ދެ ޕައިލެޓުންގެ މެދުގައި ހަމަނުޖެހުމެއް ހިނގުމުން އިސްރާއީލަށް ދަތުރުކުރި ފުލައިދުބާއީގެ ފްލައިޓެއް ޑައިވާޓުކޮށްފި
30 ސެޕްޓެމްބަރު 2026 | ބުދަ 08:31ދޫބާއީން އިސްރާއީލަށް ދަތުރުކުރި ފްލައިދުބާއީގެ ބޯޓެއްގައި ހިނގި ކުއްލި ހާދިސާއަކާ ގުޅިގެން، ސައޫދީ އަރަބިއްޔާގެ ތަބޫކް އެއާޕޯޓަށް އެ ބޯޓު ކުއްލި ހާލަތުގައި ޖައްސައިފި. މި ހާދިސާއާ ގުޅިގެން އިސްރާއީލުގެ ސަލާމަތީ ބާރުތައް ތައްޔާރީ ހާލަތަކަށް ގެނައި ނަމަވެސް، މިއީ ބޯޓުގެ ފަޅުވެރިންގެ މެދުގައި ހިނގި ޒާތީ މައްސަލައެއް ކަމަށާއި ފަސިންޖަރުންގެ ހާލު ރަނގަޅު ކަމަށް އެއާލައިނުން ބުނޭ
ދުބާއީ ބައިނަލްއަގުވާމީ ވައިގެ ބަނދަރުތަކުގައި ޕާކުކޮށްފައި ހުރި ފްލައިދުބާއީ އެއާލައިންގެ މަތިންދާބޯޓުތަކެއް | ގެޓީ އިމޭޖަސް
ދޫބާއީން ފުރައިގެން އިސްރާއީލްގެ ތެލް އަވީވަށް ދަތުރުކުރި ފްލައިދޫބާއީގެ މަތިންދާބޯޓެއްގެ ދެ ޕައިލެޓުންގެ ދެމެދުގައި ހިނގި "ހަމަނުޖެހުމުގެ ހާދިސާއަކާ" ގުޅިގެން، އެ ބޯޓުގެ މިސްރާބު ބަދަލުކޮށް ސައޫދީ އަރަބިއްޔާއަށް ޖައްސައިފި ކަން ހާމަވެއްޖެ އެވެ.
ފްލައިޓް ޓްރެކިންގ ޑޭޓާތަކުން ދައްކާ ގޮތުގައި، ސައޫދީ އަރަބިއްޔާގެ ހުޅަނގު އުތުރުން ދަތުރުކުރަމުން ދިޔަ މި ބޯޓު ވަނީ ދެ މިނެޓަށް ވުރެ ކުޑަތަންކޮޅެއް އިތުރު ވަގުތުކޮޅެއްގެ ތެރޭގައި 17،400 ފޫޓަށް ތިރިކޮށްފަ އެވެ. މި ބަދަލާ އެކު، ބޯޓު ދަތުރުކުރަމުން ދިޔަ 34،000 ފޫޓުގެ އުސްމިނުން ގާތްގަނޑަކަށް 16،600 ފޫޓަށް ވަނީ ތިރިވެފަ އެވެ. އެއަށްފަހު، ބޯޓުން ވަނީ ކުއްލި ނުރައްކަލުގެ ސިގްނަލެއް ފޮނުވާފަ އެވެ. އަދި، އޭގެ އިރުކޮޅެއް ފަހުން އެ މަތިންދާބޯޓު ވަނީ ކުއްލި ހާލަތުގައި ސައުދީ އަރަބިއްޔާގެ އެއާޕޯޓަކަށް ޖައްސާފަ އެވެ.
ފްލައިޓް އެފްޒެޑް 1073 އަށް "ދަތުރުމަތީގައި ހާދިސާއެއް ކުރިމަތިވި" ކަމަށާއި، އެއަށް ފަހު ބޯޓު ޖައްސާފައި ވަނީ ސައުދީ އަރަބިއްޔާގެ ހުޅަނގު އުތުރުގައި އޮންނަ ތަބޫކް އެއާޕޯޓަށް ކަމަށް ފްލައިދޫބާއީގެ ތަރުޖަމާނަކު ވަނީ ހާމަކޮށްފަ އެވެ. މި ހާދިސާގައި ބޯޓުން ދަތުރުކުރި ހުރިހާ ފަސިންޖަރުންގެ ހާލުވެސް ރަނގަޅު ކަމަށާއި، އެ އެންމެންގެ ރައްކާތެރިކަން ކަށަވަރުކުރެވިފައިވާ ކަމަށް އެ އެއާލައިނުން ވަނީ ބުނެފަ އެވެ. އޭގައި ތިބީ އިސްރާއީލުގެ ރައްޔިތުން ކަމަށް ރިޕޯޓުތައް ބުނެ އެވެ.
