24 ގަޑިއިރު ތެރޭގައި ޔަމަނުގެ އަސްކަރިއްޔާއިން ހޫޘީންގެ އަމާޒުތަކަށް 414 ވަރުގަދަ ހަމަލާއެއް
30 ސެޕްޓެމްބަރު 2026 | ބުދަ 02:29ޔަމަނުގެ ސަރުކާރު ފައުޖުތަކުން ހޫޘީންގެ އަމާޒުތަކަށް ދެމުންދާ ވަރުގަދަ ހަމަލާތަކުގައި އެ ޖަމާއަތުގެ ގިނަ އަދަދެއްގެ ހަނގުރާމަވެރިން މަރުވެ، އަސްކަރީ ވަސީލަތްތަކަށް ބޮޑެތި ގެއްލުންތަކެއް ވަނީ ލިބިފައި. 2014 ވަނަ އަހަރުން ފެށިގެން ކުރިއަށްދާ މި ދާޚިލީ ހަނގުރާމަ ފަހަކަށް އައިސް އިތުރަށް ވަރުގަދަވެފައިވާއިރު، ހޫޘީން ދަނީ އިސްތިރާޖީ ގޮތުން މުހިންމު ސަރަހައްދުތަކެއް އެ ޖަމާއަތުގެ ބާރުގެ ދަށަށް ގެންނަމުން
ޔަމަނުގެ އަސްކަރިއްޔާގެ ސިފައިންގެ މީހަކު ހޫޘީ ހަނގުރާމަވެރިންގެ އަމާޒަކަށް ބަޑީގެ ހަމަލާތަކެއް ދެނީ | އަނަދޮލު އޭޖެންސީ
ފާއިތުވި 24 ވަރަކަށް ގަޑިއިރުގެ ތެރޭގައި އެކި ސަރަހައްދުތަކުގައި ހަރަކާތްތެރިވާ ހޫޘީ ހަނގުރާމަވެރިންގެ އަމާޒުތަކަށް 414 ހަމަލާ ދީފައިވާ ކަމަށް، އަންގާރަ ދުވަހުގެ ރޭ ޔަމަނުގެ އަސްކަރިއްޔާއިން ހާމަކޮށްފި އެވެ. މި އޮޕަރޭޝަންތައް ޚާއްސަކޮށް އަމާޒުކުރީ ހޫޘީ ޖަމާއަތުގެ އަސްކަރީ ގާބިލުކަމާއި އިތުރު އެހީތެރިކަން ފޯރުކޮށްދޭ ވަސީލަތްތައް ނައްތާލުމަށް ކަމަށް، ރަސްމީ ސަބާ ނޫސް އޭޖެންސީން އާންމުކުރި ބަޔާނެއްގައި، އަސްކަރިއްޔާގެ ތަރުޖަމާނު މާޖިދު އަލް-ނުޒައިލީ ވިދާޅުވި އެވެ.
މި ހަމަލާތަކުގެ ސަބަބުން ހޫޘީ ހަނގުރާމަވެރިންނަށާއި އެ ޖަމާއަތުގެ އަސްކަރީ ސާމާނަށް ބޮޑެތި ގެއްލުންތަކެއް ލިބިފައިވާ ކަމަށް ތަރުޖަމާނު ވިދާޅުވި އެވެ. ނަމަވެސް، އެ ގެއްލުންތަކުގެ އެއްވެސް ތަފުސީލެއް އޭނާ ހާމަކުރައްވާފައެއް ނުވެ އެވެ. އަސްކަރިއްޔާގެ މި ދައުވާތަކާ ގުޅިގެން، ހޫޘީންގެ ފަރާތުން ވަގުތުން އެއްވެސް ބަހެއް ބުނެފައެއް ނުވެ އެވެ.
ހޯމަ ދުވަހު ވެސް ސަރުކާރުގެ ފައުޖުތަކުން 10 ސަރަހައްދެއްގައި ހުރި ހޫޘީންގެ އަމާޒުތަކުގައި 356 އޮޕަރޭޝަނެއް ހިންގާފައިވާ ކަމަށާއި، އަސްކަރިއްޔާގެ ހަމަލާތަކުގައި ހޫޘީ ޖަމާއަތުގެ 476 ހަނގުރާމަވެރިން މަރުވެ ނުވަތަ ޒަޚަމްވެފައިވާ ކަމަށް ޔަމަނުގެ ދިފާއީ ވުޒާރާއިން ވަނީ ހާމަކޮށްފަ އެވެ.
ޔަމަން އަހުލީހަނގުރާމައެއްގެ ތެރެއަށް ވެއްޓިގެން ދިޔައީ 2014 ވަނަ އަހަރު ހޫޘީ ޖަމައާތުން އެ ގައުމުގެ ވެރިރަށް ސަންޢާއަށް އަތްގަދަކުރުމާ ގުޅިގެންނެވެ. މިއާއެކު، ބައިނަލްއަގުވާމީ ގޮތުން ބަލައިގަނެފައިވާ ޔަމަނުގެ ސަރުކާރަށް ވާގިވެރިވުމަށް ޓަކައި، ސައޫދީ އަރަބިއްޔާއިން އިސްވެ އޮންނަ ކޯލިޝަނުން 2015 ވަނަ އަހަރު ވަނީ އެ ގައުމުގެ ހަނގުރާމައިގެ ތެރެއަށް ވަދެފަ އެވެ.
ސެޕްޓެންބަރު މަހުގެ ތެރޭގައި ހަނގުރާމަ ވަރަށް ބޮޑަށް ވަރުގަދަވެގެން ދިޔަ އެވެ. މި ގޮތުން، އަލް-ހުދައިދާއާއި ތައިއްޒު ޕްރޮވިންސްގެ މުހިންމު ސަރަހައްދުތަކެއް ހޫޘީން ވަނީ އެ ޖަމާއަތުގެ ބާރުގެ ދަށަށް ގެންގޮސްފަ އެވެ. އަދި، މީގެ ތެރޭގައި އިސްތިރާޖީ ގޮތުން މުހިންމު ސިޓީއެއް ކަމަށްވާ މުޚާ ހިމެނޭއިރު، އެ ޖަމާއަތުން ވަނީ ބާބު އަލް-މަންދަބު ކަނޑުއޮޅީގައި އޮންނަ މައްޔޫން ޖަޒީރާއަށް ވެސް އަތްގަދަކޮށްފަ އެވެ.
މަސްދަރު: އަނަދޮލު އޭޖެންސީ
