ވޯލްޑް ކަޕަށް ފަހު އާޖެންޓީނާ އިން ކުޅުނު ފުރަތަމަ މެޗުގައި ބޮލީވިއާ ބަލިކޮށްފި
1 އޮކްޓޯބަރު 2026 | ބުރާސްފަތި 06:02މިއީ އާޖެންޓީނާ އިން މިއަހަރު އޮތް ފީފާ ވޯލްޑް ކަޕްގެ ފައިނަލްގައި ސްޕެއިން އަތުން ބަލިވީ ފަހުން ކުޅުނު ފުރަތަމަ މެޗު
މެެޗުގައި ލަނޑު ޖެހުމަށް ފަހު އާޖެންޓީނާގެ ކުޅުންތެރިން އުފާާ ފާޅު ކުރަނީ | ރޮއިޓާސް
ބައިނަލްއަޤުވާމީ ރަހުމަތްތެރިކަމުގައި ބޮލީވިއާއާ ދެކޮޅަށް ކުޅުނު މެޗުން އާޖެންޓީނާ މޮޅުވެއްޖެ އެވެ.
ބުރާސްފަތި ދުވަހުގެ ފަތިހު ބޮލީވިއާއާ ދެކޮޅަށް ކުޅުނު މެޗު އާޖެންޓީނާ އިން ކާމިޔާބު ކުރީ 4-0 އިންނެވެ. މެޗުގެ ފުރަތަމަ ހާފުގައި އާޖެންޓީނާ އިން ދެ ލަނޑު ޖެހިއިރު، އަނެއް ދެ ލަނޑު އެ ޓީމުން ޖެހީ ދެ ވަނަ ހާފުގަ އެވެ.
މެޗު ފަށައިގެން 19 ވަނަ މިނެޓުގައި އާޖެންޓީނާ އަށް ލީޑު ނަގައިދިނީ ލައުޓާރޯ މާޓިނޭޒް އެވެ. އެއީ އެލެކްސިސް މެކަލިސްޓާ ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. އޭގެ 10 މިނެޓު ފަހުން އާޖެންޓީނާގެ ދެ ވަނަ ލަނޑު ޖަހައި ލީޑު ފުޅާ ކޮށްދިނީ ނިކޯ ޕާޒް އެވެ.
މެޗުގެ ދެ ވަނަ ހާފު ފަށައިގެން އަށް ވަނަ މިނެޓުގައި އާޖެންޓީނާގެ ދެ ވަނަ ލަނޑު ޖެހީ ކްރިސްޓިއަން ރޮމޭރޯ އެވެ. އެ ލަނޑު ޖަހަން ރޮމޭރޯ އަށް ފުރުސަތު ތަނަވަސްކޮށްދިނީ ޕާޒް އެވެ. އޭގެ ފަހުން މެޗުގެ ފުރިހަމަ ވަގުތު ހަމަވާން ތިން މިނެޓަށް ވެފައި ވަނިކޮށް އާޖެންޓީނާގެ ފަހު ލަނޑު ޖެހީ ފްލަކޯ ލޮޕޭޒް އެވެ.
މިއީ އާޖެންޓީނާ އިން މިއަހަރު އޮތް ފީފާ ވޯލްޑް ކަޕްގެ ފައިނަލްގައި ސްޕެއިން އަތުން ބަލިވީ ފަހުން ކުޅުނު ފުރަތަމަ މެޗެވެ. ފީފާ ބްރޭކުގައި އާޖެންޓީނާގެ ދެ ވަނަ މެޗުގައި ނިކުންނާނީ ބްރުކީނާ ފާސޯއާ ދެކޮޅަށެވެ. އަދި ފަހު މެޗުގައި ނިކުންނާނީ ބެނިންއާ ދެކޮޅަށެވެ.
