ޕާކިސްތާނުގެ ޕްރޮވިންސެއްގައި ކުއްލި ހާލަތު އިއުލާނުކޮށް، އިމްރާން ޚާންގެ ޕާޓީގެ އިސް ބޭފުޅުންތަކެއް ހައްޔަރުކޮށްފި
12 އޮކްޓޯބަރު 2026 | ހޯމަ 09:37ޕާކިސްތާނުގެ ޚައިބަރު ޕަޚްތުންޚާ ޕްރޮވިންސްގައި ކުއްލި ނުރައްކަލުގެ ހާލަތު އިއުލާނުކޮށް، ކުރީގެ ބޮޑުވަޒީރު އިމްރާން ޚާންގެ ޕީޓީއައިގެ އިސް ބޭފުޅުންތަކެއް ސަރުކާރުން ހައްޔަރުކޮށްފި. މި ފިޔަވަޅު އެޅީ ހަނގުރާމަވެރިން ހުއްޓުވުމަށް ޕްރޮވިންސް ސަރުކާރު ނުކުޅެދުމުން ކަމަށް މަރުކަޒީ ސަރުކާރުން ބުނި ނަމަވެސް، ޕީޓީއައި އިން ތުހުމަތުކުރަނީ މިއީ ޚާން މިނިވަންކުރުމަށް ގޮވާލައި ބާއްވާ ހިނގާލުން ހުއްޓުވުމަށް ކުރި ކަމެއްގެ ގޮތުގައި. މި ހާދިސާއާ ގުޅިގެން ޕާކިސްތާނުގެ ސިޔާސީ މަސްރަހު ވަނީ ވަރަށް ބޮޑަށް ނުތަނަވަސްވެފައި
ޕާކިސްތާންގެ ޚައިބަރް ޕަޚްތުންޚާގެ ޗީފް މިނިސްޓަރު ހައްޔަރުކުރުމަށް ޕާކިސްތާނުގެ ސަލާމަތީ ބާރުން ހިންގި އޮޕަރޭޝަނުގައި މަގުަތައް ބަންދުކުރުމަށް ބޭނުންކޮށްފައިވާ ކޮންޓޭނަރުތައް ކައިރީގައި އާންމުންގެ ބަޔަކު ހަރަކާތްތެރި ވަނީ | ރޮއިޓަރސް
ޕާކިސްތާނުގެ ކުރީގެ ބޮޑުވަޒީރު އިމްރާން ޚާންގެ ޕާޓީގެ ސިޔާސީ ބޭފުޅުންތަކެއް ހައްޔަރުކޮށްފި އެވެ. އެ ބޭފުޅުން ހައްޔަރުކޮށްފައި ވަނީ، ކުއްލި ނުރައްކަލުގެ ހާލަތު އިއުލާނުކޮށް ޕްރޮވިންސެއްގެ ސަރުކާރު ސަސްޕެންޑު ކުރުމަށްފަހުކަމަށް، މަރުކަޒީ ސަރުކާރުން ހޯމަ ދުވަހު ބުންޏެވެ.
އާދީއްތަ ދުވަހު ޕާކިސްތާނުގެ ރައީސް ވަނީ ކުއްލި ނުރައްކަލުގެ ހާލަތު އިއުލާނުކުރައްވައި، ހުޅަނގު އުތުރުގެ ޚައިބަރު ޕަޚްތުންޚާ ޕްރޮވިންސްގެ ސަރުކާރު ސަސްޕެންޑު ކުރައްވާފަ އެވެ. އެ ޕްރޮވިންސްގެ ސަރުކާރު ހިންގަވަމުން ގެންދެވީ އިމްރާން ޚާންގެ އަރިސް ބޭފުޅެއް ކަމަށްވާ ސުހައިލް އަފްރީދީ އެވެ.
މަރުކަޒީ ސަރުކާރުން ބުނީ، އަފްޣާނިސްތާނާ އިންވެގެން އޮންނަ އެ ޕްރޮވިންސްގައި ހަރަކާތްތެރިވާ ހަނގުރާމަވެރިންގެ މައްސަލަ ހައްލުކުރުމުގައި ޕްރޮވިންސްގެ ސަރުކާރު ނުކުޅެދުމުން ކުއްލި ނުރައްކަލުގެ ހާލަތު އިއުލާނުކުރަން ޖެހުނީ ކަމަށެވެ. ނަމަވެސް، އިމްރާން ޚާންގެ ޕާކިސްތާން ތަހްރީކޭ އިންސާފް ޕާޓީން (ޕީޓީއައި) ވަނީ އެ ތުހުމަތު ދޮގުކޮށްފަ އެވެ. އެ ޕާޓީން ބުނީ، އެ ފިޔަވަޅު އެޅީ، ޚާން މިނިވަންކުރުމަށް ސަރުކާރަށް ފިއްތުންތައް ކުރިމަތިކުރުމުގެ ގޮތުން ވެރިރަށް އިސްލާމްއާބާދަށް ހިނގާލުމެއް ބޭއްވުމަށް އޭނާގެ ސަޕޯޓަރުން ކުރަމުންދާ މަސައްކަތް ހުއްޓުވުމުގެ ބޭނުމުގައި ކަމަށެވެ.
