ޖޯޖިއާގައި ކުރިއަށް ދާ ބަޓޫމީ ކަޕް - ޔޫތު އިންޓަނޭޝަނަލް ބެޑްމިންޓަން މުބާރާތުގައި ވާދަ ކުރުމަށް، ރާއްޖޭގެ ޒުވާން ބެޑްމިންޓަން ކުޅުންތެރިޔާ ލައިބާ އަޙުމަދު މަޚްލޫފް (އެލީ) ޖޯޖިއާ އަށް ގޮސްފި އެވެ.

ޖޯޖިިއާގެ ބަޓޫމީ ސިޓީގައި މި މުބާރާތް ކުރިއަށް ދާނީ އޮގަސްޓު މަހުގެ 22 ވަނަ ދުވަހުން، 24 ވަނަ ދުވަހުގެ ނިޔަލަށެވެ. މި މުބާރާތުގައި ތުރުކީ، ޖޯޖިއާ، ކަޒަކިސްތާން، އާމޭނިއާ، ލެޓްވިއާ، އަޒަރުބައިޖާން އަދި ދިވެހި ރާއްޖެ އިން ވެސް ވާދަ ކުރާނެ އެވެ.

މުބާރާތުގައި ޖުމުލަ 78 ކުޅުންތެރިން ވާދަ ކުރާނެ އެވެ. މުބާރާތުގައި 11 އަހަރުން ދަށުގެ އިތުރުން، 13 އަހަރުން ދަށް އަދި 15 އަހަރުން ދަށުގެ އުމުރު ފުރައިގެ ސިންގަލްސް، ޑަބަލްސް އަދި މިކްސް ޑަބަލްސްގެ ކުޅުން ކުރިއަށް ދާނެ އެވެ. މިއީ ޖޯޖިއާގެ ޤައުމީ ބެޑްމިންޓަން ފެޑެރޭޝަން އިން އިންތިޒާމު ކޮށްގެން ބާއްވާ މުބާރާތެކެވެ.

ބައިނަލްއަޤުވާމީ މުބާރާތްތަކުގައި ވާދަކޮށް ގިނަ ކާމިޔާބީތަކެއް ހޯދާފައިވާ ލައިބާ، މި މުބާރާތުގައި ވާދަ ކުރާނީ 13 އަހަރުން ދަށުގެ އުމުރު ފުރައިގަ އެވެ. އެގޮތުން ސިންގަލްސް އިވެންޓުގެ އިތުރުން، ޑަަބަލްްސް އަދި މިކްސް ޑަބަލްސްގައި ވެސް ލައިބާ ވާދަ ކުރާނެ އެވެ.

މުބާރާތުގެ ޑަބަލްސް އިވެންޓުގައި ލައިބާގެ ޕެއާ ޕާޓްނަރަކީ ޖޯޖިއާގެ ޝަޚްބަޒިއަން މަގްދާ އެވެ. އަދި މިކްސް ޑަބަލްސް އިވެންޓުގެ ޕެއާ ޕާޓްނަރަކީ އާމޭނިއާގެ މަނުކްޔަން ނާރެކް އެވެ.

ލައިބާ ވަނީ މިދިޔަ އަހަރު ވެސް މި މުބާރާތުގައި ވާދަކޮށްފަ އެވެ. އެ ފަހަރުގެ މުބާރާތުން ލައިވާ ވަނީ ދެ މެޑަލް ހޯދައިފަ އެވެ. އެއީ ސިންގަލްސް އިވެންޓުގެ ލޯ މެޑަލްގެ އިތުރުންމ ޑަބަލްސް އިވެންޓުގެ ރިހި މެޑަލް އެވެ.