ހާލަތު މިހާރު އޮތީ ކޮންޓްރޯލް ކުރެވިފައި ކަމަށާއި، "އިސްރާއީލްގެ ފަސިންޖަރުން ސަލާމަތްތެރިކަމާއެކު އަނބުރާ އިސްރާއީލް އަށް ގެންދިއުމަށް އަޅަންޖެހޭ ހުރިހާ ފިޔަވަޅެއް މިހާރު އަޅަމުންދާ" ކަމަށް އިސްރާއީލްގެ ބޮޑުވަޒީރު ބެންޖަމިން ނަތަންޔާހޫގެ އޮފީހުން ވަނީ ބުނެފަ އެވެ. މިއީ ބޯޓު ހައިޖެކް ކުރުމުގެ ހާދިސާއެއް ނޫން ކަމަށާއި، މިއީ ބޯޓުގެ ފަޅުވެރިންގެ މެދުގައި ހިނގައިދިޔަ ޒާތީ މައްސަލައެއް ކަމަށް ބެލެވޭ ކަމަށް އިސްރާއީލްގެ އޮފިޝަލުން ބުނެ އެވެ.
ކުއްލި ނުރައްކަލުގެ ސިގްނަލް ފޮނުވުމާ ގުޅިގެން، ބޮޑުވަޒީރު ނަތަންޔާހޫއާއި ދިފާއީ ވަޒީރު އިސްރާއީލް ކަޓްޒް ވަނީ ސަލާމަތީ ކުއްލި ބައްދަލުވުމެއް ބާއްވާފަ އެވެ. އަދި، އިސްރާއީލުގެ ޓެރެރިސްޓު ސިފައިން ވަނީ ކުއްލި ހާލަތަކަށް ގެނެސްފަ އެވެ. އަދި، ބޯޓު އޮތް ސަރަހައްދަށް އަސްކަރީ މަތިންދާބޯޓުތައް ފޮނުވާފަ އެވެ.
ސައުދީ އަރަބިއްޔާއަކީ އިސްރާއީލާ ރަސްމީ ގޮތުން ޚާރިޖީ ގުޅުން ގާއިމުކޮށްފައިވާ ގައުމެއް ނޫނެވެ. ކުއްލި ހާލަތުގައި ފްލައިދުބާއީގެ މަތިންދާބޯޓެއް ޖައްސަން ޖެހުމަކީ، އިސްރާއީލުގެ ގިނަ އަދަދެއްގެ ރައްޔިތުން ސައުދީ އަރަބިއްޔާއަށް ދަތުރުކުރަން ފެށުމާ ގުޅުންހުރި ހާދިސާއެއް ކަމަށް ސީއެންއެންއިން ރިޕޯޓު ކުރި އެވެ. މި ދެ ގައުމުގެ ދެމެދުގައި ސިޔާސީ ގުޅުން ގާއިމުކުރުވުމަށް އެމެރިކާއިން ދަނީ ގިނަ މަސައްކަތްތަކެެއް ކުރަމުންނެވެ.
މި މަސައްކަތުގެ ދަށުން، އިސްރާއީލުގެ އެއާލައިންތަކަށް ސައުދީ އަރަބިއްޔާގެ ވައިގެ ސަރަހައްދު ބޭނުންކުރުމަށާއި، ސައުދީ އަރަބިއްޔާއަށް ދަތުރުކުރުމުގެ ފުރުސަތު ހުޅުވާލާފައި ވަނީ 2022 ވަނަ އަހަރުގެ ތެރޭގައި ކަމަށް ސީއެންއެންއިން ރިޕޯޓުކުރެ އެވެ. ނަމަވެސް، ފަލަސްތީނުގެ މިނިވަން ދައުލަތެއް ގާއިމުނުކުރެވެނިސް އިސްރާއީލާއެކު ސިޔާސީ ގުޅުން ގާއިމު ނުކުރާނެ ކަމަށް ރިޔާޟުން ދަނީ ބުނަމުންނެވެ.
މަސްދަރު: ސީއެންއެން
