ޖޯޖިއާގައި މިހާރު ކުރިއަށްދާ، ބަޓޫމީ ކަޕް - ޔޫތު އިންޓަނޭޝަނަލް ބެޑްމިންޓަން މުބާރާތުގައި ވާދަ ކުރަމުން އަންނަ ރާއްޖޭގެ ޒުވާން ބެޑްމިންޓަން ކުޅުންތެރިޔާ ލައިބާ އަޙުމަދު މަޚްލޫފް (އެލީ) މުބާރާތުގައި ރަނގަޅު ފެށުމެއް ހޯދައިފި އެވެ.

ހުކުރު ދުވަހު ފެށި މި މުބާރާތުގެ ފުރަތަމަ ދުވަހުގެ ކުޅުން ނިމުނުއިރު، ލައިބާ ވަނީ ސިންގަލްސް އިވެންޓުގެ ކުއާޓަރ ފައިނަލް އަދި މިކްސް ޑަބަލްސް އިވެންޓުގެ ސެމީ ފައިނަލް އިން ފުރުސަތު ހޯދައިފަ އެވެ.

ސިންގަލްސް އިވެންޓުގައި ލައިބާ ހިމެނުނު ގުރޫޕުގައި ތިން މެޗު ކުޅެން އޮތްއިރު، ފުރަަތަމަ މެޗު ލައިބާ އަށް ލިބުނީ އިދިކޮޅު ކުޅުންްތެރިޔާ މެޗު ދޫކޮށްލުމުންނެވެ.

ދެ ވަނަ މެޗުގައި ލައިބާ ވަނީ އާމޭނިއާގެ އަސިލްބެކްޔަމް މަރީނާއާ ދެކޮޅަށް ކުޅެ، ސީދާ ދެ ސެޓުން މޮޅުވެފަ އެވެ. މެޗުގެ ސެޓުތައް ލައިބާ ކާމިޔާބު ކޮށްފައި ވަނީ 15-05 އަދި 15-05 އިންނެވެ.

ތިން ވަނަ މެޗުގައި ލައިބާ ވަނީ ތުރުކީގެ ތުގްބާ އޮކްސުޒް އަތުން ވެސް ސީދާ ދެ ސެޓުން މޮޅުވެފަ އެވެ. މެޗުގެ ސެޓުތައް ލައިބާ ކާމިޔާބު ކޮށްފައި ވަނީ 15-05 އަދި 15-09 އިންނެވެ.

މިކްސް ޑަބަލްސް އިވެންޓުގައި ލައިބާގެ ޕެއަރ ޕާޓްނަރަކީ އާމޭނިއާގެ މަނުކްޔަން ނާރެކް އެވެ. ކުއާޓާ ފައިނަލްގައި ލައިބާގެ ޕެއަރ އިން ވަނީ އާމޭނިއާގެ މަރީނާ އަދި ޖޯޖިއާގެ އަންޑްރިއާ ޑަވިޝްވިލްގެ ޕެއަރގެ މައްޗަށް ސީދާ ދެ ސެޓުން ކުރި ހޯދައިފަ އެވެ. ލައިބާގެ ޕެއަރ އިން މެޗުގެ ސެޓުތައް ކާމިޔާބު ކުރީ 15-06 އަދި 15-07 އިންނެވެ.

ޖޯޖިިއާގެ ބަޓޫމީ ސިޓީގައި މި މުބާރާތް ކުރިއަށް ދަނީ އޮގަސްޓު މަހުގެ 22 ވަނަ ދުވަހުން، 24 ވަނަ ދުވަހުގެ ނިޔަލަށެވެ. މި މުބާރާތުގައި ތުރުކީ، ޖޯޖިއާ، ކަޒަކިސްތާން، އާމޭނިއާ، ލެޓްވިއާ، އަޒަރުބައިޖާން އަދި ދިވެހި ރާއްޖެ އިން ވެސް ވާދަ ކުރާނެ އެވެ.

މުބާރާތުގައި ޖުމުލަ 78 ކުޅުންތެރިން ވާދަ ކުރާއިރު، މުބާރާތުގައި 11 އަހަރުން ދަށުގެ އިތުރުން، 13 އަހަރުން ދަށް އަދި 15 އަހަރުން ދަށުގެ އުމުރު ފުރައިގެ ސިންގަލްސް، ޑަބަލްސް އަދި މިކްސް ޑަބަލްސްގެ ކުޅުން ކުރިއަށްދެ އެވެ. މިއީ ޖޯޖިއާގެ ޤައުމީ ބެޑްމިންޓަން ފެޑެރޭޝަން އިން އިންތިޒާމު ކޮށްގެން ބާއްވާ މުބާރާތެކެވެ.

ބައިނަލްއަޤުވާމީ މުބާރާތްތަކުގައި ވާދަކޮށް ގިނަ ކާމިޔާބީތަކެއް ހޯދާފައިވާ ލައިބާ، މި މުބާރާތުގައި ވާދަ ކުރަނީ 13 އަހަރުން ދަށުގެ އުމުރު ފުރައިގަ އެވެ. އެގޮތުން ސިންގަލްސް އިވެންޓުގެ އިތުރުން، ޑަަބަލްްސް އަދި މިކްސް ޑަބަލްސްގައި ވެސް ލައިބާ ވާދަ ކުރެ އެވެ.

ލައިބާ ވަނީ މިދިޔަ އަހަރު ވެސް މި މުބާރާތުގައި ވާދަކޮށްފަ އެވެ. އެ ފަހަރުގެ މުބާރާތުން ލައިބާ ވަނީ ދެ މެޑަލް ހޯދައިފަ އެވެ. އެއީ ސިންގަލްސް އިވެންޓުގެ ލޯ މެޑަލްގެ އިތުރުންމ ޑަބަލްސް އިވެންޓުގެ ރިހި މެޑަލް އެވެ.