ބ.އޭދަފުށީގައި ކުރިއަށް ދިޔަ، އޭދަފުށި ބެޑްމިންޓަން ކަޕް 2025 ގައި ވާދަކޮށް، ޒުވާން ބެޑްމިންޓަން ކުޅުންތެރިޔާ ލައިބާ އަޙުމަދު މަޚްލޫފް (އެލީ) ތިން ރަން މެޑައްޔާއި، އެއް ލޯ މެޑަލް ހޯދައިފި އެވެ.

އޭދަފުށީގައި ކުރިއަށް ދިޔަ މުބާރާތުގައި ލައިބާ ވާދަކޮށްފައި ވަނީ 13 އަހަރުން ދަށުގެ އުމުރުފުރައިގަ އެވެ. މުބާރާތުގައި ވާދަކޮށް ލައިބާ ރަން މެޑަލް ހޯދާފައި ވަނީ ސިންގަލްސްގެ އޯޕަން އިވެންޓުގެ އިތުރުން، 13 އަހަރުން ދަށުގެ ސިންގަލްސް އިވެންޓު އަދި 13 އަހަރުން ދަށުގެ ޑަބަލްސް އިވެންޓުންނެވެ. ޑަބަލްސް އިވެންޓުގައި ލައިބާގެ ޕެއާ ޕާޓްނަރަކީ އަލާޔާ ނަދީމް އެވެ.

މީގެ އިތުރުން ލައިބާ ލޯ މެޑަލް ހޯދާފައި ވަނީ އޯޕަން ކެޓަގަރީގެ މިކްސް ޑަބަލްސް އިވެންޓުންނެވެ. އެ އިވެންޓުގައި ލައިބާ ލޯ މެޑަލް ހޯދިއިރު، ޕެއާ ޕާޓްނަރަކީ ކަމާލް އޮވައިސް އެވެ.

އޭދަފުށި މުބާރާތުން ލައިބާ ރަނގަޅު ކާމިޔާބެއް ހޯދާފައިވާއިރު، ލައިބާ އަންނަނީ ރާއްޖޭގައި އޮންނަ މުބާރާތްތަކުގެ އިތުރުން، ބައިނަލްއަޤުވާމީ މުބާރާތްތަކުގައި ވެސް ވާދަކޮށް ގިނަ ކާމިޔާބީތަކެއް ހޯދަމުންނެވެ.

މިއަހަރު އާމޭނިއާގައި ކުރިއަށް ދިޔަ މުބާރާތުގައި ވާދަކޮށް ލައިބާ ވަނީ ތިން ރަން މެޑަލް ހޯދައިފަ އެވެ. މިއީ ބެޑްމިންޓަންގައި ލައިބާ ހޯދި ތާރީޚީ ކާމިޔާބެކެވެ. އޭގެ ފަހުން ޖޯޖިއާގައި ކުރިއަށް ދިޔަ ބަޓޫމީ ކަޕްގައި ލައިބާ ވަނީ ރިހި މެޑައްޔަކާއި، ދެ ލޯ މެޑަލް ހޯދައިފަ އެވެ.

މިދިޔަ އަހަރު ވެސް ލައިބާ ވަނީ ބައިނަލްއަޤުވާމީ މުބާރާތްތަކުގައި ވާދަކޮށް ރަނގަޅު ކާމިޔާބީތަކެއް ހޯދައިފަ އެވެ. ޤައުމީ ފެންވަރުގައި ވެސް ލައިބާ ރަނގަޅު ކާމިޔާބީތަކެއް ހޯދާފައިވާއިރު، އެންމެ ފަހުން އޮތް ޤައުމީ ބެޑްމިންޓަން ޓީމަށް ކުޅުންތެރިން ހޮވުމުގެ ސެލެކްޝަންގައި ވާދަކޮށް، ލައިބާ ވަނީ އުމުރުން 12 އަހަރުގައި ޤައުމީ ޓީމުން ޖާގަ ހޯދައިފަ އެވެ.

އޭދަފުށީ މުބާރާތުގެ ފިރިހެން ސިންގަލްސް އިވެންޓު ކާމިޔާބު ކުރީ ނިބާލް އަޙުމަދު އެވެ.