މަރަޑޯނާގެ މަރުގެ ޝަރީއަތް: ކިޑްނީ ފެއިލްވަމުންދިޔަކަމުގެ ނިޝާންތަކަށް ޑޮކްޓަރުން ވަނީ އިހުމާލުވެފައި

އާޖެންޓީނާގެ ފުޓްބޯޅަ ލެޖެންޑް ޑިއޭގޯ މަރަޑޯނާގެ ކިޑްނީ ފެއިލްވަމުންދިޔަ ދިއުމަކީ، އޭނާއަށް ފަރުވާދިން ޑޮކްޓަރުންނަށް ލިބެންޖެހޭނެ ވަރުގަދަ އިންޒާރެއް ކަމަށް، އޭނާގެ މަރުގެ މައްސަލައިގެ ޝަރީއަތުގައި ކިޑްނީގެ ބަލިތަކާ ބެހޭ ޚާއްސަ ޑޮކްޓަރަކު ހެކިބަސް ދީފި އެވެ.

ސިކުނޑީގައި އުފެދުނު ގަނޑު ލޭކޮޅެއް ނެގުމަށް ކުރި ސާޖަރީއަށްފަހު ފަރުވާ ހޯދަމުން ދަނިކޮށް، އުމުރުން 60 އަހަރުގައި މަރަޑޯނާ މަރުވިއިރު، އޭނާ "ކްރޮނިކް ކިޑްނީ ޑިޒީޒް" ނުވަތަ ކިޑްނީގެ ދާއިމީ ބައްޔަށް އައީ ފަރުވާ ހޯދަމުންނެވެ. އާޖެންޓީނާގެ ބުއެނޯސް އައިރިސް ކައިރީގައި ހުންނަ ކޯޓެއްގައި އަންގާރަ ދުވަހު ހެކިބަސް ދެމުން، ނެފްރޮލޮޖިސްޓް ހެރްނާން ޓްރިމާޗީ މިހެން ބުނީ، މަރަޑޯނާގެ މެޑިކަލް ޓީމުގެ އިހުމާލުން މީހަކު މަރުވިކަމުގެ ދައުވާގެ ޝަރީއަތުގަ އެވެ.

1986 ވަނަ އަހަރުގެ ވޯލްޑް ކަޕްގެ ތަރި މަރަޑޯނާ މަރުވީ 2020 ވަނަ އަހަރުގެ ނޮވެމްބަރު މަހުގެ 25 ވަނަ ދުވަހު އެވެ. އޭނާ މަރުވީ ބުއެނޯސް އައިރިސްގެ ސަރަހައްދެއް ކަމަށްވާ ޓީގްރޭގައި ކުއްޔަށް ހިފާފައި ހުރި ގެއެއްގައި ހުއްޓާ، ހިތް ހުއްޓިގެންނާއި ފުއްޕާމޭގައި ފެން ހެދުމުގެ ސަބަބުންނެވެ.

މި މައްސަލައިގައި މަރަޑޯނާގެ އަމިއްލަ ފިޒީޝަނާއި، ސައިކިއޭޓްރިސްޓާއި، ނަރުހުން ހިމެނޭހެން ސިއްހީ ދާއިރާގެ ހަތް މުވައްޒަފެއްގެ މައްޗަށް ވަނީ، އެކަށީގެންވާ ފަރުވާ ދީފައި ނުވާކަމުގެ ތުހުމަތު ކޮށްފަ އެވެ.

މީގެ އިތުރުން، މެޑިކަލް ފެސިލިޓީއެއްގެ ބަދަލުގައި އަމިއްލަ ގޭގައި ބާއްވައިގެން ފަރުވާ ދިނުމަށް އެ ފަރާތްތަކުން ނިންމި ނިންމުމުގެ ސަބަބުން މަރަޑޯނާގެ ފުރާނައަށް ނުރައްކާވިތޯ ވެސް މި ޝަރީއަތުގައި ދަނީ ބަލަމުންނެވެ.

