ރިޕް ކަރލްގެ އައު ފިހާރައެއް ކ. މާފުށީގައި ހުޅުވައިފި

ރިޕް ކަރލް މޯލްޑިވްސްގެ އައު ފިހާރައެއް ކ. މާފުށީގައި ހުޅުވައި، ހާއްސަ ޕްރޮމޯޝަނެއް ފަށައިފި އެވެ.

ދުނިޔޭގެ މަޝްހޫރު ސާފް އަދި ލައިފްސްޓައިލް ބްރޭންޑެއް ކަމަށްވާ ރިޕް ކަރލްގެ އުފެއްދުންތައް ރާއްޖޭގެ އެކި ސަރަހައްދުތަކަށް ފުޅާކުރުމުގެ މަގްސަދުގައި ހުޅުވި މި ފިހާރައާއެކު، އެ ރަށުގެ ރައްޔިތުންނަށާއި މޫދުގެ ކުޅިވަރުތަކަށް ލޯބިކުރާ ފަރާތްތަކުގެ އިތުރުން ޒިޔާރަތްކުރާ ފަތުރުވެރިންނަށް މި ބްރޭންޑްގެ އުފެއްދުންތައް ފަސޭހައިން ލިބިގެންދާނެ އެވެ. ސިމްޑީ ގްރޫޕުން ހިންގާ މި ފިހާރައިން ފިރިހެނުންނާއި، އަންހެނުން އަދި ކުޑަކުދިންނަށް ހާއްސަ ސާފް ވެއަރ، ސްވިމް ވެއަރ، ބީޗް ވެއަރ އަދި ކެޝުއަލް ލައިފްސްޓައިލް ކަލެކްޝަންތަކުގެ އަސްލު އުފެއްދުންތައް ލިބެން ހުންނާނެ އެވެ.

މާފުށީގައި ހުޅުވި މި އައުޓްލެޓަކީ ކްރޮސްރޯޑްސް މޯލްޑިވްސް، ނިޔާމަ ޕްރައިވެޓް އައިލެންޑްސް، އަދާރަން ސެލެކްޓް ހުދުރަންފުށި އަދި ހުޅުމާލޭގައި ހުންނަ ރިޕް ކަރލްގެ ފިހާރަތަކަށް އިތުރުވި އައު ބޮޅެކެވެ.

މި ފިހާރަ ހުޅުވުމުގެ އުފަލުގައި ފެށި ހާއްސަ ޕްރޮމޯޝަނުގެ ދަށުން 27 ސެޕްޓެމްބަރުން ފެށިގެން 11 އޮކްޓޯބަރު 2024 ގެ ނިޔަލަށް، ފިހާރައިގެ ހުރިހާ މުދަލަކުން 40 އިންސައްތައާ ހަމައަށް ޑިސްކައުންޓް ލިބޭނެ އެވެ.

ރިޕް ކަރލް މާފުށީ ފިހާރަ ރަސްމީކޮށް ހުޅުވައިދެއްވީ ސިމްޑީ ގްރޫޕްގެ ޗެއާމަން އިބްރާހީމް މުހައްމަދު ދީދީ އާއި އެ ގްރޫޕްގެ ސީއީއޯ ޑރ. މަރިޔަމް ޝަކީލާގެ އިތުރުން ރިޕް ކަރލްގެ ފަރާތުން ބައިވެރިވެވަޑައިގެންނެވި މިސްޓަރ އެޑްވިން ސްޓީވަންސް އެވެ. މި ރަސްމިއްޔާތުގައި މެހެމާނުންނާއި މާފުށީގެ ގިނަ އަދަދެއްގެ ރައްޔިތުން ބައިވެރިވެފައިވާއިރު، މިއީ ރާއްޖޭގައި ރިޕް ކަރލް ބްރޭންޑް ފުޅާވަމުންދާކަން ރަމްޒުކޮށްދޭ މުހިންމު ކުރިއެރުމެކެވެ.

ފިހާރަ ހުޅުވުމުގެ ރަސްމިއްޔާތުގައި ވާހަކަދައްކަވަމުން ސިމްޑީ ގްރޫޕްގެ ސީއީއޯ ޑރ. މަރިޔަމް ޝަކީލާ ވަނީ، މާފުއްޓަކީ ފަތުރުވެރިކަމާއި މޫދާ ވަރަށް ބޮޑަށް ގުޅިފައިވާ ރަށަކަށް ވުމުން، އެ ރަށުގައި ރިޕް ކަރލްގެ ފިހާރައެއް ހުޅުވުމުގެ މުހިންމުކަމުގެ މައްޗަށް އަލިއަޅުއްވާލައްވާފަ އެވެ.

ކްރޮސްރޯޑްސް މޯލްޑިވްސް، އަދާރަން ސެލެކްޓް ހުދުރަންފުށި، ނިޔާމަ ޕްރައިވެޓް އައިލެންޑްސް އަދި ހުޅުމާލެ ފަދަ މުހިންމު މަންޒިލްތަކުގައި ރިޕް ކަރލްގެ އައުޓްލެޓްތައް މިހާރުވެސް ދަނީ ހިންގަމުން. މާފުއްޓަށް މި ބްރޭންޑް ތައާރަފްކުރެވުމަކީ އަޅުގަނޑުމެންނަށް ލިބޭ ވަރަށް ބޮޑު އުފަލެއް. ފަތުރުވެރިކަން ކުރިއަރާފައިވާ، މޫދާ ގާތް ގުޅުމެއް އޮންނަ މާފުއްޓަކީ ރިޕް ކަރލްއަށް ވަރަށް އެކަށީގެންވާ ތަނެއް. އަޅުގަނޑުމެން ގަބޫލުކުރާ ގޮތުގައި މި ފިހާރަ ވެގެންދާނީ އަޅުގަނޑުމެންގެ އެންމެ ކާމިޔާބު އެއް އައުޓްލެޓަށް. އަދި ކުރިމަގުގައި ވެސް މާކެޓް އޮތް އެހެން ސަރަހައްދުތަކަށް ރިޕްކަރލް ގެންދިއުމުގެ ފުރުސަތުތައް ހޯދަމުންދާނަން

ޑރ. މަރިޔަމް ޝަކީލާ

މާފުށީގައި ހުޅުވި މި ފިހާރަ ފަރުމާކޮށްފައިވަނީ ރިޕް ކަރލްގެ އަމިއްލަވަންތަ ކޯސްޓަލް އައިޑެންޓިޓީ އާއި ރާއްޖޭގެ ރަށްތަކުގެ ހިތްފަސޭހަ މާހައުލާ ގުޅޭގޮތަށެވެ.