ހޫޘީންގެ ބާރުތައް ބަލިކަށިކޮށް، ވެރިރަށް ސަންޢާ ހިފުމުގެ އަމާޒުގައި ޔަމަނުގެ ސިފައިން ވަރުގަދަ ހަމަލާތަކެއް ދީފި

ޔަމަނުގެ މައުރިބު ޕްރޮވިންސުގެ އިރުމަތީ ފަރާތުގައިވާ ހޫޘީންގެ މަގާމުތަކުގެ ތެރެއަށް ވަދެގަނެ، އިސްތިރާޖީ ގޮތުން މުހިންމު އެތައް ސަރަހައްދެއްގެ ކޮންޓްރޯލް ހޯދައި، އަސްކަރިއްޔާއިން އާ ކުރިއެރުންތަކެއް ހޯދާފައިވާ ކަން ޔަމަނުގެ ސަރުކާރު ފައުޖުތަކުން ހާމަކޮށްފި އެވެ.

ސިފައިންގެ ބާރުތަކުން ހުޅަނގުދެކުނާއި ފްރަންޓުތަކުގައި ވެސް ހޫޘީންނަށް އަސްކަރީ ގޮތުން ބާރުބޮޑުކޮށް، އެ ޖަމާއަތުގެ ގާބިލުކަން ނައްތާލުމުގެ މަސައްކަތް ހުއްޓުމެއް ނެތި ކުރިއަށް ގެންދާކަމަށް ސިފައިން ނެރުނު ބަޔާނެއްގައި ވަނީ ބުނެފަ އެވެ. ފާއިތުވި 24 ގަޑިއިރުގެ ތެރޭގައި ހޫޘީންގެ 430 އަށްވުރެ ގިނަ ހަނގުރާމަވެރިން މަރާލައި ނުވަތަ ޒަޚަމުކޮށްލައި، އަސްކަރީ 100 އަށް ވުރެ ގިނަ އުޅަނދާއި ވަސީލަތްތައް ހަލާކުކޮށްލާފައިވާ ކަމަށް ވެސް އަސްކަރިއްޔާއިން ބުންޏެވެ.

Advertisement

މީގެ އިތުރުން، އަސްކަރިއްޔާއާ ގުޅިފައިވާ ތަޢިއްޒު މިލިޓަރީ އެކްސިސްއިން ބުނީ، ތަޢިއްޒުގައި ހުރި ހޫޘީންގެ މަގާމުތަކަށް އަމާޒުކޮށް ހަމަލާތަކެއް ދީފައިވާ ކަމަށެވެ. އަދި، ތަޢިއްޒުގެ ހުޅަނގުގައިވާ އަލް-ދަބާބް ސަރަހައްދުގެ އަލް-ހަންޖަރު ޗެކްޕޮއިންޓާއި، އަލް-މަޤްބަބާ އަދި އަލް-ކާމިލް ފަރުބަދަތަކުގައި ގާއިމުކޮށްފައިވާ ހޫޘީންގެ މަރުކަޒުތަކަށް އަމާޒުކޮށް އަސްކަރީ މަތިންދާބޯޓުތަކުން ވައިގެ ތިން ހަމަލާ ދީފައިވާ ކަމަށް ވެސް އެ ބާރުން ވަނީ ބުނެފަ އެވެ.

ގާތްގަނޑަކަށް އަށް ގަޑިއިރަށް ދެމިގެންދިޔަ ވަރުގަދަ ކުރިމަތިލުންތަކަކަށް ފަހު، ގާތްގަނޑަކަށް 16 ހަނގުރާމަވެރިން މަރާލައި، ތަޢިއްޒަށް އަމާޒުކޮށް ހޫޘީ ހަނގުރާމަވެރިން ފަހަތަށް ޖައްސާލާފައިވާ ކަމަށް ވެސް ޔަމަނުގެ ސިފައިން ވަނީ ހާމަކޮށްފަ އެވެ.

މި ކުރިމަތިލުންތަކަކީ ވެރިރަށް ޞަންޢާ ހިމެނޭހެން ހޫޘީންގެ ބާރުގެ ދަށުގައިވާ ސަރަހައްދުތައް މިނިވަންކުރުމަށް މި މަހުގެ ކުރީކޮޅު ސަރުކާރުން ފެށި 'ޑޯން އޮފް ޔެމެން' އަސްކަރީ ހަރަކާތުގެ ބައެކެވެ.

ހޫޘީން 2014 ޖުލައި ގައި ޞަންޢާއާއި އެހެނިހެން ޕްރޮވިންސްތައް ހިފުމާ ގުޅިގެން ޔަމަން ވަނީ ހަނގުރާމައިގެ ތެރެއަށް ވެއްޓިފަ އެވެ. މިއާއެކު، ބައިނަލްއަގުވާމީ ގޮތުން ބަލައިގެންފައިވާ ސަރުކާރަށް ވާގިވެރިވުމުގެ ގޮތުން ސައުދީ އަރަބިއްޔާ އިސްވެ އޮންނަ އަސްކަރީ އިއްތިހާދުން ޖެހިގެން އައި އަހަރު ވަނީ އެ ގައުމުގެ ހަނގުރާމައިގެ ތެރެއަށް ވަދެފަ އެވެ. އަދި، މި ފަހުން ހަމަނުޖެހުންތައް އަނެއްކާ ވެސް އިތުރުވާން ފެށީ 2022 ގެ ސުލްހައިގެ އެއްބަސްވުން ރޫޅި ދިޔުމާ ގުޅިގެންނެވެ.