އިސްލާމްއާބާދު އެއްބަސްވުމަށް އިހުތިރާމުކޮށް އެމެރިކާއާއި އީރާނުން ހަމަލާތައް ހުއްޓާލަން ޖެހޭ: ޒަރްދާރީ
14 އޮކްޓޯބަރު 2026 | ބުދަ 02:42ޕާކިސްތާނާއި ރަޝިޔާއާ ދެމެދު އޮތް ވިޔަފާރީގެ ގުޅުން އިތުރަށް ފުޅާކުރުމާ ގުޅޭގޮތުން ރަޝިޔާގެ ދާޚިލީ ވަޒީރު ވްލަދިމިއާ ކަލާކޮލްތެސެފް، ޕާކިސްތާނުގެ ރައީސް އާޞިފް ޢަލީ ޒަރްދާރީއާ ބައްދަލުކުރައްވައި މަޝްވަރާކުރައްވައިފި. މި ބައްދަލުވުމުގައި ސަރަހައްދީ ހަމަޖެހުމާއި ކަނޑުދަތުރުފަތުރުގެ ރައްކާތެރިކަމާ މެދު ކަންބޮޑުވުން ފާޅުކުރެއްވުމުގެ އިތުރުން، ޓެރަރިޒަމާއި ސައިބާ ކުށްތައް ހުއްޓުވުމުގައި ދެ ގައުމުން ގުޅިގެން މަސައްކަތްކުރުމަށް ވަނީ އެއްބަސްވެފައި
ޕާކިސްތާނުގެ ރައީސް އާޞިފް ޢަލީ ޒަރްދާރީ ރަޝިޔާގެ ދާޚިލީ ވަޒީރު ވްލަދިމިއާ ކަލާކޮލްތެސެފްއާ ބައްދަލުކުރައްވަނީ | އެކްސް
މެދުއިރުމަތީގެ ހަމަނުޖެހުންތައް ހައްލުކުރުމަށް ޖޫން މަހު އެކުލަވާލާފައިވާ 'އިސްލާމްއާބާދު އެއްބަސްވުމުގެ' ދަށުން ވެފައިވާ ވައުދުތަކަށް އިހުތިރާމުކޮށް ކެތްތެރިކަން އިސްކުރުމަށް، އެމެރިކާއާއި އީރާނަށް ޕާކިސްތާނުގެ ރައީސް އާޞިފް ޢަލީ ޒަރްދާރީ އަންގާރަ ދުވަހު ގޮވާލައްވައިފި އެވެ.
ޚިޔާލުތަފާތުވުންތައް ހައްލުކުރަންވާނީ މަޝްވަރާއާއި ޑިޕްލޮމަސީގެ އުސޫލުތަކުގެ ތެރެއިންކަމަށާއި، ހުރްމުޒް ކަނޑުއޮޅިއާއި ރަތް ކަނޑުގެ ސަރަހައްދުގައި ރައްކާތެރިކަމާއެކު ދަތުރުފަތުރު ކުރެވޭނެ މަގު ތަނަވަސްކުރުމަކީ ނުހަނު މުހިންމު ކަމެއްކަމަށް، ޒަރްދާރީ ވިދާޅުވި އެވެ. އޭނާ މި މޭރުމުން ވާހަކަފުޅު ދައްކަވާފައި މި ވަނީ، އިސްލާމްއާބާދުގައި ރަޝިޔާގެ ދާޚިލީ ވަޒީރު ވްލަދިމިއާ ކަލާކޮލްތެސެފްއާއެކު ބޭއްވެވި ބައްދަލުކުރެއްވުމެއްގަ އެވެ.
