތެވެ. އެންމެ ފަހުގެ ކުރިމަތިލުންތައް ފެށުނީ 2022 ވަނަ އަހަރު ހަމަޖެހުނު ހަނގުރާމަ ހުއްޓާލުމުގެ އެއްބަސްވުން ރޫޅުމަށްފަހު، ޖުލައި މަހުގެ ތެރޭގަ އެވެ. ހަމަމިއާއެކު، ސައުދީ އަރަބިއްޔާގެ ހަކަތައާއި ވައިގެ ދަތުރުފަތުރާ ގުޅޭ މަރުކަޒުތަކަށް ވެސް ހޫޘީން މީގެ ކުރިން އަމާޒުކޮށްފައިވެ އެވެ.