މޮލްޑޯވާ މުބާރާތުން ރިހި އަދި ލޯ މެޑަލް ހޯދައި، ލައިބާ އަށް ރަނގަޅު ފެށުމެއް

މޮލްޑޯވާގައި ކުރިއަށް ދިޔަ ވިންޓަރ ޝިސިނައު 2025 ބެޑްމިންޓަން މުބާރާތުގައި ވާދަކޮށް ދެ މެޑަލް ހޯދައި، ރާއްޖޭގެ ޒުވާން ބެޑްމިންޓަން ކުޅުންތެރިޔާ ލައިބާ އަޙުމަދު މަޚްލޫފް (އެލީ) މިއަހަރުގެ ފެށުން ރަނގަޅު ކޮށްފި އެވެ.

ހުކުރު ދުވަހުން ފެށިގެން ހޮނިހިރު ދުވަހުގެ ނިޔަލަށް ކުރިއަށް ދިޔަ މި މުބާރާތުގައި ވާާދަކޮށް ލައިބާ ވަނީ ރިހި މެޑަލް އަދި ލޯ މެޑަލް ހޯދައިފަ އެވެ. ލައިބާ ރިހި މެޑަލް ހޯދާފައި ވަނީ މިކްސް ޑަބަލްސް އިވެންޓުންނެވެ. މި އިވެންޓުގައި ލައިބާގެ ޕެއާ ޕާޓްނަރަކީ ރޮމޭނިއާގެ ބެންޖަމިން އެވެ. އަދި ލައިބާ ލޯ މެޑަލް ހޯދީ ޑަބަލްސް އިވެންޓުންނެވެ. މި އިވެންޓުގައި ލައިބާގެ ޕެއާ ޕާޓްނަރަކީ މޮލްޑޯވާގެ އިރީނާ އެވެ.

މުބާރާތުގެ މިކްސް ޑަބަލްސް އިވެންޓުގައި ލައިބާ އަދި ބެންޖަމިންގެ ޕެއާ އިން ވަނީ ވާދަވެރި ކުޅުމަކަށްފަހު ކުއާޓާ ފައިނަލް އަދި ސެމީ ފައިނަލްގެ މެޗު ކާމިޔާބު ކޮށްފަ އެވެ. އެ ދެ މެޗު ވެސް ލައިބާ އަދި ބެންޖަމިންގެ ޕެއާ އިން ކާމިޔާބު ކުރީ ދެ ސެޓު އެއް ސެޓުންނެވެ. މި އިވެންޓުގެ ފައިނަލްގައި ލައިބާ އަދި ބެންޖަމިންްގެ ޕެއާ ނިކުމެފައި ވަނީ ރޮމޭނިއާގެ ލުކާ އަދި އިސަބެލާގެ ޕެއާއާ ދެކޮޅަށެވެ. ފައިނަލް މެޗުގައި ލުކާ އަދި އިސަބެލާގެ ޕެއާ އިން ވަނީ ދެ ސެޓުން ލައިބާ އަދި ބެންޖަމިންގެ ޕެއާގެ މައްޗަށް ކުރި ހޯދައިފަ އެވެ.

ޑަބަލްސް އިވެންޓުގައި ލައިބާ އަދި އިރީނާ ވަނީ ސެމީ ފައިނަލްގައި ވާދަކޮށްފަ އެވެ. ވާދަވެރި ކުޅުމަކަށްފަހު ސެމީ ފައިނަލް މެޗުން ބަލިވީ ދެ ސެޓު އެއް ސެޓުންނެވެ. ސެމީ ފައިނަލްގައި މޮލްޑޯވާގެ ޕެޓްރިސިއާ އަދި ޑާރިއާގެ ޕެއާއާ ވާދަކޮށް ލައިބާ އަދި އިރީނާގެ ޕެއާ އިން ވަނީ ފުރަތަމަ ސެޓު ވެސް ކާމިޔާބު ކޮށްފަ އެވެ. ނަމަވެސް ދެން ކުޅުނު ދެ ސެޓު ކާމިޔާބުކޮށް ޕެޓްރިސިއާ އަދި ޑާރިއާ ވަނީ މެޗުން މޮޅުވެފަ އެވެ.

މިއީ މިއަހަރުގެ ތެރޭގައި ލައިބާ ވާދަކުރި ބައިނަލްއަޤުވާމީ ފުރަތަމަ މުބާރާތެވެ. ބެޑްމިންޓަން ޔޫރަޕު ކަލަންޑަރުގެ މުބާރާތްތަކުގައި ވާދަކޮށް 2023 ވަނަ އަހަރު އަދި 2024 ވަނަ އަހަރު ގައި ލައިބާ ވަނީ ޖުމްލަ 17 ބައިނަލްއަގުވާމީ މެޑަލް ހޯދައިފަ އެވެ. އެއީ ހަތަރު ރިހި މެޑަލް އަދި 13 ލޯ މެޑަލް އެވެ. މޮލްޑޯވާގެ މުބާރާތުން ހޯދި ދެ މެޑައްޔާއެކު ލައިބާ ވަނީ މިހާތަނަށް 19 ބައިނަލްއަޤުވާމީ މެޑަލް ކާމިޔާބު ކޮށްފަ އެވެ.

މިދިޔަ އަހަރު ބޭއްވި މޯލްޑިވްސް ސްޕޯޓްސް އެވޯޑްސްގައި، ޔަންގް އެތުލީޓް އޮފް ދަ އިޔަރ ކެޓެގަރީ އިން ލައިބާ ވަނީ 11 އަހަރުގައި ބްރޯންސް މެޑަލް ހާސިލްކޮށްފަ އެވެ.