ލިތުއޭނިއާ މުބާރާތުން ލައިބާ ދެ ލޯ މެޑަލް ހޯދައިފި

ލިތުއޭނިއާގައި ކުރިއަށް ދިޔަ، ލިތުއޭނިއަން އިންޓަނޭޝަނަލް ފެސްޓިވަލްގައި ރާއްޖޭގެ ޒުވާން ކުޅުންތެރިޔާ، ލައިބާ އަޙުމަދު މަޚްލޫފް (އެލީ) ދެ ލޯ މެޑަލް ހޯދައިފި އެވެ.

ނޮވެމްބަރު މަހުގެ އެއް ވަނަ ދުވަހުން ފެށިގެން، ދެ ވަނަ ދުވަހުގެ ނިޔަލަށް ކުރިއަށް ދިޔަ މުބާރާތުގައި ވާދަކޮށް ލައިބާ ލޯ މެޑަލް ހޯދާފައި ވަނީ ޑަބަލްސް އަދި މިކްސް ޑަބަލްސް އިވެންޓުންނެވެ.

ޑަބަލްސް އިވެންޓުގައި ލައިބާގެ ޕެއާ ޕާޓްނަރަކީ ޔޫކްރެއިންގެ އެމާ ކަރަޓަނޯވާ އެވެ. ޑަބަލްސް ސެމީ ފައިނަލް މެޗުގައި ލައިބާ އަދި އެމާގެ ޕެއާ ބަލިވެފައި ވަނީ ދެ ސެޓު އެއް ސެޓުންނެވެ. އެ މެޗުގެ ފުރަތަމަ ސެޓު ލިތުއޭނިއާގެ ޕެއާ އިން ކާމިޔާބު ކުރީ 21-19 އިންނެވެ. ނަމަވެސް ލައިބާާ އަދި އެމާގެ ޕެއާ އިން ވަނީ 11-21 އިން ދެ ވަނަ ސެޓު ކާމިޔާބު ކޮށްފަ އެވެ. ތިން ވަނަ ސެޓުގައި ލިތުއޭނިއާގެ ޕެއާ އިން ވަނީ، 21-15 އިން ލައިބާ އަދި އެމާގެ މައްޗަށް ކުރި ހޯދައިފަ އެވެ.

މިކްސް ޑަބަލްސް އިވެންޓުގައި ލަައިބާގެ ޕެއާ ޕާޓްނަރަކީ އެސްޓޯނިއާގެ އަލްފްރެޑް ޕާވް އެވެ. އެ މެޗުގައި ލައިބާގެ ޕެއާ އިން ވާދަކޮށްފައި ވަނީ ލަޓްވިއާ އަދި ޔޫކްރެއިންގެ ޕެއާ އަކާ އެވެ. އެ މެޗުން ލައިބާ އަދި ޕާވްގެ ޕެއާ ބަލިވެފައި ވަނީ ސީދާ ދެ ސެޓުންނެވެ. އެއީ ފުރަތަމަ ސެޓު 21-07 އަދި ދެ ވަނަ ސެޓު 21-10 އިންނެވެ.

މުބާރާތުގެ ސިންގަލްސް އިވެންޓުގައި ވެސް ލައިބާ ވަނީ ވާދަކޮށްފަ އެވެ. ސިންގަލްސް އިވެންޓުގެ ގުރޫޕް ސްޓޭޖުގައި ކުޅުނު ތިން މެޗުން ވެސް މޮޅުވެ، ލައިބާ ވަނީ ކުއާޓާ ފައިނަލް އިން ފުރުސަތު ހޯދައިފަ އެވެ. ނަމަވެސް ކުއާޓާ ފައިނަލްގައި ލައިބާ ބަލިވެފައި ވަނީ ޔޫކްރެއިންގެ އެއް ވަނަ ކުޅުންތެރިޔާ އެމާ އަތުންނެވެ. އެ މެޗު އެމާ ކާމިޔާބު ކުރީ ދެ ސެޓު އެއް ސެޓުންނެވެ.

މި މުބާރާތުގައި ލިތުއޭނިއާގެ އިތުރުން، ލަޓްވިއާ، ޕޮލެންޑު، އެސްޓޯނިއާ އަދި ޔޫކްރެއިންގެ ޓޮޕް ކުޅުންތެރިން ވާދަކުރި އެވެ. ދެ ދުވަހުގެ މުއްދަތަކަށް ކުރިއަށްދާ މި މުބާރާތަކީ، ބެޑްމިންޓަން ޔޫރަޕުގެ ކަލަންޑަރު މުބާރާތެކެވެ. ބެޑްމިންޓަން ޔޫރަޕުގެ ކަލަންޑަރު މުބާރާތްތަކުގައި ވާދަކޮށް، މިއަހަރުގެ ތެރޭގައި ލައިބާ ވަނީ ޖުމުލަ އަށް މެޑަލް ހޯދައިފަ އެވެ.