ބައިނަލްއަގުވާމީ ކޮފީ ދުވަހާ ގުޅުވައިގެން ސިމްޑީ ރެސޫ އިން "އިލީ ޑޭ 2026" ބާއްވަނީ

ބައިނަލްއަގުވާމީ ކޮފީ ދުވަސް ކުލަގަދަކޮށް ފާހަގަކުރުމުގެ ގޮތުން، ރާއްޖޭގައި އިޓަލީގެ މަޝްހޫރު ކޮފީ ބްރޭންޑް "އިލީ" ވިއްކާ ހަމައެކަނި އެޖެންޓް ކަމަށްވާ ސިމްޑީ ރެސޫ އިން ޖެން މޯލްޑިވްސް މާލެ ބައި ސެންގްރިލާއާ ގުޅިގެން "އިލީ ޑޭ 2026" ބޭއްވުމަށް ނިންމައިފި އެވެ.

މި ހާއްސަ ހަރަކާތް ބޭއްވުމަށް ހަމަޖެހިފައިވަނީ 2026 އޮކްޓޫބަރު 1  ވާ ބުރާސްފަތި ދުވަހުގެ ހަވީރު 4:00 އިން 6:00 އަށް ޖެން މޯލްޑިވްސްގަ އެވެ. މި ހަފްލާގައި ފަތުރުވެރިކަމުގެ ދާއިރާގެ އިސް ބޭފުޅުންނާއި، ސިނާއީ އެކި މަންދޫބުންނާއި، ޕާޓްނަރުންގެ އިތުރުން ސޯޝަލް މީޑިއާ އިންފްލުއެންސަރުންނާއި ކޮފީއަށް ލޯބިކުރާ ގިނަ ފަރާތްތަކަކުން ބައިވެރިވާނެ އެވެ. މި އަހަރުގެ ހަރަކާތުގެ އެންމެ ހާއްސަ ކަމަކީ އިރުއޮއްސޭ ވަގުތުގެ ހިތްގައިމުކަމާ ގުޅުވައިގެން ކޮފީގެ ފުރިހަމަ ރަހަ ލިބޭނޭހެން ތައްޔާރުކޮށްފައިވާ "އިލީ ގޯލްޑަން އަވަރ ސީރީޒް" ރަސްމީކޮށް އިފްތިތާހު ކުރުމެވެ. މި ހަފްލާގެ ތެރެއިން މެހެމާނުންނަށް މި އައު ބުއިންތައް ތަޖުރިބާކޮށްލުމުގެ ފުރުސަތު ލިބިގެންދާނެ އެވެ.

ކޮފީއާއި އުފެއްދުންތެރިކަމުގެ އިތުރުން އަމަލީ ތަޖުރިބާ ހިމެނޭ ގޮތަށް ކުރިއަށްދާ މި ހަރަކާތުގައި "އިލީ މާސްޓަރކްލާސް"ގެ ނަމުގައި ހާއްސަ ސެޝަނެއް ކުރިއަށް ގެންދިއުމަށް ވަނީ ހަމަޖެހިފަ އެވެ. މި ސެޝަންގައި އިލީގެ ހާއްސަ ބުއިންތައް ތައްޔާރުކުރާނެ ގޮތްތަކާއި، އެ ތަކެތި ސަރވްކުރުމުގައި ގެންގުޅޭނެ އެންމެ ފުރިހަމަ އުސޫލުތައް ބައިވެރިންނަށް ދަސްކޮށްދެވޭނެ އެވެ. މީގެ އިތުރުން، ކޮފީ ބޭނުންކޮށްގެން އައު ވައްތަރުގެ ބުއިންތައް އުފެއްދިދާނެ ގޮތްތަކުގެ މައުލޫމާތު ހިއްސާކުރުމާއި، މެހެމާނުންނަށް އަމިއްލައަށް ބުއިންތައް ތައްޔާރުކޮށްލުމުގެ ފުރުސަތު ދިނުމުގެ ގޮތުން "އިލީ ޑީއައިވައި ޑްރިންކްސް ސްޓޭޝަން" އެއް ވެސް ގާއިމުކުރެވިގެންދާނެ އެވެ. މި ހަރަކާތްތަކުގެ މައިގަނޑު މަގުސަދަކީ ފަތުރުވެރިކަމުގެ ދާއިރާގައި ހަރަކާތްތެރިވާ ފަރާތްތަކަށާއި އާންމުންނަށް ކޮފީ ތައްޔާރުކުރުމުގެ ފަންނުވެރިކަން ތަޖުރިބާކޮށްލުމުގެ އައު ފުރުސަތުތަކެއް ފަހިކޮށްދިނުމެވެ.

