އާމޭނިއާ މުބާރާތުގައި ލައިބާ ވާދަކުރަނީ

އާމޭނިއާގައި ކުރިއަށްދާ ބެޑްމިންޓަން މުބާރާތެއްގައި ވާދަ ކުރުމަށް، ރާއްޖޭގެ ޒުވާން ބެޑްމިންޓަން ކުޅުންތެރިޔާ ލައިބާ އަޙުމަދު މަޚްލޫފް (އެލީ) އެ ޤައުމަށް ގޮސްފި އެވެ.

އާމޭނިއާގައި މި މުބާރާތް ކުރިއަށް ދާނީ ޖޫން މަހުގެ ހަ ވަނަ ދުވަހުން، އަށް ވަނަ ދުވަހުގެ ނިޔަލަށެވެ. "އާމޭނިއާ ޔޫތު އޯޕަން 2025" ގެ ނަމުގައި ކުރިއަށް ގެންދާ މި މުބާރާތަކީ، ބެޑްމިންޓަން ޔޫރަޕު ކަލަންޑަރުގެ މުބާރާތެކެވެ.

އާމޭނިއާގެ ވެރި ރަށް ޔެރަވަންގައި މި މުބާރާތް ކުރިއަށް ދާއިރު، މުބާރާތުގައި ޖުމުލަ 92 ޤައުމަށް ވުރެ ގިނަ ޤައުމުގެ ކުޅުންތެރިން ވާދަކުރާނެ އެވެ. މި މުބާރާތަކީ އުމުރުން 13 އަހަރާއި 15 އަހަރާ ދެމެދުގެ ކުޅުންތެރިންނަށް ޚާއްސަކޮށްގެން ބާއްވާ މުބާރާތެކެވެ.

ބައިނަލްއަޤުވާމީ މުބާރާތްތަކުގައި މީގެ ކުރިން ވެސް ވާދަކޮށް ރަނގަޅު ކާމިޔާބީތަކެއް ހޯދާފައިވާ ލައިބާ، މި މުބާރާތުގެ ތިން އިވެންޓެއްގައި ވާދަކުރާނެ އެވެ. އެއީ 13 އަހަރުން ދަށުގެ ސިންގަލްސް އިވެންޓުގެ އިތުރުން، 13 އަހަރުން ދަށުގެ ޑަބަލްސް އިވެންޓު އަދި 13 އަހަރުން ދަށުގެ މިކްސް ޑަބަލްސް އިވެންޓުގަ އެވެ.

ލައިބާ އަންނަނީ ރާއްޖޭގައި އޮންނަ ބެޑްމިންޓަން މުބާރާތްތަކުގެ އިތުރުން، ބައިނަލްއަޤުވާމީ ބެޑްމިންޓަން މުބާރާތްތަކުގައި ވާދަކޮށް ރަނގަޅު ކާމިޔާބީތަކެއް ހޯދަމުންނެވެ. އެގޮތުން ބެޑްމިންޓަން ޔޫރަޕު ކަލަންޑަރުގައި ހިމެނޭ މުބާރާތްތަކުގައި ވާދަކޮށް ލައިބާ ވަނީ މިހާތަނަށް 20 މެޑަލް ހޯދައިފަ އެވެ. އެއީ ފަސް ރިހި މެޑަލްގެ އިތުރުން، 15 ލޯ މެޑަލް އެވެ.

މޯލްޑިވްސް ސްޕޯޓްސް އެވޯޑްސްގެ މިދިޔަ އަހަރުގެ ޔަންގް އެތުލީޓު އޮފް ދަ އިޔާގެ ތިން ވަނަ ލައިބާ ވަނީ ހޯދައިފަ އެވެ.