ނިއު ޒިލެންޑުން ވެސް ހިމަބިހި ޖެހިފައިވާ މީހެއް ފެނި، އޭނާއާ އެއްތަންވި މީހުން ހޯދަން ފަށައިފި
8 އޮކްޓޯބަރު 2026 | ބުރާސްފަތި 08:12ސްކޫލް ބަންދާ ދިމާކޮށް ބޭރު ގައުމުތަކަށް ދަތުރުކުރުން އިތުރުވުމާ ގުޅިގެން، ނިއު ޒިލެންޑަށް ހިމަބިހި އެތެރެވުމުގެ ނުރައްކާ ބޮޑުވެފައިވާތީ ސިއްހީ މާހިރުން އިންޒާރު ދީފި. ބަލީގެ އަލާމާތްތަކަށް ސަމާލުވުމަށާއި، ރައްކާތެރިކަމުގެ ފިޔަވަޅެއްގެ ގޮތުން އެމްއެމްއާރް ވެކްސިންގެ ދެ ޑޯޒް ފުރިހަމަކުރުމަށް ކަމާބެހޭ އިދާރާތަކުން ވަނީ އިލްތިމާސްކޮށްފައި
ހިމަބިހި ޖެހިފައިވާ ކަމަށް ޝައްކުކުރެވޭ ކުޑަކުއްޖެއްގެ އަތުގައި މީހަކު ހިފަހައްޓައިގެން | އަނަދޮލު އޭޖެންސީ
ބޭރު ޤައުމުތަކަށް ދަތުރުކުރުން އިތުރުވުމާ ގުޅިގެން، ނިއު ޒިލެންޑުން ވެސް ހިމަބިހި ޖެހިފައިވާ މީހަކު ފެނިފައިވާ ކަން އެ ޤައުމުގެ ކަމާގުޅޭ އިދާރާތަކުން ހާމަކޮށްފި އެވެ. އެ ޤައުމުގެ އާންމު ސިއްހަތާ ބެހޭ އިދާރާ، ހެލްތު ނިއު ޒިލެންޑުން ބުނީ، ބަލި ޖެހުނު މީހާއަށް އެހީތެރިކަން ފޯރުކޮށްދެމުންދާ ކަމަށެވެ. އަދި, އޭނާއާ ގާތުން އެއްތަންވި މީހުން ދެނެގަތުމުގެ މަސައްކަތް މިހާރު ކުރަމުންދާ ކަމަށް ވެސް އެ އިދާރާއިން ހާމަކުރި އެވެ.
ސްކޫލް ބަންދުގައި ބޭރު ޤައުމުތަކަށް ދަތުރުފަތުރު ކުރުން އިތުރުވުމުގެ ސަބަބުން ބޭރުން ބަލިތައް އެތެރެވުމުގެ ނުރައްކާ ބޮޑުވާކަމަށް، ގްރޭޓަރ ވެލިންގޓަންގެ މެޑިކަލް އޮފިސަރ ޑރ. ކްރެއިގް ތޯންލީ ވަނީ އިންޒާރުދެއްވާފަ އެވެ. "ސްކޫލް ބަންދު ތެރޭގައި ގިނަ ބަޔަކު ޤައުމުން ބޭރަށް ދަތުރުކޮށް ނުވަތަ އެނބުރި އަންނައިރު، މި ކޭހަކީ ކޮންމެ ވަގުތަކު ވެސް ނިއު ޒިލެންޑަށް ހިމަބިހި އެތެރެވެދާނެ ކަމުގެ އިންޒާރެއް،" ތޯންލީ ވިދާޅުވި އެވެ.
ހުންއައުމާއި، ކެއްސުމާއި، ނޭފަތުން ފެންއައުމާއި، ލޯ ރަތްވުމާއި، ހަމުގައި ބިހިނެގުން ފަދަ އަލާމާތްތައް ފެނޭތޯ ބެލުމަށް އޭނާ އާންމުންނަށް އިލްތިމާސްކުރެއްވި އެވެ. އަދި, ބައްޔަށް ހުށަހެޅިފައިވާކަމަށް ޝައްކުކުރެވޭނަމަ ލަސްނުކޮށް ސިއްހީ ލަފާ ހޯދުމަށް ވެސް ތޯންލީ އެދިވަޑައިގެންނެވި އެވެ.
ބަލި އިތުރަށް ފެތުރުން ހުއްޓުވުމަށް ޓަކައި، އަލާމާތްތައް ފެންނަ ކޮންމެ މީހަކު ވެސް ގޭގައި މަޑުކުރުމަށް ކަމާބެހޭ ފަރާތްތަކުން ވަނީ އިރުޝާދުދީފަ އެވެ. މިއާއެކު، ސިއްހީ ފަރުވާދޭ ތަންތަނަށް ދިއުމުގެ ކުރިން ސިއްހީ އެހީތެރިންނާ ގުޅުމަށް ވަނީ ލަފާދީފަ އެވެ.
ހިމަބިހި، ކޯފުއްޕި، އަދި ރުބެއްލާ (އެމްއެމްއާރް) ވެކްސިންގެ ދެ ޑޯޒް ފުރިހަމަކުރުމުން ބަލިން ފުރިހަމަ ރައްކާތެރިކަން ލިބޭނެކަން ފާހަގަކުރައްވައި، ވެކްސިން ޖެހުމުގެ މުހިންމުކަމަށް ތޯންލީ ވަރަށް ބޮޑަށް އަލިއަޅުއްވާލެއްވި އެވެ. ބަލި ފެތުރިފައިވާ ތަންތަނުގެ އެންމެ ފަހުގެ މައުލޫމާތާއި އާންމު ސިއްހަތާ ގުޅޭ ލަފާ ހޯދުމަށް ޓަކައި، އެ އިދާރާގެ ވެބްސައިޓް ގަވާއިދުން ބެލުމަށް ހެލްތު ނިއު ޒިލެންޑުން ވަނީ އާންމުންނަށް ގޮވާލާފަ އެވެ.
ނިއު ޒިލެންޑުގައި 2025 ވަނަ އަހަރު ފެތުރުނު ހިމަބިހީގެ ރޯގާ ނިމުމަކަށް އައިސްފައިވީ ނަމަވެސް، އަލުން ބަލި ފެތުރުމުގެ ނުރައްކާ އެ ޤައުމަށް އޮތް ކަމަށް ނިއު ޒިލެންޑުގެ އިމިއުނައިޒޭޝަން އެޑްވައިޒަރީ ސެންޓަރުން ޖުލައި މަހު ވަނީ އިންޒާރުދީފަ އެވެ.
މަސްދަރު: އަނަދޮލު އޭޖެންސީ