"އިލީ ގޯލްޑަން އަވަރ ސީރީޒް" ރަސްމީކޮށް އިފްތިތާހު ކުރުމަށްފަހު، ރާއްޖޭގެ މަގުބޫލު ކެފޭތަކާއި ރެސްޓޯރަންޓްތަކުން މި ބުއިންތައް އާންމުންނަށް ލިބެން ހުންނާނެ އެވެ. އެގޮތުން ކޯޒޭ ކޮފީ ކްލަބް، ބްރޭކް ކެފޭ އެންޑް ބިސްޓްރޯ، ޝެލްބީންސް، ވައިޓް ކޯވް ރެސްޓޯރަންޓް، ޑެލިޒަސް، ޕާސްޓާ މޭނިއާ، ސިޓްރޯން ބައި ލެމަންގްރާސް، ސަބްމޯ ސެންޓްރަލް އަދި ޖެން މޯލްޑިވްސް އިން މި ބުއިންތައް ލިބެން ހުންނާނެ ކަމަށް ސިމްޑީ ރެސޫ އިން މައުލޫމާތުދެ އެވެ.

މީގެ އިތުރުން، "އިލީ ޑޭ 2026" ގެ ހަރަކާތްތަކުގެ ތެރެއިން ހޮވާލެވޭ ބައެއް ކެފޭތަކުގައި 2026 އޮކްޓޫބަރު 1 ވަނަ ދުވަހުގެ މެންދުރުފަހު 3:00 އިން ހަވީރު 6:00 އަށް ހާއްސަ "ހެޕީ އަވަރ" އެއް ކުރިއަށް ގެންދިއުމަށް ވަނީ ހަމަޖެހިފަ އެވެ. މި ވަގުތުތަކުގައި ކަނޑައެޅިފައިވާ ހާއްސަ ބުއިންތަކުން 20 އިންސައްތައިގެ ޑިސްކައުންޓެއް ލިބޭނެ އެވެ. އަދި އެސްޕްރެސޯ، އެމެރިކާނޯ އަދި ކަޕަޗީނޯ ފަދަ އާންމު ކޮފީގެ ބުއިންތައް ކަސްޓަމަރުންނަށް މުޅިން ހިލޭ ބޯލުމުގެ ފުރުސަތު ވެސް ލިބިގެންދާނެ އެވެ. މި ހާއްސަ "ހެޕީ އަވަރ" ޕްރޮމޯޝަން ކުރިއަށްދާނީ ބްރޭކް ކެފޭ އެންޑް ބިސްޓްރޯ، ކޯޒޭ ކޮފީ ކްލަބް، ވައިޓް ކޯވް ރެސްޓޯރަންޓް އަދި ޝެލްބީންސްގަ އެވެ.

ކޮފީއަށް ލޯބިކުރާ ހުރިހާ ފަރާތްތަކަށް ސިމްޑީ ރެސޫ އިން ދައުވަތު ދެނީ އޮކްޓޫބަރު 1 ވަނަ ދުވަހު ޖެން މޯލްޑިވްސްގައި ބާއްވާ މި ހާއްސަ ހަފްލާގައި ބައިވެރިވެ، އަލަށް ތައާރަފުކުރާ "އިލީ ގޯލްޑަން އަވާ ސީރީޒް" ގެ ރަހަތައް ތަޖުރިބާކޮށްލުމަށެވެ. މައި ހަފްލާގެ އިތުރުން، ބައިވެރިވާ ކެފޭތަކުން ވެސް މި އައު ބުއިންތަކާއި ހެޕީ އަވަރގެ ފުރުސަތުތައް ލިބިގެންދާނެ އެވެ. މި ހަރަކާތްތަކުގެ މައިގަނޑު އަމާޒަކީ ރާއްޖޭގެ ކޮފީ ސަގާފަތް އިތުރަށް ކުރިއަރުވައި، ކަސްޓަމަރުންނަށާއި ވިޔަފާރިވެރިންނަށް ކޮފީގެ އެންމެ މަތީ ފެންވަރުގެ އައު ތަޖުރިބާތަކެއް ފޯރުކޮށްދިނުމެވެ.

ރާއްޖޭގައި ސިމްޑީ ގްރޫޕުން އެކްސްކްލޫސިވްކޮށް ޑިސްޓްރިބިއުޓްކުރާ "އިލީ" އަކީ ދުނިޔޭގެ މަގުބޫލުކަން ހޯދާފައިވާ، އޭގެ މޮޅު ރަހައާއި ފެންވަރުގެ ސަބަބުން މަޝްހޫރު އިޓަލީގެ ބްރޭންޑެކެވެ. އަދި ސިމްޑީ ގްރޫޕްގެ މުހިންމު ގޮފި ކަމަށްވާ ސިމްޑީ ރެސޫ އަކީ ރާއްޖޭގެ ފަތުރުވެރިކަމުގެ ސިނާއަތަށް ބޭނުންވާ މަތީ ފެންވަރުގެ ބުއިންތަކާއި އުފެއްދުންތައް ފޯރުކޮށްދިނުމުގައި ފާހަގަކޮށްލެވޭ، ރިސޯޓްތަކާއި ކެފޭތަކާ އެކު ގާތުން މަސައްކަތްކުރަމުން އަންނަ ކުންފުންޏެކެވެ.