ޔަމަނުގެ ހޫޘީންނާ މަޝްވަރާކުރަން އީރާނުން 'މައްކާ ދިފާއީ އިއްތިހާދަށް' ހުށަހަޅައިފި
3 އޮކްޓޯބަރު 2026 | ހޮނިހިރު 08:50ޔަމަނުގެ މަސްރަހު ފިނިކުރުމަށް ހޫޘީންނާއެކު ސިޔާސީ މަޝްވަރާތައް ފެށުމަށް އީރާނުން ހުށަހަޅާފައިވާތީ، އެކަމާ މެދު 'މައްކާ ދިފާއީ އިއްތިހާދު' ގެ މެންބަރުން ކަމަށްވާ ސައުދީ، ޕާކިސްތާން އަދި ތުރުކީވިލާތުން އަންނަ ހަފުތާގައި ބައްދަލުކޮށް ގޮތްތަކެއް ނިންމުމަށް ވަނީ ހަމަޖެހިފައި. މި މައްސަލަ ސިޔާސީ ގޮތުން ހައްލުކުރުމަށް އީރާނުގެ ސަރުކާރުން ބޭނުންވާ ކަން ޕާކިސްތާނުގެ ޚާރިޖީ ވަޒީރު ހާމަކުރެއްވިއިރު، މި އިއްތިހާދުގައި ބައިވެރިވުމަށް އިތުރު ގައުމުތަކުން ވެސް ދަނީ ޝައުގުވެރިކަން ފާޅުކުރަމުން
ޕާކިސްތާނުގެ ބޮޑުވަޒީރުގެ ނައިބު އަދި ޚާރިޖީ ވަޒީރު މުޙައްމަދު އިސްހާގު ދާރު ބައްދަލުވުމެއްގައި ބައިވެރިވެވަޑައިގަންނަވަނީ | ރޮއިޓާސް
ޔަމަނުގެ އަހުލީހަނގުރާމަ އަނެއްކާ ވެސް ފެށި، ސައުދީ އަރަބިއްޔާގެ އަސްކަރިއްޔާއާއި ޔަމަނުގެ ހަތިޔާރުއެޅި ހޫޘީ ޖަމާއަތާ ދެމެދު ހަމަލާ ބަދަލުކުރަމުންދާ ފަށާފައިވާ މި ދަނޑިވަޅުގައި، މަސްރަހު ފިނިކުރުމަށް ހޫޘީންނާއެކު ސިޔާސީ މަޝްވަރާތައް ފެށުމަށް އީރާނުން 'މައްކާ ދިފާއީ އިއްތިހާދު' ގެ މެމްބަރުންނަށް ހުށަހަޅާފައިވާ ކަން ހާމަވެއްޖެ އެވެ. މި ކަން ހާމަކުރެއްވީ ޕާކިސްތާނުގެ ބޮޑުވަޒީރުގެ ނައިބު އަދި ޚާރިޖީ ވަޒީރު މުޙައްމަދު އިސްހާގު ދާރުއެވެ.
'މައްކާ ދިފާއީ އިއްތިހާދު' ގެ މެންބަރުންނަކީ ސައުދީ އަރަބިއްޔާ، ޕާކިސްތާން އަދި ތުރުކީވިލާތެވެ. ދާރު ވިދާޅުވީ، ޔަމަނުގެ އަހުލީހަނގުރާމަ ފުޅާވެގެންދިޔުމާ ގުޅިގެން މި އިއްތިހާދުގެ ކުއްލި ބައްދަލުވުމެއް ކުރިއަށް އޮތް ހަފުތާގައި ބޭއްވުމަށް ނިންމާފައިވާ ކަމަށެވެ. އަދި، އެ ބައްދަލުވުމުގައި އީރާނުގެ ޚިޔާލާމެދު މަޝްވަރާކުރުމަށް ހަމަޖެހިފައިވާ ކަމަށެވެ.
ހޫޘީންނާ ވާހަކަ ދައްކައިގެން މައްސަލަތަކަށް ހައްލު ހޯދުމަށް ތެހްރާނުން ހުށަހަޅާފައި މި ވަނީ، ސައުދީ އަރަބިއްޔާގައި ހުރި އިސްލާމް ދީނުގެ އެންމެ މުޤައްދަސް ދެ ބިނާ ކަމަށްވާ މަސްޖިދު އަލް-ޙަރަމްއާއި މަސްދިޖު އަލް-ނަބައީއަށް އަމާޒުކޮށް ހޫޘީން ހަމަލާތަކެއް ދޭން މަސައްކަތް ކޮށްފައިވާ ކަމަށް ސައުދީ ސަރުކާރުން ތުހުމަތު ކޮށްފައިވާ ދަނޑިވަޅެއްގަ އެވެ. ނަމަވެސް، ހޫޘީން ދަނީ އެ ތުހުމަތުތައް ދޮގު ކުރަމުންނެވެ.
