ސިމްޑީ ރެސޫ އިން "އިލީ ގޯލްޑަން އަވަރ ސީރީޒް" ރާއްޖެއަށް ތައާރަފްކޮށްފި

ބައިނަލްއަގުވާމީ ކޮފީ ދުވަސް ފާހަގަކުރުމުގެ ގޮތުން ސިމްޑީ ގްރޫޕުގެ ސިމްޑީ ރެސޫ އިން "އިލީ ގޯލްޑަން އަވަރ ސީރީޒް" ރާއްޖެއަށް ތައާރަފްކޮށްފި އެވެ.

އޮކްޓޫބަރު މަހުގެ އެއް ވަނަ ދުވަހު ފާހަގަކުރި "އިލީ ޑޭ 2026" އާ ގުޅުވައިގެން މި އައި ސީރީޒް ތައާރަފްކޮށްފައި ވަނީ ޖެން މޯލްޑިވްސް މާލެ ބައި ސަންގްރިލާއާ ގުޅިގެން ބޭއްވި ހާއްސަ ހަފްލާއެއްގަ އެވެ. މި ހަފްލާގައި ހޮސްޕިޓާލިޓީ ދާއިރާގެ އިސް ބޭފުޅުންނާއި، ކެފޭ ރެސްޓޯރަންޓްތަކުގެ އިސްވެރިންނާއި، މީޑިއާގެ އިތުރުން ކޮފީއަށް ލޯބިކުރާ ގިނަ ބަޔަކު ބައިވެރިވެފައިވެ އެވެ.

މި އަހަރުގެ އިލީ ޑޭގެ އެންމެ ހާއްސަ ކަމަކީ އަލަށް ތައާރަފްކުރި "އިލީ ގޯލްޑަން އަވަރ ސީރީޒް" އެވެ. މި ސީރީޒްގައި ހިމެނެނީ އިލީ އައިސް ސްޕެނިޝް ލާޓޭ، އިލީ އޮރެންޖް ރަޝް ކޮފީ، އެޕަލް އޮފް މައި އައިސް ކޮފީ، އިލީ ޓްރޮޕިކަލް ޝޮޓް އަދި އިލީ ކެފޭ ނުއާ އެވެ. މި އައު ބުއިންތަކަކީ ކޮފީގެ ތަފާތު ރަހަތަކެއް ތަޖުރިބާކޮށްލުމަށް ހާއްސަކޮށްގެން ތައްޔާރުކޮށްފައިވާ ބުއިންތަކެކެވެ. މި ބުއިންތައް މިހާރު މާލޭގެ މަގުބޫލު ކެފޭތަކާއި ރެސްޓޯރަންޓްތަކުން ލިބެން ހުންނާނެ އެވެ. އޭގެ ތެރޭގައި ކޯޒޭ ކޮފީ ކްލަބް، ބްރޭކް ކެފޭ އެންޑް ބިސްޓްރޯ، ޝެލްބީންސް، ވައިޓް ކޯވް ރެސްޓޯރަންޓް، ޑެލިޒަސް، ޕާސްތާ މޭނިއާ، ސިޓްރަން ބައި ލެމަންގްރާސް، ސަބްމޯ ސެންޓްރަލް އަދި ޖެން މޯލްޑިވްސް ހިމެނެ އެވެ.

މި ހަފްލާގެ ތެރެއިން "އިލީ ގޯލްޑަން އަވަރ މާސްޓަރކްލާސް" ގެ ނަމުގައި ހާއްސަ ސެޝަނެއްވެސް ވަނީ ކުރިއަށް ގެންގޮސްފަ އެވެ. އިލީ ބްރޭންޑް އެމްބަސެޑަރު އަލީ ހުސައިން އާއި ސިމްޑީ ރެސޫގެ ބަރިސްޓާ ފަރގުސަން އެމްބާކާ ޑެސްމަންޑް ކުރިއަށް ގެންދިޔަ މި މާސްޓަރކްލާސްގައި، އައު ބުއިންތައް ތައްޔާރުކުރާނެ ގޮތާއި އެ ބުއިންތައް ކަސްޓަމަރުންނަށް ހުށަހަޅައިދޭނެ ގޮތުގެ މައުލޫމާތު ހޮސްޕިޓާލިޓީ ދާއިރާގެ ފަންނީ ބޭފުޅުންނަށް ވަނީ ހިއްސާކޮށްފަ އެވެ. މީގެ އިތުރުން، ހަފްލާގެ ބައިވެރިންނަށް އައު ބުއިންތަކުގެ ރަހަ ބަލާލުމަށްޓަކައި "ގޯލްޑަން އަވަރ ބާ" އެއްވެސް އެ ސަރަހައްދުގައި ހުޅުވާފައިވެ އެވެ.

