ސިމްޑީ އިން ރޯދަ މަހާއި ދިމާކޮށް "ކުރިފްރެޝް"ގެ ނަމުގައި މޭވާ އާއި ތަރުކާރީ ލިބޭ ފިހާރައެއް ހުޅުވައިފި

ސިމްޑީ ގްރޫޕުގެ ފަރާތުން ރާއްޖޭގައި އުފައްދާ ތާޒާ އަދި ފެންވަރު ރަނގަޅު ދަނޑުވެރިކަމުގެ ބާވަތްތައް އާންމު ގޭބިސީތަކަށާއި، ވިޔަފާރިތަކަށް އަދި ފަތުރުވެރިކަމުގެ ދާއިރާއަށް ފޯރުކޮށްދިނުމަށްޓަކައި "ކުރިފްރެޝް" ގެ ފުރަތަމަ އައުޓްލެޓް މާލޭގައި ހުޅުވައިފި އެވެ.

ކުރިއަށް އޮތް ރަމަޟާން މަހާ ދިމާކޮށް ހުޅުވި މި ފިހާރައިގެ ސަބަބުން ރާއްޖޭގައި ހައްދާ ތާޒާ އުފެއްދުންތައް ފަސޭހަކަމާއެކު ލިބޭނެ އިންތިޒާމު ހަމަޖެހޭނެ އެވެ.

މި ފިހާރަ ހުޅުވުމަށް ބޭއްވި ޚާއްސަ ރަސްމިއްޔާތެއްގައި މި އައުޓްލެޓް ރަސްމީކޮށް ހުޅުވައިދެއްވީ މިނިސްޓްރީ އޮފް އެގްރިކަލްޗަރ އެންޑް އެނިމަލް ވެލްފެއަރގެ ސްޓޭޓް މިނިސްޓަރު އިސްމާއިލް އަޒްމީ އަދުނާން އާއި އެ މިނިސްޓްރީގެ ޕާމަނަންޓް ސެކްރެޓަރީ މުޙައްމަދު އަނީސް އެވެ. މި އައުޓްލެޓް މެދުވެރިކޮށް އާންމު ކަސްޓަމަރުންގެ އިތުރުން ރިސޯޓުތަކާއި ހޮޓާތަކަށް ބޭނުންވާ ތަރުކާރީއާއި މޭވާ ހޯލްސޭލް އަދި ރީޓެއިލްކޮށް ލިބޭނެ އެވެ.

ކުރިފްރެޝް ބްރޭންޑަކީ ބޭރު ގައުމުތަކުން ލިބޭ ފަދަ މަތީ ފެންވަރުގެ އުފެއްދުންތައް ރާއްޖޭގައި އުފައްދައި ބާޒާރަށް ނެރުމުގެ މަގުސަދުގައި ތައާރަފުކުރި ބްރޭންޑެކެވެ. މިއީ ސިމްޑީ ގްރޫޕުގެ ޗެއާމަން އިބްރާހިމް މުޙައްމަދު ދީދީ އާއި ސީއީއޯ ޑރ. މަރިޔަމް ޝަކީލާގެ ދުރުވިސްނުމުގެ ދަށުން، ރާއްޖޭގެ އުފެއްދުންތެރިކަން އިތުރުކޮށް، ޒަމާނީ ޓެކްނޮލޮޖީ ބޭނުންކޮށްގެން ދިވެހި އުފެއްދުންތަކަށް އޮންނަ އިތުބާރު ބޮޑުކުރުމަށް ފެށި މަސައްކަތެކެވެ.

މި އައުޓްލެޓުން ވިއްކާ ހުރިހާ ބާވަތްތަކަކީ ށ. އަތޮޅު އެކަސްދޫގައި ސިމްޑީ ގްރޫޕުން ތަރައްގީކޮށްފައިވާ ދަނޑުތަކުން އުފައްދާ ތަކެއްޗެވެ. ގިނަ އަހަރުތަކެއް ވަންދެން އެ ރަށުގައި ކުރި މަސައްކަތުން މިހާރު ވަނީ ތާޒާކަމާއި، ދެމެހެއްޓެނިވި ގޮތެއްގައި ތަކެތި އުފެއްދުމާއި، ކާބޯތަކެތީގެ ރައްކާތެރިކަމުގެ މިންގަނޑުތައް އެންމެ މަތީ ދަރަޖައަށް ފުރިހަމަކޮށްފަ އެވެ. އެކަސްދޫގައި މި ތަކެތި ހައްދަނީ ގްރީންހައުސްތަކާއި ހައިޑްރޯޕޮނިކްސް ފަދަ ޒަމާނީ ވަސީލަތްތައް ބޭނުންކޮށްގެންނެވެ.

މިކަމާ ގުޅޭގޮތުން ސިމްޑީ ގްރޫޕުގެ މެނޭޖިންގ ޑައިރެކްޓަރު މިޝާލް އިބްރާހިމް މުޙައްމަދު ދީދީ އާއި ޖެނެރަލް މެނޭޖަރު ޔޫޝައު ސައީދު ވިދާޅުވީ، މިއީ ސިމްޑީން ރާއްޖެއަށް ތައާރަފުކޮށްފައިވާ 200 އަށްވުރެ ގިނަ ބްރޭންޑާއި 15،000 އަށްވުރެ ގިނަ އުފެއްދުންތަކުގެ ތެރެއަށް އިތުރުވި މުހިންމު ކުރިއެރުމެއް ކަމަށާއި، ކުރިމަގުގައި ރާއްޖޭގެ އެކި ސަރަހައްދުތަކުގައި ކުރިފްރެޝްގެ އިތުރު އައުޓްލެޓްތައް ހުޅުވާނެ ކަމަށްވެސް އެ ބޭފުޅުން ވިދާޅުވި އެވެ.

މި ރަސްމިއްޔާތުގައި ވާހަކަދައްކަވަމުން ސްޓޭޓް މިނިސްޓަރު އިސްމާއިލް އަޒްމީ އަދުނާން ވަނީ ސިމްޑީ ގްރޫޕުން އިސްނަގައިގެން ފެށި މި މަސައްކަތަށް ތައުރީފު ކުރައްވާފަ އެވެ. އޭނާ ވިދާޅުވީ މިފަދަ މަސައްކަތްތަކުގެ ސަބަބުން ރާއްޖޭގެ ކާބޯތަކެތީގެ ރައްކާތެރިކަން ކަށަވަރުކުރުމަށާއި ދަނޑުވެރިކަން ކުރިއެރުވުމަށް ސަރުކާރުން ކުރާ މަސައްކަތްތަކަށް ބޮޑު އެހީތެރިކަމެއް ލިބިގެންދާނެ ކަމަށެވެ.