ސީނިއާ ޤައުމީ ޓީމުގެ ޖާގަ ލައިބާ ދިފާއުކޮށްފި

ރާއްޖޭގެ ޒުވާން ބެޑްމިންޓަން ކުޅުންތެރިޔާ، ލައިބާ އަަޙުމަދު މަޚްލޫފް (އެލީ) ސީނިއާ ޤައުމީ ޓީމުގެ ޖާގަ ދިފާއުކޮށްފި އެވެ.

އުމުރުން 13 އަހަރުގެ ލައިބާ އެންމެ ފުރަތަމަ ސީނިއާ ޤައުމީ ޓީމުން ޖާގަ ހޯދީ މިދިޔަ އަހަރު އެވެ. އޭގެ ފަހުން މިއަހަރުގެ ޤައުމީ ޓީމުގެ ސިލެކްޝަންގައި ވާދަކޮށް ލައިބާ ވަނީ، ސީނިއާ ޤައުމީ ޓީމުގެ ޖާގަ ދިފާއުކޮށްފައި އެވެ. 

އޮކްޓޫބަރު މަހުގެ 13 އިން 16 އަށް ކުރިއަށް ދިޔަ ބެޑްމިންޓަން ޓީމުގެ ސިލެކްޝަންގައި ލައިބާ ވަނީ އެންމެ ހަގު ކުޅުންތެރިޔާގެ ގޮތުގައި ޓީމުން ޖާގަ ހޯދައިފަ އެވެ. 

ޒުވާން ކުޅުންތެރިޔާ އަންނަނީ ބައިނަލްއަޤުވާމީ އެކި އެކި މުބާރާތްތަކުގައި ވެސް ވާދަކޮށް، ރަން ކާމިޔާބީ ތަކެއް ހޯދަމުންނެވެ. ލައިބާ އަކީ ރާއްޖޭގެ 15 އަހަރުން ދަށުގެ ސިންގަލްސް އަދި ޑަބަލްސްގެ ރޭކިންގެ އެއް ވަނަ ކުޅުންތެރިޔާ އެވެ. އޭގެ އިތުރުން 19 އަހަރުން ދަށުގެ މިކްސް ޑަބަލްސްގައި ވެސް ލައިބާ އަކީ ރޭންކިންގެ އެއް ވަނަ އެވެ. 

ލައިބާގެ އިތުރުން ސީނިއާ އަންހެން ޓީމުގައި ހިމެނުނު ކުޅުންތެރިންނަކީ، ފާޠިމަތު ނަބާހާ އަބްދުލް ރައްޒާޤު (ނަބާ) އާއި، އާމިނަތު ނަބީހާ އަބްދުލް ރައްޒާޤު (ނަބީ) އާއި، ޔަލްވީ ހުސައިން ޒުހުރީ އާއި، އާމިނަތު އަމްނާ އަލީ އާމިރު އަދި ޝުބާ މުހައްމަދު ޝަރީފް އެވެ.