ކުއްލި ނުރައްކަލުގެ ހާލަތު އިއުލާނުކޮށް ޕްރޮވިންސްގެ ސަރުކާރު ސަސްޕެންޑު ކުރުމާ ގުޅިގެން، އުމުރުފުޅުން 74 އަހަރުގެ ކުރީގެ ކްރިކެޓް ތަރިއާއި އެ ޤައުމުގެ ބާރުގަދަ އަސްކަރިއްޔާއާ ދެމެދު އުފެދިފައިވާ ނުތަނަވަސްކަން ވަނީ ވަރަށް ބޮޑަށް އިތުރުވެފަ އެވެ.
ކުއްލި ނުރައްކަލުގެ ހާލަތު އިއުލާނުކުރީ ބޮޑު ހިނގާލުމަކަށް ގޮވާލާފައި ވަނިކޮށް
ކުއްލި ނުރައްކަލުގެ ހާލަތު އިއުލާނުކޮށްފައި މި ވަނީ، ޚާން މިނިވަންކުރުމަށާއި އޭނާއަށް ބޭސްފަރުވާގެ އިންތިޒާމު ހަމަޖައްސައިދިނުމަށް ގޮވާލައި އިސްލާމްއާބާދަށް ހިނގާލުމެއް ބޭއްވުމުގެ މަގުސަދުގައި އޭނާގެ ސަޕޯޓަރުން އެ ޕްރޮވިންސްގައި އެތައް ދުވަހެއް ވަންދެން އެއްވުންތައް ބޭއްވިތާ ހަފުތާއެއް ފަހުންނެވެ.
"ޗީފް މިނިސްޓަރާއި އޭނާގެ ކެބިނެޓްގެ ބައެއް މެމްބަރުން ރައްކާތެރިކަމުގެ ފިޔަވަޅެއްގެ ގޮތުން ހައްޔަރުކޮށްފައިވާކަން އަޅުގަނޑަށް ކަށަވަރުކޮށްދެވިދާނެ،" ވަޒީރު ތަލާލް ޗައުދަރީ ވިދާޅުވި އެވެ. އޭގެ ތެރެއިން އެއްވެސް ބޭފުޅެއްގެ މައްޗަށް ޝަރީއަތް ކުރަންޖެހޭ ފަދަ މައްސަލައެއް އޮތްނަމަ ދައުވާ އުފުލައި ޝަރީއަތް ކުރިއަށް ގެންދާނެ ކަމަށާއި، ނަމަވެސް އެ ނޫން ފަރާތްތައް ދޫކޮށްލާނެ ކަމަށް އޭނާ ވިދާޅުވި އެވެ. ޕީޓީއައިގެ އިސް ބޭފުޅުންތަކެއް ހައްޔަރުކޮށްފައި ވަނީ އާދީއްތަ ދުވަހު ޚައިބަރު ޕަޚްތުންޚާ ޕްރޮވިންސްގެ ހުޅަނގު އުތުރުގެ ސިޓީއެއް ކަމަށްވާ ޕިޝާވަރުގައި ހުންނަ ޕްރޮވިންސްގެ ޗީފް މިނިސްޓަރުގެ ގެކޮޅުގައި ކަމަށް ވެސް އޭނާ ވިދާޅުވި އެވެ.
މަންޒަރު ފެނުނު ފަރާތްތަކާއި އޮފިޝަލުން ބުނީ، ފުލުހުންނާއި ޕެރަމިލިޓަރީ ފޯސްތަކުން ޝިޕިންގ ކޮންޓެއިނަރުތައް ބޭނުންކޮށްގެން ޗީފް މިނިސްޓަރުގެ ގެކޮޅާއި އެ ސަރަހައްދުގައި ހުރި އެހެނިހެން މުހިންމު ތަންތަން ބަންދުކޮށް، ސަލާމަތީ ކަންކަން ވަރުގަދަކޮށްފައިވާ ކަމަށެވެ. އިމްރާން ޚާންގެ އަރިސް ބޭފުޅެއް ކަމަށްވާ ޝައުކަތު ޔޫސުފްޒާއީ ވަނީ ޕީޓީއައިގެ އިސް މެންބަރުން ހައްޔަރުކުރުން ކުށްވެރިކުރައްވައި، އެ ބޭފުޅުން މިނިވަންކުރުމަށް ގޮވާލައްވާފަ އެވެ. ރޭވިފައިވާ ހިނގާލުމުގެ ކުރިން ޚާންގެ ތިން އުޚުތުންނާއި އޭނާގެ އެތައް ސަތޭކަ ސަޕޯޓަރުންނެއް ވެސް ވަނީ ހައްޔަރުކޮށްފަ އެވެ.