ޑޮކްޓަރު ޓްރިމާޗީ ބުނި ގޮތުގައި، މަރަޑޯނާގެ ކިޑްނީ އޮތީ ދުޅަވެ ބަރުވެފަ އެވެ. އަދި ކުރިން އޭނާ ބޭނުންކުރި މަސްތުވާތަކެއްޗާއި (ކޮކެއިން)، ފަލަވުމުގެ މައްސަލައާއި، ލޭމައްޗަށް ދިއުމުގެ މައްސަލަތަކާ ގުޅިގެން ކިޑްނީއަށް ގެއްލުންތަކެއް ލިބިފައިވާކަން ފާހަގަކުރެވޭ ކަމަށް އޭނާ ބުންޏެވެ.

އޭނާ އިތުރަށް ބުނި ގޮތުގައި، އެންމެ ކުޑަމިނުން ވެސް މަރަޑޯނާގެ ހާލަތު ކޮންމެ ދުވަހަކު ޑޮކްޓަރުންނާއި ނަރުހުން ބަލަންޖެހޭނެ އެވެ. އަދި ކޮންމެ ދުވަހަކު ލޭގެ ޓެސްޓުތައް ހަދައި، ހަށިގަނޑުގެ މުހިންމު ނިޝާންތައް (ވައިޓަލް ސައިންސް) މޮނިޓަރ ކުރަން ޖެހޭނެ ކަމަށް އޭނާ ފާހަގަކުރި އެވެ.

ނަމަވެސް، ސާޖަރީއަށްފަހު މަރަޑޯނާ ގޭގައި ހޭދަކުރި ދެ ހަފުތާގެ ތެރޭގައި އެއްވެސް ވަރަކަށް ލޭގެ ޓެސްޓެއް ހަދާފައިވާ ކަމުގެ ރެކޯޑެއް ފެންނަން ނެތް ކަމަށް ޑޮކްޓަރު ބުންޏެވެ.

މީގެ އިތުރުން، މަރަޑޯނާގެ ހަށިގަނޑު އާދަޔާ ޚިލާފަށް ދުޅަވެ ފަލަވަމުން ދިއުމާއި، ލޭގެ ޕްރެޝަރު ހުރި މިންވަރަކީ ވެސް ޑޮކްޓަރުން ކަންބޮޑުވާންޖެހޭނެ ކަންތައްތައް ކަމަށް އޭނާ ބުންޏެވެ.

މިދިޔަ އޭޕްރީލް މަހު ކޯޓަށް ވަނީ މަރަޑޯނާ މަރުގެ ތުންފަތްމަތީގައި އޮތްއިރުގެ ފޮޓޯތަކެއް ދައްކާފަ އެވެ. އެ ފޮޓޯތަކުން ފެންނަ ގޮތުގައި، ފެން ހެދުމުގެ ސަބަބުން އޭނާގެ ބަނޑު އޮތީ ވަރަށް ބޮޑަށް ދުޅަވެފަ އެވެ.

ޕޯސްޓްމޯޓަމް ރިޕޯޓުން ދައްކާ ގޮތުގައި، މަރުވުމުގެ ކުރިން އެތައް ގަޑިއިރެއް ވަންދެން މަރަޑޯނާ ދިޔައީ ވަރަށް ބޮޑަށް ވޭން ތަހައްމަލު ކުރަމުންނެވެ.

ޑޮކްޓަރު ޓްރިމާޗީއަކީ، މަރަޑޯނާއަށް ފަރުވާދިން ޑޮކްޓަރުންނަށް މުހިންމު ނިޝާންތަކެއް ފާހަގަނުކުރެވި ދޫކޮށްލެވުނު ކަމަށް ކޯޓުގައި ހެކިބަސް ދިން ތިންވަނަ މާހިރެވެ.

މި މައްސަލައިގައި ދައުވާ ލިބޭ ފަރާތްތަކުން ވަނީ މަރަޑޯނާގެ މަރުގެ ޒިންމާ އުފުލަން އިންކާރުކޮށްފަ އެވެ. ކުށް ސާބިތުވެއްޖެނަމަ އެ މީހުންގެ މައްޗަށް 25 އަހަރުގެ ޖަލު ހުކުމެއް އައުން އެކަށީގެންވެ އެވެ.

މި ޝަރީއަތް އެންމެ އަވަސްވެގެން ވެސް ސެޕްޓެމްބަރު މަހުގެ ނިޔަލަށް ކުރިއަށްދާނެ ކަމަށް ބެލެވެ އެވެ.