އިސްރާއީލުގެ ބޮޑުވަޒީރު ނަތަންޔާހޫ ޔޫއޭއީ އަށް ކުރެއްވި ޒިޔާރަތާ ގުޅިގެން، ސަރަހައްދީ ހަމަޖެހުން ނަގާލަފާނެ ކަމުގެ އިންޒާރު އީރާނުން ދީފި
30 ސެޕްޓެމްބަރު 2026 | ބުދަ 04:56އިސްރާއީލުގެ ބޮޑުވަޒީރު ނަތަންޔާހޫ ސިއްރިއްޔާތުގައި ޔޫއޭއީއަށް ކުރެއްވި ދަތުރުފުޅުތަކާ ގުޅިގެން، ސަރަހައްދީ ހަމަޖެހުން ނަގާލުމަށް ފުރުސަތު ނުދިނުމަށް އީރާނުން އަވަށްޓެރި ގައުމުތަކަށް އިންޒާރުދީފި. މިފަދަ ދަތުރުތަކުގެ ސަބަބުން ނުރައްކާތެރި ނަތީޖާތަކެއް ނުކުމެދާނެ ކަމަށް ބުނެ، އިސްރާއީލުގެ ހަރަކާތްތަކަށް މަގުފަހިކޮށް ނުދިނުމަށް އީރާނުގެ ފޮރިން މިނިސްޓްރީން ވަނީ ގޮވާލާފައި
ޔޫއޭއީ އަދި އިސްރާއީލުގެ ދިދަ | އެލަމީ
އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ޔުނައިޓެޑް އެރަބް އެމިރޭޓްސް (ޔޫއޭއީ) އަށް ކުރެއްވި ކަމަށް ބުނާ ޒިޔާރަތާ ގުޅިގެން، ސަރަހައްދީ ހަމަޖެހުން ނަގާލުމަށް މަސައްކަތްކުރާ ފަރާތްތަކަށް ފުރުސަތު ނުދިނުމަށް އީރާނުން ސަރަހައްދީ ގައުމުތަކަށް އިންޒާރު ދީފި އެވެ. އީރާނުން ބުނީ އިސްރާއީލުގެ ބޮޑުވަޒީރު ފަދަ ފަރާތްތަކުން ގައުމުތަކަށް ވަޑައިގަތުމަކީ ނުރައްކާތެރި ނަތީޖާތަކެއް ނުކުމެދާނެ ކަމެއް ކަމަށާއި، އިސްރާއީލުން މަސައްކަތް ކުރަނީ އެ ގައުމުތަކަކީ ސަރަހައްދީ ނުތަނަވަސްކަން އުފައްދާ މަރުކަޒުތަކަކަށް ހެދުމަށް ކަމަށެވެ.
ޔޫއޭއީގެ ރައީސް މުހައްމަދު ބިން ޒައިދު އަލް ނަހްޔާންގެ ރަސްމީ ދައުވަތަކަށް ނަތަންޔާހޫ އެ ގައުމަށް ވަޑައިގެންނެވި ކަމަށް ފެތުރިފައިވާ ޚަބަރުތަކާ ގުޅިގެން، އީރާނުގެ ފޮރިން މިނިސްޓްރީން އަންގާރަ ދުވަހު ވަނީ ބަޔާނެއް ނެރެފަ އެވެ.
އިސްރާއީލުގެ "ކުޑަކުދިން މަރާ އަދި ހަނގުރާމައަށް ފެންބޮވައިގެންފައިވާ" ބޮޑުވަޒީރު މި ސަރަހައްދަށް ކުރެއްވި ދަތުރުފުޅު އީރާނުން ވަނީ ހަރުކަށި އިބާރާތުން ކުށްވެރިކޮށްފައެވެ. އަދި މިކަމުގެ ސަބަބުން ކުރިމަތިވެދާނެ "އިންތިހާއަށް ނުރައްކާތެރި ނަތީޖާތަކާ" މެދު އެ ގައުމުން ވަނީ އިންޒާރު ދީފަ އެވެ.
