ފަހު ވަގުތު ސައުތު އޭޝިއަން ޖޫނިއާ މުބާރާތަށް ނުދާން ނިންމުމުން ބެލެނިވެރިންގެ ކަންބޮޑުވުން

މިއަހަރު ޕާކިސްތާންގައި އޮންނަ ސައުތު އޭޝިއަން ޖޫނިއާ ބެޑްމިންޓަން ޗެމްޕިއަންޝިޕްގައި ބައިވެރި ނުވާން، ފަހު ވަގުތު ރާއްޖެ އިން ނިންމުމުން ބެލެނިވެރިން ކަންބޮޑުވުން ފާޅު ކޮށްފި އެވެ.

ޕާކިސްތާންގެ އިސްލާމްއާބާދުގައި މުބާރާތް ކުރިއަށް ގެންދިޔުމަށް ހަމަޖެހިފައި އޮތީ އޭޕްރީލް މަހުގެ އެއް ވަނަ ދުވަހުން ފެށިގެން، ހަތް ވަނަ ދުވަހުގެ ނިޔަލަށެވެ. މުބާރާތުގެ ތިން އުމުރުފުރާއެއްގައި ރާއްޖޭގެ 12 ކުޅުންތެރިން ވާދަ ކުރާ ގޮތަށް އޮތީ ހަަމަޖެހިފަ އެވެ. އެއީ 16 އަހަރުން ދަށުގެ އިތުރުން، 19 އަހަރުން ދަށް އަދި 23 އަހަރުން ދަށުގެ އުމުރުފުރާ އެވެ. 

މުބާރާތުގައި ބައިވެރިވުމަށް ރާއްޖޭގެ ޓީމު ފުރުމަށް ހަމަޖެހިފައި އޮތީ އާދީއްތަ ދުވަހުގެ ހެނދުނު 10:00 ގައެވެ. ނަމަވެސް، ހޮނިހިރު ދުވަހުގެ ރޭ ގާތް ގަނޑަކަށް 23:00 ހާއިރު ބެލެނިވެރިންނަށް އަންގާފައި ވަނީ ރާއްޖެ އިން މުބާރާތުގައި ބައިވެރި ނުވާން ނިންމި ކަމަށެވެ. އެގޮތުން އެއީ މިހާރު އެމެރިކާ އާއި އިޒްރޭލް އިން އީރާންއާ ދެކޮޅަށް ކުރިއަށް ގެންދާ ހަނގުރާމައިގެ ސަބަބުން ކަމަށް ބުނެ އެވެ. 

ނަމަވެސް ބެލެނިވެރިން ކަންބޮޑުވުން ފާޅު ކޮށްފައި ވަނީ، ހަނގުރާމަ ފެށިގެން ކުރިއަށްދާތާ މަސް ދުވަސްވީއިރު ވެސް، ރާއްޖެ އިން އެންމެ ފަހު ވަގުތު މުބާރާތުގައި ބައިވެރި ނުވުމަށް ނިންމުމުންނެވެ. އެގޮތުން ބެލެނިވެރިން ބުނެފައި ވަނީ ރަށް ރަށުން ސެލެކްޓުވި ކުދިން މާލެ އައިސް، ބެލެނިވެރިން ގިނަ ޚަރަދު ތަކެއް ކުރި ފަހުން، އެންމެ ފަހު ވަގުތު އެގޮތަށް ނިންމުމަކީ ކަންބޮޑުވުމެއް ކަމަށެވެ. ޚާއްސަކޮށް ޑޮލަރުގެ އަގު މިހާ ބޮޑު ދުވަސްވަރެއްގައި، އެތައް ދަތިތަކާ އެކު ވެސް ޑޮލަރު ހޯދުމުގެ އިތުރުން، ކުދިންނަށް ބޭނުންވާ އެހެން ކަންކަން ބެލެނިވެރިން ހަމަޖައްސާފައިވާ ކަމަށް ބުންޏެވެ. 

ބެލެނިވެރިން ބުނީ މި ދުވަސްވަރު މުބާރާތުގައި ބައިވެރި ނުވާން ނިންމިއިރު، އެފަދަ ނިންމުމެއް ކުރިން ނިންމި ނަމަ މާ ރަނގަޅުވީސް ކަމަށެވެ. ނަމަވެސް، އެތައް ދުވަސް ތަކެއް ފަހުން، އަދި އެތައް ތައްޔާރީ ތަކެއްވީ ފަހުން އެންމެ ފަހު ވަގުތު އެހެން ނިންމުމަކީ ބޮޑު ގެއްލުމެއް ކަމަށް ބެލެނިވެރިން ފާހަގަ ކޮށްފައިވެ އެވެ. ބެލެނިވެރިން ބުނެފައި ވަނީ، މުބާރާތުގައި ބައިވެރި ނުވާން ނިންމުމުގެ ކުރިން، ހޮނިހިރު ދުވަހު ކުޅުންތެރިންނަށް ޖާޒީ ވެސް ހަވާލު ކޮށްފައިވާ ކަމަށެވެ. 

މިކަމާ ގުޅިގެން ބެޑްމިންޓަން އެސޯސިއޭޝަންގެ ބަހެއް ހޯދުމަށް މަސައްކަތް ކުރި ނަމަވެސް، އެކަން ކާމިޔާބުވެފައި ނުވެ އެވެ.