ދާރު ވިދާޅުވީ، މައްކާ ދިފާއީ އިއްތިހާދުގެ ބައްދަލުވުމުގައި ޔަމަނުގެ މަސްރަހާ ގުޅިގެން ކުރިއަށް އަޅާނެ ފިޔަވަޅުތަކާ މެދު މަޝްވަރާކޮށް، ގޮތް ނިންމާނެ ކަމަށެވެ. އަދި، ބައްދަލުވުން ބާއްވާނެ ތާރީޚާއި ތަނެއް ފަހުން އިއުލާނު ކުރާނެ ކަން ވެސް އޭނާ ހާމަކުރެއްވި އެވެ.
ސައުދީ އަރަބިއްޔާއަށް ހަމަލާދޭން ހޫޘީން މަސައްކަތް ކުރަމުންދާ ކަމުގެ ތުހުމަތާއެކު، އީރާނުން ވަނީ ހޫޘީންނާއި އިރާގުގައި ހަރަކާތްތެރިވާ ހަތިޔާރު އެޅި ޖަމާއަތްތަކާ ފެޔަށް ޖެހިފަ އެވެ. ދާރު ވިދާޅުވީ، ހޫޘީންގެ މައްސަލައަށް ވީ އެންމެ އަވަހަކަށް ހައްލު ހޯއްދެވުމަށް އީރާނުގެ ރައީސް މަސްޢޫދު ޕީޒިޝްކިއާން އަދި ޚާރިޖީ ވަޒީރު ޢައްބާސް ޢިރާޤިޗީ ބޭނުންފުޅުވާ ކަމަށެވެ. މި މައްސަލައިގައި ޕާކިސްތާނުން އަމަލުކުރާނެ ގޮތުގެ މައުލޫމާތު ތެހްރާނާ ހިއްސާކޮށްފައިވާނެ ކަމަށް ވެސް ދާރު ވިދާޅުވި އެވެ.
"މިއީ ލިޔުމުން ހުށަހަޅާފައިވާ، ވަރުގަދަ ހުށަހެޅުމެއް ނޫން. މިއީ ދެ ޚާރިޖީ ވަޒީރުންގެ މެދުގައި ކުރެވުނު ޚިޔާލު ބަދަލުކުރުމެއް،" ސިޔާސީ ގޮތުން ކަންކަން ހައްލުކުރުމަށް ހުށަހެޅި މި ޚިޔާލަކީ ހެޔޮ ނިޔަތެއްގައި ކުރި ކަމެއްކަން ފާހަގަކުރައްވަމުން ދާރު ވިދާޅުވި އެވެ. އަސްކަރީ ފިޔަވަޅު އެޅުމުގެ ބަދަލުގައި، އޭގެ ބަދަލެއްގެ ގޮތުން މިކަމާމެދު މަޝްވަރާކުރެވޭނެ ކަމަށް އޭނާ ވިދާޅުވި އެވެ.
މައްކާ ދިފާއީ އިއްތިހާދުގައި ބައިވެރިވުމަށް ހަޔަކަށްވުރެ ގިނަ ގައުމުން ޝައުގުވެރިކަން ފާޅުކޮށްފައިވާ ކަން ވެސް ދާރު ހާމަކުރެއްވި އެވެ. ނަމަވެސް، އެއީ ކޮން ގައުމުތަކެއް ކަމެއް ނުވަތަ އެއީ ހުސް މުސްލިމް އަޣުލަބިއްޔަތު އޮތް ގައުމުތަކެއް ކަމެއް އޭނާ ސާފުކޮށްދެއްވާފައެއް ނުވެ އެވެ. އަދި, މި އެއްބަސްވުން ފުރިހަމައަށް އަމަލީ ސިފައެއްގައި ފެށެންދެން އާ މެންބަރުންނަށް ފުރުސަތު ނުދެވޭނެ ކަމަށާއި، އެ ކަމަށް އަހަރެއްހާ ދުވަސް ނަގާފާނެ ކަމަށް ވެސް އޭނާ ވިދާޅުވި އެވެ.
މަސްދަރު: ސީއެންއޭ