ސަރަހައްދީ ސަލާމަތާއި ރައްކާތެރިކަމަކީ އެންމެންގެ މަސްލަހަތާ ގުޅިފައިވާ ކަމެއްކަން ފާހަގަކުރަމުން، ހަމަޖެހުން ނަގާލާ ފަރާތްތަކަށް މަގުފަހިކޮށްދިނުމަކީ ހުޅަނގު އޭޝިއާގައި ބޮޑެތި ބައިބައިވުންތަކާއި، ބިރުވެރިކަމާއި، ހަމަނުޖެހުން އިތުރުވެގެންދާނެ ކަމެއް ކަމަށް އީރާނުގެ ފޮރިން މިނިސްޓްރީން ބުންޏެވެ.
އިސްރާއީލުން ސަރަހައްދީ ހަމަޖެހުން ނަގާލުމަށް ކުރާ މަސައްކަތްތަކަށް އެހީތެރި ނުވުމަށާއި، ސަރަހައްދުގެ އެހެން ގައުމުތަކާ ދެކޮޅަށް ހިންގާ ހަރަކާތްތަކުގެ މަރުކަޒަކަށް އެ ގައުމުތަކުގެ ބިންތައް ވިޔަ ނުދިނުމަށް އީރާނުން ވަނީ ސަރަހައްދީ ސަރުކާރުތަކަށް ގޮވާލާފަ އެވެ.
މި ސަރަހައްދު މިހާރު ހޭދަކުރަމުންދަނީ ތާރީޚީ ގޮތުން ބަލާއިރު އެންމެ ނާޒުކު ދުވަސްތައް ކަމަށް އެ ބަޔާނުގައި ފާހަގަކޮށްފައިވެ އެވެ. އަދި އިސްރާއީލަކީ އީރާނާއި ސަރަހައްދުގެ އެހެން ގައުމުތަކަށް އޮތް ބޮޑު ނުރައްކަލެއްކަން ސާބިތުވެފައިވާ ކަމަށާއި، އެ ގައުމުން އީރާނަށް ތަކުރާރުކޮށް އިންޒާރުތައް ދެމުންދާކަންވެސް ބަޔާނުގައި ހަނދާންކޮށްދީފައިވެ އެވެ.
ސަރަހައްދީ ސުލްހައާއި އެންމެންގެ ސަލާމަތަށް ނުރައްކާވާ ފަދަ މިފަދަ ދަތުރުތަކުގެ ސަބަބުން ނުކުމެދާނެ ނަތީޖާތަކާ މެދު ސަރަހައްދުގެ ހުރިހާ ގައުމުތަކަކުން ސަމާލުވާންޖެހޭ ކަމަށް އީރާނުގެ ފޮރިން މިނިސްޓްރީން ބުންޏެވެ.
އިސްރާއީލުގެ މީޑިއާތަކާއި ރޮއިޓާސްއަށް މައުލޫމާތު ދިން އިސްރާއީލުގެ އިސް އޮފިޝަލަކާ ހަވާލާދީ ރިޕޯޓްކޮށްފައިވާ ގޮތުގައި، ނަތަންޔާހޫ އާދީއްތަ ދުވަހު އަބޫދާބީއަށް ވަޑައިގެން، ދުވަހުގެ ބޮޑު ބައެއްގައި ޔޫއޭއީގެ ރައީސް އަލް ނަހްޔާންއާ އެކު ސިއްރު ބައްދަލުވުންތަކެއް ބޭއްވެވުމަށްފަހު އެ ރޭ ވަނީ އެނބުރި ގައުމަށް ވަޑައިގެންފަ އެވެ.
މީގެ އިތުރުން، މިދިޔަ މާރިޗު މަހުގެ 26 ވަނަ ދުވަހުވެސް ނަތަންޔާހޫ ސިއްރިއްޔާތުގައި ޔޫއޭއީއަށް ދަތުރުކުރައްވައި އަލް ނަހްޔާންއާ ބައްދަލުކުރެއްވި ކަމަށް ރޮއިޓާސްއިން ރިޕޯޓްކޮށްފައިވެ އެވެ.