ޚާއްސަކޮށް ކަނޑު ދަތުރުފަތުރުކުރާ އުޅަނދުތަކަށާއި، ހަކަތަ އުފައްދާ މަރުކަޒުތަކުގެ އިތުރުން މުހިންމު އުމްރާނީ ވަސީލަތްތަކަށް އަމާޒުކޮށް ދެމުންދާ ހަމަލާތަކާ ގުޅިގެން ގަލްފުގެ ސަރަހައްދުގައި އުފެދިފައިވާ ނުތަނަވަސްކަމާމެދު ފުން ކަންބޮޑުވުމެއް އޮތްކަން ޒަރްދާރީ ހާމަކުރެއްވި އެވެ. މި ނުތަނަވަސްކަމުގެ ސަބަބުން ސަރަހައްދީ ހަމަޖެހުމަށާއި، ބައިނަލްއަގުވާމީ ހަކަތައިގެ ރައްކާތެރިކަމަށާއި، ވިޔަފާރީގެ އިތުރުން ސަޕްލައި ޗޭންތަކަށް ބޮޑެތި ގޮންޖެހުންތަކެއް ކުރިމަތިވަމުންދާކަމުގެ އިންޒާރު ދެއްވުމަށްފަހު، ހުރިހާ ޤައުމެއްގެ ސިޔާދަތާއި ސަރަހައްދީ ނަޒާހަތްތެރިކަމަށް އިހުތިރާމުކުރުމުގެ މުހިންމު ކަން އޭނާ ފާހަގަކުރެއްވި އެވެ.
ކަލާކޮލްތެސެފް ޕާކިސްތާނަށް ކުރައްވާ ހަތަރު ދުވަހުގެ ރަސްމީ ދަތުރުފުޅަކީ، ރަޝިޔާގެ ދާޚިލީ ވަޒީރަކު ދެކުނު އޭޝިޔާގެ މި ޤައުމަށް ކުރައްވާ ފުރަތަމަ ދަތުރުފުޅެވެ. 2025 ވަނަ މާލީ އަހަރު ދެ ޤައުމުގެ ދެމެދުގައި ކުރެވިފައިވާ 243.4 މިލިޔަން ޑޮލަރުގެ ވިޔަފާރިއަކީ އޮތް ގާބިލުކަމާ އަޅާބަލާއިރު ދަށް އަދަދެއްކަން ފާހަގަކުރައްވައި، ލީޑަރުންގެ ހެޔޮ ނިޔަތް އަމަލީ ނަތީޖާއަކަށް ބަދަލުކުރުމަށް ދެ ޤައުމަށް ކަލާކޮލްތެސެފް ގޮވާލެއްވި އެވެ. ދެ ޤައުމުގެ ދެމެދުގައި އޮތް ބަދަހި ގުޅުން ވިޔަފާރީގެ މުއާމަލާތްތަކުން ނުފެންނަކަމަށް އެއްބަސްވެވަޑައިގަންނަވައި، ވިޔަފާރި ފުޅާކުރުމަށް އަދިވެސް ވަރަށް ބޮޑަށް ޖާގަ އޮތްކަމަށް ވެސް ކަލާކޮލްތެސެފް ވިދާޅުވި އެވެ. އަދި, ރަޝިޔާއަށް ޒިޔާރަތްކުރެއްވުމަށް ޒަރްދާރީއަށް އޭނާ ދައުވަތު އެރުވި އެވެ.
މީގެ އިތުރުން، ރާވައިގެން ހިންގާ ކުށްތަކާއި، ޓެރަރިޒަމާއި، ހައްދުފަހަނަޅައިދިޔުމާއި، ޣައިރުޤާނޫނީ ހަތިޔާރާއި މަސްތުވާތަކެތީގެ ވިޔަފާރީގެ އިތުރުން ފޯނު މެދުވެރިކޮށް ހިންގާ ސްކޭމްތަކާއި ފިޝިންގ އަދި ކްރިޕްޓޯކަރަންސީ ޕިރަމިޑް ސްކީމްތައް ފަދަ ސައިބާ ކުށްތައް ހުއްޓުވުމާ ގުޅޭގޮތުން ޕާކިސްތާނުގެ ދާޚިލީ ވަޒީރު މުޙްސިން ނަޤްވީއާއެކު ކަލާކޮލްތެސެފް ވަކިން މަޝްވަރާކުރެއްވި އެވެ. ޤާނޫނު ތަންފީޒުކުރުމުގައި އޮތް އެއްބާރުލުން ބިނާވެފައި ވަނީ ދެ ޤައުމުގެ ދެމެދުގައި އޮތް އެކުވެރި އަދި ދެފަރާތަށް ފައިދާހުރި ގުޅުމުގެ މައްޗަށް ކަމަށް ރަޝިޔާގެ ވަޒީރު ވިދާޅުވިކަމަށް، އިސްލާމްއާބާދުގައި ހުންނަ ރަޝިޔާގެ އެމްބަސީން ނެރުނު ބަޔާނެއްގައި ބުންޏެވެ.
މަސްދަރު: އަނަދޮލި އޭޖެންސީ
