ނިއުޒީލެންޑުގައި 16 އަހަރުން ދަށުގެ ކުދިންނަށް ސޯޝަލް މީޑިއާ މަނާކުރާ ބިލު ޤާނޫނު ހަދާ މަޖިލީހަށް
24 އޯގަސްޓު 2026 | ހޯމަ 06:58މި ބިލުގައިވާ ގޮތުން، ސޯޝަލް މީޑިއާ ޕްލެޓްފޯމްތަކުން ކަނޑަ އެޅިފައިވާ އުމުރުފުރާގެ ކުދިންނަށް އެ ޚިދުމަތްތައް ބޭނުން ކުރުން ހުއްޓުވުމަށް ހަރުދަނާ ފިޔަވަޅުތަކެއް އަޅަން ޖެހޭނެ. އަދި މި ޤާނޫނާ ޚިލާފުވާ ކުންފުނިތަކާ މެދު ވަރަށް ހަރުކަށި ފިޔަވަޅުތަކެއް އެޅުމަށް ވެސް ބިލުގައި ވަނީ ހިމަނާފައި
ނިއުޒީލެންޑުގެ ބޮޑު ވަޒީރު ކްރިސްޓޮފަރ ލަކްސަން | ރޮއިޓާސް
ނިއުޒީލެންޑުގައި އުމުރުން 16 އަހަރުން ދަށުގެ ކުޑަކުދިން ސޯޝަލް މީޑިއާ ބޭނުން ކުރުން މަނާ ކުރުމަށްޓަކައި އެކުލަވާލާފައިވާ އައު ބިލެއް، އެ ޤައުމުގެ ޤާނޫނު ހަދާ މަޖިލީހަށް އަންނަ ހޯމަ ދުވަހު ހުށަހެޅުމަށް ސަރުކާރުން ނިންމައިފި އެވެ.
މި ބިލަކީ އެ ޤައުމުގެ ކޮންޒަވޭޓިވް ކޯލިޝަން ސަރުކާރުން އިސްނަގައިގެން، ކުޑަކުދިންގެ ނަފްސާނީ ދުޅަހެޔޮކަމާއި ރައްކާތެރިކަން ކަށަވަރު ކުރުމަށް ކުރިއަށްގެންދާ މުހިންމު މަސައްކަތެކެވެ.
މި ބިލުގައިވާ ގޮތުން، ސޯޝަލް މީޑިއާ ޕްލެޓްފޯމްތަކުން ކަނޑަ އެޅިފައިވާ އުމުރުފުރާގެ ކުދިންނަށް އެ ޚިދުމަތްތައް ބޭނުން ކުރުން ހުއްޓުވުމަށް ހަރުދަނާ ފިޔަވަޅުތަކެއް އަޅަން ޖެހޭނެ އެވެ. އަދި މި ޤާނޫނާ ޚިލާފުވާ ކުންފުނިތަކާ މެދު ވަރަށް ހަރުކަށި ފިޔަވަޅުތަކެއް އެޅުމަށް ވެސް ބިލުގައި ވަނީ ހިމަނާފައި އެވެ.
އެގޮތުން، ޤާނޫނަށް އަމަލު ނުކުރާ ސޯޝަލް މީޑިއާ ކުންފުނިތައް، އެ ކުންފުންޏެއްގެ ދުނިޔޭގެ ޖުމްލަ އާމްދަނީގެ 10 އިންސައްތައާ ހަމައަށް ޖޫރިމަނާ ކުރެވޭނެ ކަމަށް މި ބިލުގައި ބަޔާންކޮށްފައިވެ އެވެ.
ނިއުޒީލެންޑު ސަރުކާރުން މިފަދަ ފިޔަވަޅެއް އަޅަން ނިންމާފައި ވަނީ، ސޯޝަލް މީޑިއާގެ ސަބަބުން ކުޑަކުދިންނަށް ކުރިމަތިވާ ނޭދެވޭ އަސަރުތަކާ މެދު ބެލެނިވެރިންނާއި މުޖުތަމައުގެ ކަންބޮޑުވުންތައް އިތުރުވެފައިވާ ދަނޑިވަޅެއްގައި އެވެ. ޚާއްސަކޮށް ސޯޝަލް މީޑިއާގެ ސަބަބުން ކުދިންގެ ކިޔެވުމަށާއި ނަފްސާނީ ދުޅަހެޔޮކަމަށް ލިބޭ ގެއްލުންތައް ކުޑަ ކުރުމަކީ މި ބިލުގެ މައިގަނޑު އެއް މަޤުސަދެވެ.
މި ބިލު ހޯމަ ދުވަހު މަޖިލީހަށް ހުށަހެޅުމަށް ފަހު، މެންބަރުންގެ މެދުގައި ބަހުސްކޮށް، ކަމާ ބެހޭ ކޮމިޓީތަކުން ދިރާސާ ކުރުމުގެ މަސައްކަތް ކުރިއަށްދާނެ އެވެ. ނިއުޒީލެންޑަކީ މިފަދަ ހަރުކަށި ޤާނޫނެއް ފާސް ކުރުމަށް މަސައްކަތްކުރާ މަދު ޤައުމުތަކުގެ ތެރޭގައި ހިމެނޭ ޤައުމެކެވެ.
މީގެ ކުރިން އޮސްޓްރޭލިއާ ފަދަ ޤައުމުތަކުން ވެސް ވަނީ ކުޑަކުދިން ސޯޝަލް މީޑިއާ ބޭނުން ކުރުން ހަނި ކުރުމަށް މިފަދަ ޤާނޫނުތައް އެކުލަވާލުމުގެ މަސައްކަތް ފަށާފައި އެވެ.
މި ބިލު ޤާނޫނަކަށް ވެގެން އައުމުން، ޓިކްޓޮކް، އިންސްޓަގްރާމް އަދި ފޭސްބުކް ފަދަ ބޮޑެތި ޓެކްނޮލޮޖީ ކުންފުނިތަކުން ނިއުޒީލެންޑުގައި ޚިދުމަތް ދިނުމުގައި އައު އުސޫލުތަކަކަށް އަމަލު ކުރަން ޖެހޭނެ އެވެ. މީގެ އިތުރުން، ކުދިންގެ އުމުރު ކަށަވަރު ކުރުމަށްޓަކައި ޒަމާނީ ޓެކްނޮލޮޖީ ބޭނުން ކޮށްގެން ވަރުގަދަ ނިޒާމުތަކެއް ޤާއިމު ކުރުމަށް ވެސް ސޯޝަލް މީޑިއާ ޕްލެޓްފޯމްތަކަށް މަޖުބޫރުވާނެ އެވެ.
މަސްދަރު: އަލް ޖަޒީރާ