މީގެ ދެ އަހަރު ކުރިން އެ ޕާޓީން ބޭއްވި އެންމެ ފަހުގެ މުޒާހަރާ ނިމިގެން ދިޔައީ ސަލާމަތީ ބާރުތަކާއެކު ހިނގި ނުރައްކާތެރި ކުރިމަތިލުންތަކަކުންނެވެ. އަދި, 2023 ވަނަ އަހަރު ޚާން ހައްޔަރުކުރުމާ ގުޅިގެން މުޅި ޤައުމުގައި ހަމަނުޖެހުންތައް އުފެދި، އޭނާގެ ސަޕޯޓަރުން ވަނީ އަސްކަރީ މަރުކަޒުތަކަށް ހަމަލާދީފަ އެވެ.
ހަނގުރާމަވެރިންގެ މައްސަލައިގައި މަޝްވަރާތައް ފޭލުވުން
ޕާކިސްތާނުގެ ގާނޫނުއަސާސީ ބުނާ ގޮތުން، ކުއްލި ނުރައްކަލުގެ ހާލަތެއްގައި ޕްރޮވިންސްތަކުގެ އިދާރާތަކުގެ ބާރުތައް މަރުކަޒީ ސަރުކާރަށް ނެގިދާނެ އެވެ. ރައީސް އާސިފް ޢަލީ ޒަރުދާރީ ކުއްލި ނުރައްކަލުގެ ހާލަތު އިއުލާނުކުރެއްވުމާ ގުޅިގެން، ޕްރޮވިންސްގެ ހިންގުން ގަވަރުނަރަކާ ހަވާލުކުރެވޭނެ ކަމަށް ޤާނޫނީ ވަޒީރު އާޒަމް ނަޒީރު ތަރާރު ވިދާޅުވި އެވެ. ފާއިތުވި މަސްތަކުގައި އެ ޕްރޮވިންސްގައި ހަނގުރާމަވެރިންގެ ހަމަލާތައް ވަނީ ވަރަށް ބޮޑަށް އިތުރުވެފަ އެވެ.
ހަނގުރާމަވެރިން ހުއްޓުވުމުގައި ޚާންގެ ޕީޓީއައި ނުކުޅެދިފައިވާ ކަމަށް މަރުކަޒީ ސަރުކާރާއި އަސްކަރިއްޔާއިން ތުހުމަތުކުރެ އެވެ. ނަމަވެސް، އެ ޕާޓީން އެ ތުހުމަތުތައް ދޮގުކުރެ އެވެ. ފާއިތުވި މަހު ހިނގާލުމަށް ގޮވާލި ފަހުން، ސަރުކާރާއި ޕީޓީއައިއިން ވަނީ އެތައް ބުރެއްގެ މަތިން މަޝްވަރާތައް ބާއްވާފަ އެވެ.
ހިނގާލުން ބޭއްވުމުގެ ހުއްދަ ދިނުން ހިމެނޭ ގޮތަށް ޕީޓީއައިގެ ހުރިހާ ޑިމާންޑެއް ޤަބޫލުކުރަން ސަރުކާރު އޮތީ ތައްޔާރަށް ކަމަށް ވަޒީރު ވިދާޅުވި އެވެ. "އަޅުގަނޑުމެން އެދުނީ ހަމައެކަނި އެއް ކަމަކަށ: އެއީ ހަނގުރާމަވެރިންގެ އަމަލުތައް ފާޅުގައި ކުށްވެރިކޮށް، އެ ފަރާތްތަކާ ދެކޮޅަށް ކުރާ މަސައްކަތުގައި އެ ޕާޓީން އަޅުގަނޑުމެންނާ ގުޅުމަށް،" އޭނާ ވިދާޅުވި އެވެ. އެ ކަމަށް އެ ޕާޓީން އެއްބަސްނުވި ކަމަށާއި، މަޝްވަރާތައް ފޭލުވީ އެ ސަބަބާ ހުރެ ކަމަށް ވެސް އޭނާ ވިދާޅުވި އެވެ.
މަސްދަރު: ރޮއިޓަރސް