މި ހަފްލާގައި އިލީގެ އުފެއްދުންތައް ދައްކާލުމަށްޓަކައި "އިލީ އެކްސްޕީރިއަންސް ޒޯން" އެއްވެސް ވަނީ ގާއިމުކޮށްފަ އެވެ. މި ޒޯންގައި އިލީ ކޮފީގެ އިތުރުން، ކޮފީ މެޝިންތަކާއި، ކީޕް ކަޕްސް، އިލީގެ ސިގްނޭޗާ ބިއްލޫރި ތަށި، އެސްޕްރެސޯ އަދި ކެޕަޗީނޯ ކަޕް ސެޓްތަކާއި، އަލެސީ މޯކާ ޕޮޓްސް އަދި އިލީ އާޓް ކަލެކްޝަންގެ އުފެއްދުންތައް ވަނީ ދައްކާލާފަ އެވެ. މީގެ ތެރެއިން ބައެއް އުފެއްދުންތައް ބައިވެރިންނަށް ގަންނަން ލިބޭނެ އިންތިޒާމް ވެސް ވަނީ ހަމަޖައްސާފަ އެވެ. މި ހަފްލާ ނިންމާލާފައި ވަނީ ޒޯލޯގެ ލައިވް މިއުޒިކާއެކު ބޭއްވުނު ނެޓްވޯކިންގް ސެޝަނަކުންނެވެ.

މީގެ އިތުރުން، އިލީ ޑޭ ފާހަގަކުރުމުގެ ގޮތުން މާލޭގެ ބައެއް ކެފޭތަކުގައި ހާއްސަ "ހެޕީ އަވަރ" އެއްވެސް ވަނީ ކުރިއަށް ގެންގޮސްފަ އެވެ. މެންދުރުފަހު 3:00 އިން ހަވީރު 6:00 އަށް ބްރޭކް ކެފޭ އެންޑް ބިސްޓްރޯ، ކޯޒޭ ކޮފީ ކްލަބް، ވައިޓް ކޯވް ރެސްޓޯރަންޓް އަދި ޝެލްބީންސްގައި ކުރިއަށްދިޔަ މި ހަރަކާތުގައި، ހާއްސަ ބުއިންތަކުން 20 އިންސައްތައިގެ ޑިސްކައުންޓެއް ވަނީ ދީފަ އެވެ. އަދި އެސްޕްރެސޯ، އެމެރިކާނޯ އަދި ކެޕަޗީނޯ ފަދަ ކްލާސިކް ބުއިންތައް ކަސްޓަމަރުންނަށް ހިލޭ ލިބޭނެ އިންތިޒާމް ވެސް ވަނީ ހަމަޖައްސާފަ އެވެ.

ސިމްޑީ ގްރޫޕުން ރާއްޖެއަށް އިލީ ކޮފީ ތައާރަފްކޮށްފައިވަނީ 1994 ވަނަ އަހަރު އެވެ. ފާއިތުވި 30 އަށްވުރެ ގިނަ އަހަރުތަކުގެ ތެރޭގައި ސިމްޑީ ރެސޫ އިން ވަނީ ކޮފީ ފޯރުކޮށްދިނުމުގެ އިތުރުން، ކޮފީ މެޝިންތަކާއި، ޓެކްނިކަލް ސަޕޯޓާއި، ބަރިސްޓާ ތަމްރީނުތަކުގެ އިތުރުން އައު ބުއިންތައް އުފެއްދުމުގެ ދާއިރާއިން ރާއްޖޭގެ ފަތުރުވެރިކަމާއި ހޮސްޕިޓާލިޓީ ދާއިރާއަށް ބޮޑެތި ކުރިއެރުންތަކެއް ހޯދައިދީފަ އެވެ. އިލީ އަކީ ދުނިޔޭގެ ފެންވަރުގައި މަގުބޫލު އިޓަލީގެ ކޮފީ ބްރޭންޑެކެވެ. ސިމްޑީ ރެސޫ އަކީ ސިމްޑީ ގްރޫޕުގެ ދަށުން ހޮސްޕިޓާލިޓީ ދާއިރާއަށް ބޭނުންވާ މަތީ ފެންވަރުގެ ބުއިންތަކާއި އުފެއްދުންތައް ފޯރުކޮށްދޭ މައިގަނޑު އެއް ބްރާންޗެވެ.