ސިމްޑީ ގުރޫޕް އާއި ކެއަރ ސޮސައިޓީ ގުޅިގެން ކުރިއަށްގެންދާ އިންޓަރންޝިޕް ޕްރޮގްރާމު ހަތަރު ވަނަ އަހަރަށް!

ސިމްޑީ ގްރޫޕާއި ކެއަރ ސޮސައިޓީ މޯލްޑިވްސް ގުޅިގެން ކުރިއަށްގެންދާ ސީއެސްއާރު އިންޓަރންޝިޕް ޕްރޮގްރާމް، ޖެހިޖެހިގެން ހަތަރުވަނަ އަހަރަށް ކުރިއަށް ގެންދިއުމަށް ނިންމައި އެކަން އިއުލާނުކޮށްފި އެވެ.

މި ޕްރޮގްރާމަކީ މުޖުތަމައުގައި ހިމެނޭ ނުކުޅެދުންތެރިކަން ހުންނަ ފަރާތްތައް ބާރުވެރިކުރުވުމަށާއި އެ ފަރާތްތަކަށް ވަޒީފާގެ މާހައުލުގައި ހަމަހަމަ ފުރުސަތުތަކެއް ހޯދައިދިނުމަށް ސިމްޑީ ގްރޫޕުން ކުރަމުންދާ މަސައްކަތުގެ ދަށުން ކުރިއަށްގެންދާ މުހިންމު ހަރަކާތެކެވެ.

މި އަހަރުގެ އިންޓަރންޝިޕް ޕްރޮގްރާމްގެ ދަށުން، ކެއަރ ޑިވެލޮޕްމަންޓް ސެންޓަރުގެ "ރެޑިނަސް ފޯ އެމްޕްލޯއިމަންޓް" ޕްރޮގްރާމްގައި ކިޔަވަމުންދާ ދަރިވަރެއް ކަމަށްވާ ފާތިމަތު ޔަދުޔާ ރަޝީދަށް ވަނީ ސިމްޑީ ގްރޫޕްގެ މުހިންމު އެއް ޑިވިޝަން ކަމަށްވާ ސިމްޑީ ސީޕީޑީގައި އިންޓަރންޝިޕް ފުރިހަމަކުރުމުގެ ފުރުސަތު ދީފަ އެވެ. މި ފުރުސަތުގެ ދަށުން އޭނާއަށް ރީޓެއިލް ވިޔަފާރީގެ މާހައުލެއްގައި އަމަލީ ތަޖުރިބާ ހޯދުމުގެ މަގު ފަހިވެގެންދާނެ އެވެ.

މި އިސްނެގުމުގެ މައިގަނޑު މަގްސަދަކީ ދަރިވަރުންނަށް މަސައްކަތުގެ އަމަލީ މާހައުލުގައި ބޭނުންވާ ހުނަރުތައް ދަސްކޮށްދީ، އެކުދިންގެ އަމިއްލަ ނަފްސަށް އޮންނަ އިތުބާރު ބޮޑުކުރުމެވެ. އިންޓަރންޝިޕްގެ މުއްދަތުގައި ދަރިވަރުންނަށް ބޭނުންވާ އިރުޝާދާއި އެހީތެރިކަން ސިމްޑީގެ ތަޖުރިބާކާރު މުވައްޒަފުންގެ ފަރާތުން ލިބިގެންދާނެ ކަމަށް އެ ކުންފުނިން ބުނެ އެވެ.

ސިމްޑީ ގްރޫޕާއި ކެއަރ ސޮސައިޓީއާ ދެމެދު އޮތް މި ގުޅުމަކީ މީގެ ހަތަރު އަހަރު ކުރިން ފެށުނު ގުޅުމެކެވެ. މި މުއްދަތުގެ ތެރޭގައި ގިނަ ދަރިވަރުންތަކަކަށް ވަނީ ސިމްޑީ ގްރޫޕްގެ އެކި ދާއިރާތަކުން މަސައްކަތުގެ ތަޖުރިބާ ހޯދައި، ވަޒީފާގެ ބާޒާރަށް ނުކުތުމަށް ބޭނުންވާ ތަމްރީނުތައް ފޯރުކޮށްދީފަ އެވެ. މިއީ މުޖުތަމައު ބާރުވެރިކުރުވުމަށް ސިމްޑީން ގެންގުޅޭ ހަރުދަނާ ސިޔާސަތުގެ ދަށުން ކުރިއަށްގެންދާ މަސައްކަތެކެވެ.

ސިމްޑީ ގްރޫޕަކީ 2000 ވަނަ އަހަރު އުފެދުނު، ރާއްޖޭގެ ވިޔަފާރީގެ ދާއިރާގައި ފާހަގަކޮށްލެވޭ ބޮޑު ކުންފުންޏެކެވެ. އެ ކުންފުނިން އަންނަނީ ކޮންސިއުމަރ ޕްރޮޑަކްޓްސް، ބެވަރޭޖަސް، ހޮސްޕިޓާލިޓީ، ޓެކްނޮލޮޖީ އަދި ސަރވިސަސް ފަދަ ތަފާތު ދާއިރާތަކުން ޚިދުމަތް ފޯރުކޮށްދެމުންނެވެ.

ހަމައެއާއެކު، ކެއަރ ސޮސައިޓީ މޯލްޑިވްސްއަކީ 1998 ވަނަ އަހަރުން ފެށިގެން ނުކުޅެދުންތެރިކަން ހުންނަ ފަރާތްތަކުގެ ހައްގުތަކަށް ވަކާލާތުކޮށް، އެ ފަރާތްތަކަށް ބޭނުންވާ ތައުލީމާއި ތަމްރީނު ފޯރުކޮށްދެމުން އަންނަ މަދަނީ ޖަމިއްޔާއެކެވެ.

މި ޕްރޮގްރާމާ ގުޅޭ އިތުރު މައުލޫމާތު ހޯދުމަށް ސިމްޑީ ގްރޫޕްގެ ސީނިއާ މެނޭޖަރު ޕަބްލިކް ރިލޭޝަންސް އެންޑް މާކެޓިން އިބްރާހީމް ހަމީޝްއާ 3340211 ގުޅައިގެން ނުވަތަ hameesh@simdi.com އަށް އީމެއިލް ކުރުމުން ލިބޭނެކަމަށް ސިމްޑީ ގްރޫޕުން ބުނެ އެވެ.